Pathian leh Laws of Thermodynamics: Mechanical Engineer thlirna lam aṭangin -II - Rinfela Zadeng (Vawiin Vanglaini 18th November 2024)

A hmasa a mi kha han chhunzawm leh ta ila - 

Thermodynamics Pricple hmanga Engineer te thil entir leh an hmuh dan

Evolutionist ṭhenkhat chuan he dan (law) hian Pathianin universe hi a siam tih lam a kawk lo a, a sawi tum loh zawk lamah Creationists ho hian an kuai lut lui mai a ni an ti a. Mark Isaak, Index to Creationist Claims tih editor chuan Creationists ho chu Second law of Thermodynamics dik lo taka hrilhfiahah a puh hial. An puhna chu a dik thei reng em? Laws of thermodynamics chuan eng nge a huang chin ni reng reng? Creationists te chuan dik lo takin an lo hrilhfiah reng em ni? 

Mechanical engineer ten he 'Laws of thermodynamics' te hi eng angin nge an hman ṭangkai tih aṭang hian heng zawhna te hi chhan tum ta ila. Tunah chuan heng law te hi thudik awmsa ang maia pawm a ni tawh reng bawk nen, science zirna huang pawhin pawh heng law te zirchianna aiin heng law te hman ṭangkaina lam hlir a hawi tawh a. Chungte avang chuan Creationists ten heng te hi dik lo taka sawifiahin, a huang lo pui sawifiahnan an lo hmang reng em tih entirnan pawh engineering huang chhunga an hman dan a\angin ngeiin kan zirchiang dawn a ni.

Entirna 1 - na: Kum zabi 20-na a he thermodynamics hmanna lawm hlawh ber pakhat chu air-conditioning system atana hmanna hi a ni. Khawvel lum zelah pindan chhung atanga boruak lum paih chhuak a, boruak vawng dai turin he khawl hi a ṭangkai hle. He khawl hi Second Law of Thermodynamics a innghat tlat, vapor-compression refrigeration cycle an tih mai chu a hmang a. He cycle-ah hian thil tuiril, “refrigerant” an tih mai - hu sa tak chu pipe kaltlangin compressor-ah an kaltir a, compressor chuan pressure na tak hnuaiah gas sa lehzualah a lo chantir a. Tichuan, chu gas chu pipe kual ‘condenser’ an tihah kal lehin chumi a paltlang lai chuan a satna/lumna chu tihdaih hret hret a ni a, tichuan gas sa taka lo kal kha a lo daih deuh chuan tuirilah a lo chang ta a. Tichuan chu refrigerant, tuirila lo chang ta chu a 'expansion valve'- ah kaltlang tirin, tuiril leh a hu inpawlhah, a aia temperature hniam zawkah a lo tla leh a. 

Thermodynamics principle pakhatah chuan, lumna reng reng hi a temperature sang zawk aṭangin temperature hniam zawkah a kal ṭhin a ni, tiin an sawifiah a. Chu chu he cycle tawp berah pawh hian hman ṭangkai a ni. Refrigerant pipe-a lo kal zel, a temperature pawh tihhniam deuh tawh chu 'expansion valve' aṭanga lo chhuakin evaporator an tih mai lumna lo pawm khawm tuah chuan a han kaltlang leh a. Refrigerant chu chung lumna avang chuan a temperature a lo sang ve leh a, a tira hu sa ang bawk khan lo awm lehin cycle thar a tan leh ṭhin. 

Boruak vawt pe chhuak tur hian compressor khawl hman a lo ngai a, chu compressor khawl hmanga pressure a mamawh tawk chiaha refrigerant compress tur chuan energy engemaw zat a lo ngai leh a. Engineer te chuan chung chu ngun taka chhutin, Second Law of thermodynamics hmang ṭangkaiin, air condition khawl energy heh lo thei ang ber, thawk ṭha si siam chhuah an tum ṭhin ta a. Amaherawhchu, compressor khawl hmang tura a energy mamawh zat hi room aṭanga lumna a lakchhuah aia tam fe a lo ni a, energy eng emawzat chu a ral tho tho mai.

