BEISEINA NUNG

I Petera 1:3-9

A chunga kan tarlan Bible châng innghahna hi Petera te hun laia Asia Minor-a Kohhran țhang chak em em mai te chungchang lehkha a thawn ațangin a ni a. Helai 1:3-9 ah hian Pathian khawngaihnain Lal Isua tiha thawhnlehna hian beiseina nung min neih tir thu leh chu Lal Isua thiha thawhlehna chu kan chhandamna-chatuan nunna kan neih theihna tur a nih thu Petera hian min hrilh a. Beiseina hi keini ringtute chauh ni lo mi zawng zawng hian kan neih hi a pawimawh em em a. Beiseina hi mi rethei te chaw an ti hial țhin a ni.

Miin beiseina a neih tawh loh chuan nun hlutna hi a hre tawh țhin lo a. Mi lar, zaithiam, Celeb etc pawh nise amah ah beiseina a awm loh chuan mahni intihhlum mai hi a thlang țhin. Hmanni lawk ah Linkin Park band-a an Vocalist Chester Bennington-a pawh inawkhluma an hmuh kha! Khang te kha a larin khawvelin an hriat nen-beiseina a neih tawh loh vang a ni ngei ang- a nunna kha amahin a inlak hial ni! Chuvangin beiseina neih pawimawh zia hi kan sawi uar tawk thei lo ang a. Ringtu te hi beiseina neih a pawimawh zia leh Lal Isuaah beiseina nung nei tur kan nih zia sawi kan tum dawn a ni.

Engvangin nge kan beidawn țhin?

Beiseina kan sawi rual in kan beidawn fo nachhan hi sawi ta ila. Kan beidawn țhinna chhan hi tam tak a awm ang. Kan eizawnna fuhloh vang te, kan hriselna țhat loh vang te, kan hna, nupui pasal, nulat tlangvalna sex, zirlai fail vang, ruihhlo, AIDS etc vang tein kan nun hi a beidawng țhin. Kan beidawnna chhan hrang hrang chu inang lo mahse kan beidawng țhin a. Beidawnnain a ken tel pawi em em chu-mahni intihhlumna hi a ni. Chu chu Setana duhzawng tihfamkimna, sawibuai tur awm hauh loa Hremhmun tlakna a ni. Beidawnna hi Setana'n Hremhmun a min hruailuhna kawng awlsam ber-mahni intihhlumna a ni ti ila kan sawi sual lo ang.

Beidawnna chu engtin nge kan hneh ang?

Kan nun beidawnna chhan chu chi hrang hrang a awm thu kan sawi tawh a. Min tibeidawngtu chu mimal tin ah a inang lo ang. Mahse a hneh theih dan kawng chiang em em pakhat -beidawnna hnehna kawng dik leh inghahna tlak chu Lal Isuaah a ni. Kristiante chu kan beiseina hi Pathianah a innghat tlat a. Chu kan beiseina chuan kan inchhirna te, kan beisei loh thil lo thleng te pawh a hmachhawn dan kan thiam phah țhin.

Beiseina neih tlat chu enge a țulna, a hlutna leh a țangkaina te eng nge?

Beiseina chuan kan rinna a tipung. Beiseina chu rinna chaw a ni a, chuti ang bawkin Rinna pawh beiseina chaw a ni. Hebrai lehkhathawn bung 11-ah chiang takin kan hmu a. Rinna tel loin beiseina sâng tak kan nei thei lo a. Beiseina tel lo rinna chu a kebai kan ti  thei ang. Ringtu țha ber ber te hi khawvel a beiseina nei sang ber ber te an ni. Chuvangin kan beiseina hi kan rinna nen a inzawm tlat a, KȚP/ȚKP/SAY/PYD etc member beidawng hma, beidawnna in a hneh fo țhin kan nih chuan kan rinna ah pawh kan chak lo tihna a ni. Chuvangin Lal Isua kan rinna, Pathian kan rinnaah pawh beiseina hi-a beidawnthlak lai ber pawhin kan nei tur a ni.

