IMANUELA THI ZAMAN

Lal Isua thisen hlut zia leh keini misual boral tur te min chhanmdamna hlut zia puanchhuahna hla tha ber pawl chu Kristian Hla Bu No- 173-na 'Imanuela thi zaman' tih William Cowper phuah, Rev. Chhuahkhama lehlin hi a ni ngei ang.

He hla phuahtu William Cowper-a hi Great Berkhampstead, England-ah November 26, 1731 khan a lo piang a. Kum 1754 khan Ukil ni turin a inbuatsaih a, mahse vanduaithlak takin Ukil ni tur chuan a tling zo lo a, depression nasa tak a nei a ni. Chuti anga nun hreawm tak a hman hnu chuan kum 1771 khan he 'Imanuela thi zaman' (There is a Fountain Filled With Blood) tih hla ropui tak hi a lo phuah chhuak a. Chu a hla phuah chu Conyers’s Collection of Psalms and Hymns in 1772  hla bu ah an chhuah hmasa ber a. Chumi hnu chuan Hla phuah thiam em em (Amazing Grace phuahtu) Newton nen an hla bu siam The Olney Hymns - ah kum 1779 khan an chhuahnawn leh a ni. 

He hla a phuahna Bible chang behchhan chu Zakaria 13:1 "Chumi ni-ah te chuan Davida chhungte leh Jerusalem-a chengte sualna leh bawlhhlawhna tleng fai tur tui a lo luang chhuak ang" tih hi hmangin Lal Isua thisen thiltihtheihna chu kan tan chhandamna kawng hawng tu a nih zia he hla hmang hian a lo puangchhuak a ni. 

Lal Isua thisen hlu tak mai chu lui ang maiin kan tan a lo luang chhuak a. Chu thisen, lui ang maia lo luang chhuak chu a lo luang satliah ngawt lo a, keini misual te min tlen faina tur leh min chhandamna tur a lo luangchhuak a ni. Mi zawng zawng, misual leh mi tha, hausa leh rethei, mi lian leh te, khawvel tan chu thisen chu kan sual tlenfaina a ni.

Chu thisen hlu tak mai Lal Isua atanga lo luang chhuak, chatuan nunna kan neih theihna tura kan sualna leh kan bawlhhlawhna zawng zawng min tleng fai thei chu Krawsa Isua ruala an khenbeh ve  khan  chiang takin a hmu a. Misual, Sorkar leh mipuite'n Kraws lera mualpho taka thi tlaka an ngaiha an khenbeh nimah se inthlahrung takin, “Isu, i ram i thlen hunah mi hre reng ang che,” a ti a. Isua chuan a hnenah, “Tih tak meuhvin ka hrilh a che, vawiinah hian ka hnenah Paradis-ah i awm ve ang,” a ti a nih kha (Lk. 23:42f). Chuti anga misual thitur an khenbeh ai pawha sual zawk, bawlhhlawh zawk, tenawmzawk pawh nimah ila Lal Isua chuan min ngaidam duh a ni. A va ropui em!

Kalvari, mi te'n 'Luruh hmun' (Matt 27:32) tia an sawina hmun leh Isua khengbettu te'n anchhedawnga an ngaihna hmun chu keini tan chuan khawvela tlang mawi ber  a ni - a chhan chu chu tlang anchhedawng leh hmun anchhedawngah chuan Chhandamna lui chu a luang chhuak a. Chu luia kan inbuala chu thisena kan intlen chuan kan sual zawng zawng te chu ngaihdam a ni dawn tlat si a! Chu tlang 'Golgotha - Luruh hmun' chu kein tan chhandamna famkimna hmun, Lal Isua thisen kan tana a luanna hmun a nih avangin kan tan chuan a hluin a va mawi em! 

He khawvelah hian thil dang sawi tur leh sak tur hi kan nei lo - Lal Isua min chhandamna thu leh hla puanchhuah mai loh chu! Chuvangin Lal Isua'n min chhandamna thu hi kan tlangaupui zel ang a, Amah faka zai zel mai tur kan nih zia hi he hla phuahtu hian a hre chiangin a hmu chiang em em a ni. Hrehawmna leh thihna hmun he khawvelah awm mahila Lal Isua thisen chuan chatuan nunna min pektlat avangin hreawmna leh thihna hmun atangin pawhin Lal Isua fakin kan zai zel mai dawn a ni - Lal Isua thisen hi kan tana thil hlu ber a ni si a.

Chu Lal Isua thisen chu kan hnaih chilha kan belchian poh leh hmangaihna leh khawngaihnain a khat a ni tih kan hre chiang telh telh a. Kan sualna chhiarsen loh leh tenawm em em chu a tleng fai a. Phut let leh chhan awm hauh loin kan sualna te chu chu thisen chuan Lal Isua'n a tleng fai a. Chu a khawngaihna avanga chhandamna kan channa Lal Isua thisen chu mi zawng zawng tan a ni a. Khawvel awm chhungin, chatuan thleng pawhin a kang dawn lo a, a awm reng dawn a ni - nang leh kei misual ber tan hian. 

IMANUELA THI ZAMAN

Phuahtu:  William Cooper 1731-1800

Imanuela thi zaman,
Thisen lui a luang chhuak;
Chu thisen lui mi sualte tan,
Sual tlen faina a ni

Mi sual thi tur an khenbeh khan,
Chhandamna lui a hmu;
Amah angin sual mah ila,
Min la ngaidam duh e.

Kalvari tlang mawi takah chuan,
Chhandam lui a luang chhuak;
Chu lui fima ka inbual chuan,
Ka sual a tleng fai ang.

Thil dang aiin i hla mawi ber,
He khawvel thlan hmunah;
Nangmah fakin ka zai ang,
Nangain min chhandam a.

Thisen lui chu ka lo hmuhin,
Khawngaihnain a khat;
Chatuan pawhin a kang lo vang,
Misual faina lui chu.