Energy hman theih te hi zawi zawiin kan hmang ral zel a. Engineer te thiamna sang tak tak hian energy loss awm lo thei ang tur berin khawl han duang ṭhin mahse, zawi zawia energy kan hman ral erawh Second Law of thermodynamics-in a sawi angin, dan rual loh a ni. 

Entirna 2 - na : Second Law of thermodynamics hmanna lar leh tak pakhat chu computer - ah a ni. Computer hian a chhungah microchips tamtak a nei a. First Law-in a sawifiah angin computer khawlin hna an thawh khan energy- a awmphung pakhat aṭanga awmphung dangah a lo chang a, chumi kawngah chuan energy ṭhenkhat chu lumnaah a chang a, chuvang chuan a khawl te tak te te khan lumna sa tham tak a pe chhuak thei ta a. A hma lama sawi lan tawh ang khan, computer-in hna a thawh hmaa energy chu hna a thawh hnua energy awm zat nen a inang reng tur a ni a. Computer khan hna a thawh chak pauh leh lumna a pek chhuah a tam ve zel a, computer chhunga a part te tak te te kha inhnaih tak taka vuah khawm an nih avangin pawi thamin a lo sa thuai ṭhin a. Chuvang chuan, lumna lo insiam apiang chu paih chhuah zel dan ngaihtuah a ngai ta a. Computer tê zawk leh ken vel nuam zawk siam zel an duh si a, chutih rualin, computer an siam thar te chu hnathawk chak thei zawka siam an lo duh zel bawk si a, a part te intichhetawn lo tura lumna lo insiam zel paih bo zel dan tur ngun takin an ngaihtuah a. Tichuan, Laws of thermodynamics hmang ṭangkai zelin, computer-in a power hman tur a lakluh zat leh lumna lo insiam chak zawng te ngun taka chhutin an thunun (control) thei ta a. Computer, ṭha leh chak, a sat lutuk avanga chhe lo tur siin an siam thiam zel ta a ni.

Entirna 3- na : A pathumnaah chuan, electric siam chhuah nana tuihu chakna hmang khawl hi a ni leh a - Vapor power plant an ti. Air condition khawl awm dan kan sawi tak ang deuh khan, vapour power plant pawh hian part chi li pawimawh tak tak a nei a. He khawlah hian tui chu a lumna khawlah an han kal tir a, a lumna khawl chuan tui chu lo ti soin tuihu a lo insiam a. Chu tuihu zam vel chakna chuan turbine ti virin chumi hmang chuan electric an lo siam chhuak ta a. Tuihu chu turbine a thlen khan a temperature lo hniam leh deuhin condenser a paltlang leh chuan tuihu lumna chu cold reservoir an tih lamah chuan a in 'pass' ve thung a, tuihu chu tuiah a lo chang let leh ta a. Chutiang cycle chu ti nawn zelin, electric siam chhuahna khawl ṭha tak an siam ṭhin a ni. 

Hetah pawh hian engineer-te chuan thermodynamics law an hriatchianna aṭanga ngun taka duangin, power tam zawk ti chhuak thei tur leh energy hman tlak loha kal ral tlem thei ang ber turin an ngaihtuah ṭhin a ni.

Engtin zel?

Ngun taka ngaihtuah chuan, thermodynamics law te hi engineer ten ṭangkai taka khawl siam nan an hmang ang tho hian creation/evolution inhnialna thu-ah pawh hian a ṭangkai a. Engineering lamah an innghahna lungphum ni hial khawpa a ṭangkai ang chiah khan thlarau lam thilah pawh Pathian awmzia finfiahna ṭanchhan ṭha tak a pek avangin lungphum nghet tak pakhat a ni. Chu chu engtinnge a nih theih?

