Lal Isua Hmangaihna

Ramhlun North Pastor Bial Zaipawl in kum 2013 a an sak Lal Isua hmangaihna tih hla, T. Laldintluanga phuah hi tun lai ah hrelo kan vang hle awm e. He hla hi Zaithiam hrang hrang te pawhin an sa a. Lal Isua hmangaihna hi kan tan a tawkin engkima engkimah a rintlak zia puanchhuahna ropui tak a ni tih kan hre awm e.

  

He hla phuahtu T. Laldintluanga, Ramhlun North hi tunah hian Synod Choir (2018-2020) Conductor ni mek a ni a. He hla a phuah dan chanchin hi ka va zawt a, PDF in min lo pe thlap a, a chung ah ka lawm hle. 

“He hla hi kum 2013 a ka phuah a ni a, heng hunlai hian a bikin thalaite ah mahni intihlum te, ruihhlo avanga thihna te, thih thut thutna ang chi kha a tam em em a, ka phak tawkin ka vei ve hle a ni. Chung ka thalai pui sual in a tihbuai mek, mahni intihhlum duhna hial nei, nun beidawnga tap mek te pawh chu Lal Isua hmangaihna hian a nghak reng ni hian ka hria a. Emau kawnga khualzin pahnih ten an khawhar hnem tura Lal Isua an sawm khan an va hlawhchham lo chiang em. Sawmtute a hnar ngailo a, “Thih dawn darkara amah pan tute pawh a hmangaihna in a lo kuangkuah leh mai thin a, a hmangaihna hian tlailuat a nei ve lo a ni” tih te ka ngaihtuah a. Hmelma chu sawiloh ka chenpuite ngei pawh ngaihdam harsa ka tih chang a tam nen Lal Isua hmangaihna hi chu a va ropui bik tak em, misualte, amah phatsantu te pawh min hmangaih tlat mai hi a mak ka tiin, a ropui ka ti thar em em a ni. Chu hmangaihna chuan a nghah hian min nghak veng veng mai ni hian ka hria a.  

‘Nun chau in i rum thin maw? Beidawng in i tap thin maw? Lal Isua hmangaihna chuan a nghak che; Sawmtute a hnar ngai lo, tlai luat pawh a awm nem maw, Lal Isua hmangaihna hi a mak a ni.’ tiin ka phuah chhuak ta hlawl mai a ni.

Lal Isua hi hling lukhumin phuar vel, hmusit leh endawng ni mahsela kei misual tan hian a mawi ber a, chatuan thlenga amah fak hi ka bat niin ka in hre thar nasa em em a ni. Tin, he hla ka phuah lai vel hian ka nu hi thih ngam in a damlo ve a, biak theihloh te’n a’n awm ve a, chhungkua kan mangan ve em em lai a ni. ‘Ka nu ka nu’ ti a kan inbawihsawm tumte chuan a mangangthlak ve thin hle a ni. Mahse chung manganna atang bawk chuan a hmangaihna ka lo hre thar leh ta. Kan chhungkua in natna kan tawh mek bakah nakinah chuan thihna kut vawtin kan chhungkua min man hun a la thleng ve ang a, chung huna ka thlamuanpui ber tur chu Lal Isua hmangaihna bawk hi a ni tih keimah ah hian a chiang em em a.

‘Bawrhsawmna ka tawh chang leh chak lova ka awmlai pawn, Lal Isua hmangaihna chu a tawk e; Mal in min awmtir ngailo zanthim pawh, Amah nen chuan muang takin ka kal amah ka thian a ni’ tiin min han hnem leh a. Zan hrehawm leh thimchhah tak kara hla taka kawleng ve ve alo awm chuan beiseina thar min pe thin ang deuh hian eng harsatna karah pawh Lal Isua hmangaihna angchhunga ka awm chuan ka mal dawnlo niin ka inhria a, ka thla a timuang em em a ni. Chu hmangaihna tlemte ka hriat chhun atang ngawt pawh chuan thildang, khawvel ropuina leh mawina te, nawmchenna te chu thlakhlelh ber tur a lo niloh zia ka ngaihtuah thar a. He ka damchhung reilote a lo tawp huna chatuan hmun vanram ka thlen hunah pawh LAL ISUA HMANGAIHNA hi ka chhuan ber tur leh ka chatuan hla, ka sak nin theihloh tur chu a ni tiin,

‘Eng dang reng ka ngai tawh lo'ng, I hmangaihna kut chauh hi aw Isu ka tan a tawk khawvelah, Van hmunmawi ka thlen thleng in hei hi ka chatuan hla tur, Lal Isua hmangaihna hi a hlu ber e’ tiin he hla hi ka lo phuah chhuak ta a ni.”

Lal Isua hmangaihna thukzia hi chu a bel chiang a piangte hian an hmu fiah a, bel chianglo leh  hre fiahlo te hlei hlei hi Lal Isua hian min la hmangaih zual zui bawk a!

Lal Isua hmangaihna chang tur hian tlai a awm thei lo a. A dinglama Kraws a an khenbeh pawh khan a thih dawn ah khan Lal Isua hmangaihna ropuizia chu a hmuh kha! Chuvangin eng dinhmunah pawh lo dingin sual kawng thuk ber zawh mek, AIDS vei mek, mahni intihhlum tum mek, damchhunga Jail tang tur, ruk ru leh tualthat, khawvel leh kan hmangaihte pawhin an ngaihdam theih tawhloh khawpa sual pawh ni mahila Lal Isua hmangaihna chu kan tan a tawk em em a. Chuti ang zawng zawng khawp sual kan nihna chu min hmangaihna tizualtu leh hlinglukhum a khum chhan kha a ni zawk a sin!

Beiseina reng reng I neih tawh loh hun ah te, phatsan I nih hun ah te, mahni intihhlum I tum mek lai pawhin Lal Isua hmangaihna chuan a nghak che tih hi hre reng ang che.

Lal Isua Hmangaihna

Phuahtu: T Laldintluanga
Satu: Ramhlun North Pastor Bial Zaipawl

Lal Isua hmangaihna ropui hi,
Hringfa ten kan hrefiah zo lo fo thin;
Hmangaihna thuril danglam leh mawi chu,
Lal Isua hmangaihna hi a ni.

Nun chau in i rum thin maw? Beidawng in i tap thin maw?
Lal Isua hmangaihna chuan a nghak che;
Sawmtute a hnar ngai lo, tlai luat pawh a awm nem maw,
Lal Isua hmangaihna hi a mak a ni.

Lal Isua hi aw a mawi ber e,
Hlinglukhum in phuar vel mahsela;
Ka lal ka chhandamtu chu ka fak ang chatuan thleng in,
Haleluiah tiin ka fak ang.

Bawrhsawmna ka tawh chang leh chak lova ka awmlai pawn,
Lal Isua hmangaihna chu a tawk e;
Mal in min awmtir ngailo zanthim pawh,
Amah nen chuan muang takin ka kal amah ka thian a ni.

Eng dang reng ka ngai tawh lo'ng,
I hmangaihna kut chauh hi aw Isu ka tan a tawk khawvelah,
Van hmunmawi ka thlen thleng in hei hi ka chatuan hla tur,
Lal Isua hmangaihna hi a hlu ber e.