Isua Krista zirtirna hi mi fing leh lehkhathiamte chuan philosophy huang aṭangin an thlir ngai mang lo a, a chhan chu Isua zirtirna hi sakhuana leh thuthlung huanga tlaa an dah vang a ni deuh ber. Philosophy hi zirna huangah hian ngaihruat fuh tawk loh a ni fo a, hmuh leh khawih theih thil ngaihruatna chauh anga lantir a ni fo a ni. Isua Krista zirtirna ṭhenkhat chu philosophy huang aṭanga hriatthiam theih leh hriatthiam tur a ni tih tun ṭumah hian kan sawi dawn a. Chutihlai chuan Isua thawh leh hnu lam erawh rinna thil takmeuh a nih avangin tarlan tel a ni lo thung a. Isua zirtirnaa philosophy hi khawtlang huap zirtirna te, hruaitute tana finna te, remna leh muanna huang te, thutlukna inkawlkalh chungchang te, nunphung dik leh duhawm chungchangte leh dan lam thu te a ni.
A khuhhawnna
Isua Krista zirtirna mak leh danglam tak hian engtin emaw tak mihring hi a kaitho a. Khawvel mihring zawng zawng, hnam leh chi tinte thinlung a chawk tho a. Heng zirtirnate hi sakhuana huangah chuan thinlungah fiah takin a lang a, ngaihtuahna her vel lo ṭhang chho zelah pawh Isua zirtirna hi a lo changkangin, hmahruaitu a lo ni zel mai tih hi a lang chhuak zela. Thianghlimna, thuneihna, rinna leh chatuan mi nihna thilahte hian Krista chu zir leh belhchian dawl tak a nihzia hi Kristianna huang chhungah chuan finfiahna chiang tak a awm a. Chutih lai chuan zau zawka zir a nih hnuah pawh Isua Krista zirtirna hian khawvel thila finthuril huangah pawh behchhan leh innghahna tlak a nihzia chu a langsar zual zel a. Khawvel finthuril zirna huanga hriatna ril zawk leh ruahṭham loh hriatna lamah pawh Isua Krista zirtirna hi bih chian dawl tak a ni tih hi sawi ngam a ni.
Thlirna dang lehah chuan, Isua Krista mimal nuna thu dik pahnih hi fiah takin a sawi theih a. A hmasa zawkah chuan - Krista, mihringa hi khawvel hun hmasa lama mihring awm ngei, Juda mi, ke-a kala Galilee, Palestine leh Nazareth-ah te pawh thu lo sawi tawh a ni a. A dawt lehah chuan tho leh Isua Krista, rinna thil, Kristian sakhaw innghahna bul a ni bawk a ni. A thawh leh hma mihring, mihring dam lai, Pontia Pilata hmaa rorelsak tura dinga chungchang kha kan sawi tum ber chu a ni zawk a. Tirkoh Paula chuan Kolossa mite hnena a lehkha thawnah, 'Fimkhur rawh u, chuti lo chuan tu pawhin Krista thu ang ni lovin, mihring thurochhiah leh khawvel A Aw B ang zawkin, an thufing leh bumna mai maiin rallakin an la dah ang che u...' (Kolossa 2:8) ti-a a lo sawi kha he thuziak behchhan chu a ni.
Paul-a thuhril zingah helai chang hi ngaih sual awl tak, khawvel finthuril ngaih sualna ang leh inbumna anga chhuauhna tih theih a ni a. He chang hian khawvel finthurilin mihringte leh khawtlang nuna inpekna leh insiamṭhatna lam hawia hnuhma a neihte chu na takin a rawn sawisel a ni. Paul-a thukhawchang hian Isua Krista chu mi thiam leh fing a nihzia a puang chhuak a. Isua Krista zirtirna chu thinlunga ngaihthuahna kaithotu, a ṭha lam hawi leh nunphung dik kawhhmuhtu a ni.
Zawhna awmtheite chu - Isua Krista kha mi thiam dik tak a ni em? Eng ang mi thiam leh mi fing nge a nih? A finthuril zirtirnate chu mi fing leh mi thiam dangin an zirtirna nen engtia hmeh bel tur nge? A finthuril zirtirnate chu tunlai finthuril zirna huanga kan thu chaite zinga awmze nei tham a ni reng em? tih te pawh a ni awm e.