Pathian hi awm lo ta se, universe lo awm dan hi Pathian lam ri hauh loa kan sawifiah a ngai ang. Universe lo awm dan sawifiahna lar tak pakhat, Big Bang Theory chuan universe chhunga thil awm tinreng hi a tirah chuan chhun han (dot) te tak te ang mai a tein a inhlawm khawm vek a ni a ti a. Mahse he theory hian chu dot te takte ang maia inhlawmkhawm, thil sakhat, muk tak mai chu khawi aṭanga lo awm nge a ni tih a sawifiah thei chuang reng reng lo. A lo awm theih dan ni thei ber chu – a lo awm ve tawp emaw, chatuan ata awm sa reng emaw siam chawp emaw, a khawi emaw ber hi a ni ang. 

Universe hi a lo awm ve tawp em ni ang?

 

Universe kan tih chuan a chhunga thil awm tinreng, tha chakna energy awm zawng zawng te nen a zavaiin kan sawina a ni ang a. Pathian reng awm lo anga sawifiah kan tum anih chuan he Universe hi pawn lam aṭanga pawlh buaitu tur awm lo, lut chhuak leh tur chuang awm lo, closed system ang a lo ni ang. 

The First Law of Thermodynamics-in a sawi dan chuan closed system chhungah chuan energy awm zat kha danglam loin a ngai reng a, amaherawhchu energy awm dan phung pakhat aṭangin awm dan phung dangah a inlet thei thung. Universe chu pawn lam aṭanga lut chhuak leh chuang tur awm lo, closed system anih avangin ama chhunga energy emaw mass emaw matter emaw awm zawng zawng chu lo awm ve tawp ni dawn ta se, chutianga energy lo insiam ve tawp chu First law-in a thil awmdan a sawi nen inkalh, thil ni thei lo a ni dawn a. 

Khawlah a power lakluh aiin a heat a siamchhuah leh a hnathawh belhkhawm a tam zawk ti tlat ila, thil theih loh a ni ang chiahin Universe chungchanga kan sawi pawh hi thil theih loh a ni. Sawi tak ang khan science huang chhungah ‘law’ a pawm chin tawh chuan hemi case bikah chuan a thawk (work) ve lo a tih emaw  huam ve loh emaw (exceptional case) a nei ngai lo. Chutianga valid lohna case a nei a nih chuan law a ni thei lo zawk ang. Laws of thermodynamics te hi ‘law’ an ni a, valid loh bikna case ang kha a awm lo. 

Chutiang anih avang chuan energy chu a lo awm belh tawp thei lo a, paihbo ngawt theih a ni lo bawk tih anih miau avangin, Universe chhunga mass/matter/energy te chu lo sawm ve tawp an ni thei lo. Universe hi a lo awm ve tawp a ni tih ngaihdan chu khawl power engmah pek si loh, hna thawk thei bawk si a awm thei tihna ang vel a ni ang a, thil awm thei lo a ni. 

Universe hi pawn lam aṭanga lo awmtirtu engemaw tal awm lo chuan a lo awm ngawt thei lo. Ama huam chhung chin pawn lam aṭangin lo awmtirtu a awm ngei ang a, chu chu Bible-in Pathian a tih hi a ni ngei bawk ang. Mak tak maiin, he ngaihdan hi thudik awmsa pawmawm tak ni mai awma a lan laiin awih lo tu tamtak, universe hi amahin a lo awm ve tawp ani tih ringtu an tam hle a nih hi. Engpawhnise, sawi tak ang khan First law of thermodynamics hi a lo dik leh lo a ni tih an finfiah te a nih ngawt loh chuan universe hi a lo awm tawp thei lo tih hi science thlirna aṭang pawha ṭan hmun nghet tak a ni. 

Universe hi chatuan ata awm sa tawh reng a ni

Second law of thermodynamics chuan thil dang nena inpawh thei loa dah hran closed system engah pawh a chhunga tha chakna energy awm zat chu a ngai reng a, chu energy chu energy awm phung hman ṭangkai theih loh zawkah a chang kual ve zel a, chu a chan dan process chu a let zawngin a kal thei der si lo, tiin a sawfiah a. Universe pawh hi closed system ang chu a ni a, a chhunga energy awm zat hi a ngai reng. Chumi awmze dang lehah chuan energy awm zat bithliah neiin a awm tihna a nih chu. Chu aia hriatthiam awlsamin - energy zo thei a nei tihna. Chu energy chu kawng hrang hrang hmanga energy hman ṭangkai nawn theih loh zawnga chantir a nih zel si avangin engineer-te pawhin an thiamna hmangin energy renchem dan an zawng ngat ngat a, mahse energy hman ṭangkai theih a kiam zel mai chu tihtawp theih a ni si lo.