Beiseina chuan midangte tan beiseina a siamsak țhin

Beiseina hi darh zel thei a ni a, lungawi lo leh ngui taka kan awm changa midang kan tih ngui/nguai phah țhin ang bawkin, beiseina nung kan neih tlat hian midangah beiseina leh phurna a thlen ve thei a ni. Kristian chau tawhte kan tihphur mai bakah lungngaia kun reng te, phurrit tak phur mek te leh ring lo mite pawhin eng vanga beiseina nung nei tlat nge kan ni an hriat duh phah hial thei. Chuvangin Missionary te tan phei chuan beiseina neih a pawimawh hle ang

Tin, Kohhran Țhalai Hruaitu chin te phei chu kan member chau te tan pawh a beiseina pe tu tur kan nih avangin Beiseina hi kan neih a ngai a ni. Chu Lal Isuaa kan beiseina nung neih tlat atang chuan nun chau leh beidawng mekte chu Lal Isuaa Beiseina Nung nei turin kan hruai thei ang. 

Beiseina hi invenhimna a ni

Paula khan Beiseina kha invenhimna lukhum (helmet) angin a lo sawi  a, indona a tawp hma chu phelh loh turin. Kan rilru leh ngaihtuahna awmna kan lu (head) hmang hian Setana'n hna a thawk a, rinhlelhna leh beidawnna,  lungchhiatna leh rinhlelhnate etc a rawn tuh thin. Chuvang chuan kan rilru hi nitin in Beiseina -Pathian thu chu lu a khum tlatin beidawnna leh sualin min thlemna laka invenhimna atan kan hmang tur a ni. 

Beiseina hi tihdamna ani

Depression nei te tunlai ah an tam zia kan hria a. Heti ang Counseling kan pek a kan tum ber țhin chu beiseina pek hi a ni. Depression hi a awmzia ber chu beidawnna, beisei tur tlakchhamna a ni tih kan hria. Engmah hi a tha thei tawh dawn lo niin an ngai țhin. Chuvang chuan an hmalam hunah beisei tur a awm tih hi hriattir kan tum thin. Heng an harsatna tawh mekte hi sual chhuah dan  kawng a awm a, tih theih an nei tih hrattir hi kan tum tlat thin a nih kha. Chu beiseina chu mi tamtakin an dam pui a, chu beiseina hmang chuan kan țhalaipui nun beidawng te hi kan chhanchhuakin Lal Isua hnen ah kan hruai thlengtur a ni

Beiseina hi a taka tih chi a ni

Beiseina hi engmah ti loa thil ropui leh țha nghah chhuah tawp a ni lo. Beiseina chuan thiltih a keng tel a. Kohhran tana thil țha kan beisei chuan,  kohhran tan hna kan thawk țhin. Kan fa te, kan țhiante pianthar kan duh chuan,  Pathian thu kan hrilh țhin. Beiseina chuan thiltih a hring țhin.

Beiseina in min tithianghlim

Eng harsatna pawh he khawvelah tuar mah ila,  Pathian fa a vuah mai ni lo,  a fapa ang tak tak kan nih hun hi a la thleng dawn. Chu chu rintu hmasa leh Tirhkohte khan a tawp thlenga thianghlimna kawnga chhel taka an tawrh nachhan kha a ni. Chu vangin kan sualna leh kan tawrhna te chu beiseina chuan min ti thianghlim thei a ni. 

Beiseina chuan buaina karah pawh mi a ti nghet

Rom ho hun laia Kristiante bihrukna puk Catacombs-ah khan Lawng tihdinna-Thirchakai lem ziak 66 a awm an ti. Khang hunlai ringtute tihduhdahna boruak sosang tak karah khan Beiseina kha an Thirchakai, anmahni ti ding nghet tu a ni thin. Beiseina chu mitin a hmuh theih loh thilah min vuan tang țhin. Rinna thir hruiin  beiseina kan thlak a,  Pathian thutiam lungpui nghet ah min ham tang thin a ni.

Beiseina chuan tun hun ah hian kan tha a ti tho a, kan naktuk-chatuan ram chu eng taka min hmuhtir a vangin. Beiseina chuan thim ata eng min pe a.  Thil hrehawm leh hun thim a awm lo tia min hrilh loin,  chung hunah chuan eng a awm tih leh, thim tawpah khawvar a awm tih min hrilh zawk țhin. 

Beiseina pawimawh zia leh ringtute tan a kan neih tur a nih zia hi kan sawi uar tawk zo lo ang. Heng kan point tarlan ațang khian Beiseina hlut zia leh kan rinna kawngah pawh kan mamawh tak a nih zia kan hre awm e. Chuvangin Lal Isua ringtute hian harstatna leh beidawnna, thihna karah pawh Beiseina Nung-Lal Isuaah i nei tlat ang u. Chu chu Vanrama kan thlenna tur kawnga min tanpui tu hlu tak a ni si a.