Tun laia Mizorama sawi zui hlawh leh Social media lama kan hmuh tam ber pawl chu 'The Mizo Marriage and Inheritance of Property (Amendment) Act, 2026' hi leh kan sawi zui dan hi a ni awm e. Dan leh Hrai kaihhnawih thil te pawh a awm thei ang a, chu lam chu sawi zui loin kan thupui khi sawi zui ta mai ila a ṭha awm e.
Mipa aiia Hmeichhe tam zawkna
Tun din hmunah hian Mizo Mipa aiin Hmeichhiate an tam zawk tih chu phat rual a ni lo a. An tam zawkna pawh hi 28,037 vel niin a lang a, hei ai pawh hian a tam zawk tawh mai thei bawk. Hmeichhia kan tam zawkna chhan hi a hrang hrang a awm thei ang a, mipa hi kan thih hnem zawk avang te pawhin hmeichhia te pawh hi kan zat lo niin a lang. Mizo nula te hian pasal neih vek tur ti ta se la, Mizo tlangvalte hian kan daih lo tih hi fiamthu ṭawngkam lar tak pawh a ni awm e.
Mipa hi kan tlem viau em?
A tlem zawk ni mahila mipa te hi a thawmna zawk leh langsar zawk kan ni fo a, chu chuan Mizo mipa tam tak hi pasala neih tlak loh, ruihhlo bawiha tang leh puitling lo tak tak kan nih avangin Mizo hmeichhiate hian hnam dang pasala an nei ta fo mai hi an dem awm loh e tih ṭawngkam te pawh kan hre ta fo mai a nih hi.
Mizorama Kohhran lian ber pahniha ṭhalai pawl - KTP leh TKP din hmun thar ber 2025 - 2026 hi lo en ta ila -
ṬHALAI KRISTIAN PAWL : Mipa - 31399, Hmeichhia - 20910
KRISTIAN ṬHALAI PAWL : Mipa - 109456, Hmeichhia - 71675
Hetiang hi tuna KṬP/ṬKP member din hmun thar ber a ni a. Hmeichhia khi belhkhawm ta ila, 92585 kan ni ang a, mipa hi 48270 -in kan la tam zawk dawn a. Kohhran dang ṭhalai member te pawh hi mipa aia hmeichhe tlemna zawk kan nih a rinawm a. Chungah chuan patling tam tak awm tawh mahse Mizo tlangval tam tak hi kan la awm a ni tih hi chu a dik awm e.
Hmeichhia te hi an neih tlak vek em?
He thu kan sawi avang hian hmeichhiate hi kan hmu hniamin kan va deuhsawh a ni hauh lo a, nupui atana neih tlak vek an ni em tih hi zawhna awm thei tak a ni awm e. Tun hnaia ruihhlo hmanga sumdawng an man tam zawkah hmeichhia kan hmu a, mipat hmeichhiatna lam hawia inzuar tam tak tak hmeichhia kan awm bawk a. Kan tam zawk vang ringawta neih tlak kan ni lo a, kan tlem zawk vang ringawtin Mizo mipate hi neih tlak loh pawh kan ni chuang lo. Kan inpawm tawna ram leh hnam humhalh kan duhna zawn aṭanga kan in enrema kan ṭan dun a ngai hle awm e. Kan inngaihnep tawna kan inten tawn a nih chuan hnam boral chiah hi kan hmabak a ni a, kan inpawm tawn a ngai.
Hmangaihna, aw hmangaihna!
Hmangaihna hi a ropui a, mi nupui pasal neih turah phei chuan - an inhmangaih chuan a tawk a, kan va sawi ve tur a awm lo. An duh duh an nei thiang a, an inhmangaih chuan a tawk - tih hi a va dik em!
Chutih rual chuan kan hmangaih turte pawh hi kan thlan chu a ngai a, kan thlan dik hi a ngai tel tih kan hriat a ṭha hle mai. Vawiin khawvelah chuan keimahni hi a laiah awmin (self -center perspective) engkim hi keimahni tan chauh kan thlir tawh a. Pathian thu - theology te pawh hi kan mil zawnga kawihher kan tum a. Pathian duhdan (fundamental) aiin kan duh dan mila pawh fan te nuam kan ti.
Mihring hian a duh zawng leh nuam a tih zawng hi ti ta vek se la, Pathian thu aṭanga kan hmuh sual hi kan tih tam ber tur a ni ang. Chuvangin Pathian chuan khap chin, phal loh chin, tih tur leh tur loh min tuk a. Kan mihring duhna aiin Pathian duhna a lian zawk. Ram leh hnam hmangaihna rilru aṭanga kan teh chuan, keini Mizo hnam tlemte hian hnamdang pasala neih hi sawimawi tur kan ni lo. Kan Mizo nula dik tak chuan, a nihna Mizo a hmangaih a nih chuan pasal atan, a hmangaih turin Mizo mipa a melh hram hram tur a ni dawn lawm ni?
Chuvangin, ram leh hnam hmangaihna avang zawkin kan nulate hian hnam dang min neih san lo ula kan ti mai a ni e. Chutiang bawkin Mipa te hi pasala neih tlak kan ni vek lo ang a, kan nula te pawh nupuia neih tlak kan ni vek lo tih chu kan inhre ve vek awm e. Chuvanhin, in siam ṭha ve ve ila, Mizo hnam hi Pathian thu anga ropui taka din turin ṭan ila zel ang u.
Comments
Post a Comment