Finthuril zawhna thuk leh thlirzaunaah hian inhnialna, chik taka bihna, kalphung duan leh thupui bera neih kher a ṭul lo tih kan hriat hi thil pawimawh tak a ni tel a. Chunglam aṭanga pawlna leh sakhuana te, thuneihna leh thluthlung hrilhfiahna khunkhan te pawh paih kher a ngai lem lo. Hriatna lama min hnuk hnaitu, awmze neia inbiakna leh finna leh thiamna puanchhuahna lam a ni tur a ni zawk a. Kreeft chuan, “Isua chu mi fing a ni a. A finthurilte chu hnialhratna ngawt ni loin innghahchhan bulfuk tak nei leh rintlak a ni,' tiin a lo sawi a ni.
Mi fing Isua Krista nihphung danglam
Mi ṭhenkhat chuan he thuziak hi Isua Krista chu mi thiam a nihna lantir ngawr ngawr tumna angin kan ngai maithei. A chhan chu Isua Krista finthuril zirtirnate hi kum sang tam tak liamta aṭanga thiamna inhlan chhawn zel huanga a lo lan fo vang a ni pakhat a. Isua thukawchang eng emaw zat hi chu philosophy huangah, a bik takin mi thiamten an thiamna tichiang tura thuziak an chhawp chhuahah tarlan fo a ni a. Chu chu finthuril zirna hmun hrang hranga sem darh leh zirtir a ni ṭhin tih hi thil chiang tak a ni a. A lehkhabu, 'Outlines of Oriental Philosophy’-ah chuan Edet Mesembe chuan mi thiam ṭhenkhatte chuan mi dangte ngaihtuahnaa hriatna zau zawk pek kawngah an thawh hlawk hle a ni a ti a. Scholar lar tak Brutt pawhin, “Finthuril tum ber chu mihring nunphungin a zawh sa kawng tho kha a ni a, chu mihring duhthusam tihpuitlinna hmanruaah chuan philosophy chu hman a ni ta a ni,” a lo ti bawk a ni.
Brutt-a thusawi thlawpin Alozie pawhin, “Philosophy chu tawnhriat finna, buaina tireh tura khunkhan taka zirna leh a kawng zawhna a ni,” a ti a. Kwesi Wiredu pawhin, “Philosophy chu khawi hmunah pawh hriatna leh finna neitu fiahna leh mihring nunphung ṭha lantirna,” niin a sawi bawk a. Olapido pawhin philosophy chu “Mihring nunhona ṭha zawk nei tura thlirna leh inpekna” niin a sawi bawk a. A ngaihdan chuan mi fingte chu 'Mihring nuna chona leh harsatna hrang hrang hmachhawn thiam tura mite finchhuah an nih theih nana mihring dinhmun hriatthiamna ril zawk pho chhuak tura beisei' an ni a. Chukwu Okolo pawhin mihring nihna thu-a buaina leh harsatna te, mimal harsatna leh khawtlanga kan nunhonaa buaina hrang hrang tireh turin philosophy chuan mihringte chu an tawnhriat thilte aṭangin finna a pek belh ti zawngin a hrilhfiah thung.
Paul Tillich chuan philosophy chu - mihring lo awm chhan dik tak chungchanga zawhna tlanglawn chhan tumna a nih rualin, thil nihna dik tak aia nihna dik tak chu eng nge ni tih zirna, kawng hrang hranga awmze nei zawk' niin a hrilhfiah ve thung a. He ngaihdan hian zawhna tlanglawn chhanna kawng zawhin, thil nihna dik tak chungchanga chhanna hrang hrang a chhui kual a ni.
Heng mi fingte finthuril hran hrang hian Isua Krista chu mi fing a ni takzet em? tih leh, a zirtirnate chu finthurilah puan theih a ni em? tih zawhna chu a rawn piantir ta a. Heng zawhna chhanna hrang hrangte hi kan thupui hian a hrilfiahna rawn tarlang ta a. Finthuril duan chhuahna, a bik takin nunkawng finthuril lamah phei chuan mi fingte chuan Isua Krista chu mi fingah an pawm ta a. Dallas Willard chuan Isua Krista zirtirna chungchang chu, “Isua ropuina hian finrilna thinlung a tilang a, chutiang tur chuan thiamna bik neih a ngai a, mimal nuna thu dik hlutna leh kalphung dik zawh tura inpekna a ni,” tiin a ngaihdan a sawi a. “Isua chuan a thusawi ngaithlatute chu hriatthiamtir a tum ber a. A thusawi reng reng chu hriat tumte tana hriatthiam theih tur ngeiin a sawi a. An thu hriat tharah chuan an duh emaw duh lo emaw, a khaikhawmna hmuh theihin a tarlang zel a ni,” a ti bawk.