He universe hi chatuan ata awm reng mai tawh ni ta se la, a energy neih te chu hman tlak lohah a chang vek tawh ngei ang. Mahse tunah a kiam mek kan ti chungin energy hman theih erawh ala awm tho si. Anih chuan Universe chu engtik hunlai emaw aṭanga lo awm ṭana, a energy te pawh chu a awm ṭan hun aṭanga tun hun thlenga energy awm dan phung pakhat a\anga a danga chang kual zel a, hman theih lo kiam ta tial tial, a tawp erawh la thleng si lo, a nih hmel ta ber mai. Awm ṭan hun chu a nei phawt mai! 

Dr. Jastrow chuan a lehkhabu 'God and the Astronomers' tihah khan heti hian pawmawm takin a ziak a, “Heng finfiahna ṭhuang thum - galaxy te chet vel dan te, laws of thermodynamics te, arsi te awm dan phung - te hian thil kawng khat chauh a awm tih an lantir; chu chu Universe hian awm \an hun a nei a ni tih hi." 

Pumpelh theih loh chhanna chu

Universe a lo awm dan sawifiah theih dan kawng thum chauh a awm - a lo awm ve tawp, chatuan ata awm sa reng a ni, emaw, siam chawp emaw a ni. Atheist te chuan theory of evolution hmangin universe lo pianchhuah dan leh tuna a awm dan te sawifiah an tum a. He theory hi pawm dawn ni ta ila, a tira universe siamtu thilte chu engmah lo ata an lo chhuak ve tawp emaw, chatuan ata awm sa ve reng an ni tih emaw, a khawi emaw zawk zawk hi kan pawm a ngai tihna a ni ang. Siamtu awm theih dan ngaihdan an hnawl miau avangin, heng te bak hi universe lo awm ṭan dan sawifiahna dang an tan a awm thei lo.

Amaherawhchu, Laws of thermodynamics hian, chutianga lo awm ve tawp emaw, chatuan ata awm sa ve reng tih lam emaw chu science lam thlirna aṭangin thil ni thei lo leh awihawm loh a ni tih a rawn finfiah ve leh tlat si. Chuti a nih chuan universe lo pian dan sawifiah nan duhthlan tur pakhat chauh a awm ta, chu chu - Universe hi Siamtuin a siam ngei a ni.

Evolutionists ho chuan Science leh Pathian hriatna hi thil kalkawp thei a ni lo e, a khawi emaw zawk hi a dik ang a. Pathian a awm a ni tih hi finfiah theih a ni lo reng bawk e, an ti a. Mahse science huang chhunga an principle rintlak ber zinga mi laws of thermodynamics chuan universe hi tu emawin thiam taka a duan a ni e tih lantirin siamtu lam a kawk tlat mai si. 

Thermodynamic principles te hi Pathian a awm ngei a ni tih rinna nen a inhne rem thlap mai a. Pathianin ni sarih nîah chuan a thilsiam chu a ti zo va, ni sarih nîah chuan a thilsiam zawng zawng chu a chawlhsan ta a.” Ni ruk hnuah khan Pathianin a thilsiam a chawlhsan, chumi awmzia chu thil reng reng, tha chakna energy te pawh telin - a siam kha a titawp a ni.

Father of Thermodynamics an tih mai Lord Kelvin-a thusawi hi a dik hmel hle. Ani chuan, “Evolutionists te hian an ngaihtuah chiang tawk lo a ni. Sam ziaktuin, “Mi a chuan a rilruin, ’Pathian reng a awm lo’ a ti a” tih a lo ziak hi a awm reng a lo ni e,” a ti hial. Thilsiamte leh an awmphung te hian Pathian awmzia an lantir a, chu chu ṭhenkhat ten an hmu thiam lo a, tan chhan tur an dap khawm mai pawh a ni e!