Min Hruai Zel Dawn

Ira Forest Stanphill chu ni 14 February, kum 1914-ah khan Bellview, New Mexico-ah Andrew Crittenton Stanphill leh Maggie Flora Engler Stanphill te inkarah a lo piang a. An chhungkua-in  Coffeyville, Kansas -ah chengin kum 12 a upa a nihin High Sikul a zo a. Chillicothe (Missouri) Junior College atanga Graduate a zawh hnu lawk- kum 22 chauh a upa a nihin rawngbawl turin a inpe a. 

Kum 1939, April ni 28-ah Southern Missouri District Council, Assemblies of God Kohhran chuan Pastor niturin a nemnghet a; a dam chhung hun hi rawngbawlnain a hmang zo a ni.  A dam chhung hian America leh khawvel ram hrang hrang 40 chuangah rawngbawlna a nei a; Pathian hla 500 chuang zet a phuah bawk a ni. 

April ni 23, 1939 ah Zelma Lowson nupuiah neiin a nupui hi rimawi lam thiam tak niin piano a tum thiam em em a; fapa Ray-a neiin an chhungkua hian rawngbawlna/crusade te neiin an zinkual nasa em em thin a. Thusawi chauh niloin zai an thiam bawk a; chuti ang chuan Radio leh TV lamah te rawngbawlna zau tak neiin an hun an hmang thin. 

Chuti anga Pathian rawngbawla hlim tak maia an nupaa hun an hmanlai chuan an chungah harsatna lian tak mai a lo thleng a. Pastor Stanphill-a nupui Zelma-i chuan rawngbawlna chhunzawm zel chu duhloin a pasal chu a kalsan ta tlat mai a. Pastor Stanphill-a chuan a nupui chu theihtawp chhuaha hmangaihna leh ngaidamna nena rawngbawl zel tura a sawm pawhin a duh ta tlat lo a. Chuti chuan lohtheihlohin October ni 7, 1948 khan an inthen a; Zelma-i chuan John E. Cowan pasal-ah a neih san a. Vanduaithlak takin February ni 12, 1951-ah Car accident-in Zelma i chu a boral zui a. 

Chung vanduaina a chunga lo thleng zawn zut mai avang chuan Pastor Stanphill-a nun chu a buai ve em em mai a. Tunlaia natna lar tak 'depression' pawh a neih phah hial thu a sawi a; chuti anga harsatna lian tak mai a chunga a thlen lai chuan khawvela Pathian hla ropui ber pawl 'Min Hruai Zel Dawn' (I Know Who Holds Tomorrow) tih hla hi a lo phuah chhuak a. Car a khalh laiin he hla hi a hmui tumin a sa rut rut a; a hmalam hun lo kal zel tur te a ngaihtuahin a buai a. Mahse Pathian kutah engkim nghatin Pathianin engkim a rel fel sak vek dawn a nih tih a hria a. A Office a thlen veleh a piano lain he hla ropui tak mai hi a lo phuah chhuak ta a ni. 

Kum 1951, June ni 7 khan Pastor Stanphill-a chuan Gloria Hollingsworth-i chu nupuiah nei lehin fanu pahnih an nei a. A dam chhung hian harsatna hrang hrang a tawk a; kum 1976-ah thluak cancer a vei a. Mahse Pathian a ring tlat a, engpawh tawk dawn mahse Pathian chuan a hruai zel dawn a ni tih chiang takin a hria a. Chuti ang chuan a dam chhung hun hmang zoin kum 1993, December ni 30 khan a rin Pathian angchhung a chatuana chawl turin a boral ta a ni. A nupui Glora-i pawh kum 2017, August ni 22 khan a lo boral ve tawh bawk a ni.

He hla kan hmuh ang hian kan hmalam hunah engthil nge lo thleng dawn kan hrelo a; harsatna, lungngaihna leh thihna te pawhin kan chungah thla a zar reng a. Mahse engkim remruattu Pathian chuan kan hmalam hun hi a neih tlat vangin Amah ring chunga engkim hi hmachhawn tur kan nih zia leh min hawisanin min phatsan ngai dawnlo tih kan hmu a. Pathian kuta innghah chu kan tihtur leh kan hahdamna a nih zia he hlaah hian kan hmu thei awm e. 

He hla ropui tak mai hi ATC Male Voice (2017-2018) te chuan an conductor Varthantluanga'n Mizo tawnga a lehlin chu an sa a; You Tube lamah en theihin a awm. Kum 2020 Central Kristian Thalai Pawl Conference hla buah pawh hian number 36-naah awmin he hla hmang hian Pathian rintlak zia leh kan engkima engkim a nih zia hi kan hriatnawn fo theih na'n Pathianin malsawm rawh se. 

Min Hruai Zel Dawn

(I Know Who Holds Tomorrow)

Lettu: Varthantluanga

Satu: ATC Male Voice (2017-2018)

1. Zinkawng tawn tur hre lovin maw

Nitinin ka kal zel a

Ral leh mai tur khawvelah hian rintlak reng a awm silo

Mahse Isua'n min tiam avangin lungkham reng ka nei silo

Engkim a hriatlawk avangin

A kiangah ka kal zel dawn

Thil engpawh tawk dawn mahila

Hriatlawk loh thil pawh nise

Remruattu-a chu ka hria a

Min hruai zel dawn tih ka hria

2. Rangkachak kawtthler lam panin 

Kawl eng lam ka zawh zel a

Buai, mangan lo thleng thin mahse ka phurrit min chhawk zang thin

Ram ni tlak ngailohnaah chuan mittui zawng a hul tawh ang

Chhum zinna piah ram mawiah chuan

Hlimna chhimbal eng a zam

3. Khual zin kawng ka zawh mekah hian

Tlakchham ni pawh lo thleng se

Chawngzawng pawh hawisan lotu chuan min kalsan ngai silova

Ka chanpual ka kawng zawhah hian tuilianin min nuai mahse

Ka hnena awm reng Lalpa chuan

A thisenin min hliahkhuh