Hlawh neia finna thu zirtirtute ang maia thu sawia hmun hrang hrang a fan kual lai khan Isua Krista khan Juda-te leh Pharisai-ten a hnena thu an thlen zawng zawng kha a ngai thutak vek lo a. Uluk taka ngaihtuahin a lo thlifim a, chu chu Juda hruaitu mi fingte chuan an ngaithei lo hle a. Bible a behchhan tih lohah chuan ngun taka ngaihtuahin a chhanna a pe chauh ṭhin a. Chutiang chu thawnthu fing hmanga puanchhuah a ni a, ngaihtuah ngun ngai em em a ni.
Baldet chuan - mipa naupang vannei deuh, a fing fal zuala ngaihte chu zirtirna bik dawng tura dah hran an ni a. Chutah chuan Juda sakhaw lehkhabu 'Torah' awmze ril zawk zirtir an ni a. Isua pawh khan an unaua upa ber a nih chuan Juda sakhaw zirtirna ṭha bik hi a dawng maithei a, Hebrai ṭawng chhiar pawh a zir maithei - a ti a. Hemi tichiang tur hian Bible-a thuchang hrang hrang Isua’n a sawi chhuahte chu a behchhan a. Pharisaite leh Jerusalem Temple-a lehkhaziaktute meuh pawh hnialpui ngam khawp a nihna te chu a rawn la chhuak a ni.
Heng Baldet-a thusawite hi Chanchin |ha Luka ziak 2:46- 47 te hian a tichiang ni a ngaih a ni. Mahse, Chanchin |ha Johana ziak 7:15 a Judate’n Isua chu zirna nei si loa chutiang thu a hria chu mak an tih thu tarlan a nih avangin Isua chuan zirna mumal a nei lo tih a tichiang ni - a ngaih a ni thung.
Isua Krista zawhna leh chhanna
Mi dangte nena sawihona leh inhnialna a\anga thu dik zawn chhuah leh puan chhuah hi hmanlai Grik mi fingte hmanraw pawimawh tak a ni a. Philosopher ropuite chuan an hriatna leh finna pho chhuak turin an bula mite nena sawihona leh zawhna leh chhanna hman an ching hle. Chutiang chu hmanlai Greek mi fing Socrates, Plato leh Aristotle-te sulhnuah pawh hmuh tur tam tak a awm a. Isua Krista dam lai chanchin ziahna, Chanchin Ṭha bu 4-ah te hian hetianga mite hnena zawhna leh chhanna - dialectical method - hmanga zirtirna hrang hrang Isua’n a pek hi hmuh tur a tam hle a. Man a nih a, a laka thubuai an siam avanga Puithiam lal leh Pilata ten an dawpna te pawh kha dialectical method huanga awm vek a ni a. Hengah te hian Isua Krista finna leh hriatna ropuizia chiang taka tarlan a ni zel bawk a ni.
Virtue Ethics and Ethics
Philospher ropuia sawi - Socrates, Plato leh Aristotle-te bakah Confucius-te fin thuril zirtirnaa langsar tak chu mihring nun chhungril finna leh ṭhatna - Virtue ethics hi a ni a. Virtue Ethics huangah chuan mihring nun chhungril ṭhatna mai bakah hlimna chu laimua hmangin, thupui hrang hrang - ngilneihna, nungchang ṭhatna, midangte zahna leh duhsakna, inpekna leh felna te chu teh a ni a. Chumi huang a\anga teh pawhin Isua Krista finthuril innghahna zingah hian Ethics leh Virtue Ethics hi a langsar ber zinga mi a nihzia hi phat rual a ni lo a. Isua zirtirnaah hian mihring rilru chhungril ṭhatna a ngaihpawimawhzia hmun tam takah hmuh theih a ni.
Ethics huang bika Isua zirtirnaah hian mahni inphata midangte tana inpekna chungchang – altruism - hian hmun a luah lian hle a. Hei hi philosophy huanga thu pawimawh tak, Lao tzu-a zirtirna, 'Tao Te'ching' ah pawh kan hmuh a ni a. Lao tzu-a philosophy-ah chuan 'Van leh khawvel a awm reng nachhan pawh hi anmahni chauh inngaihtuah loa thilsiam zawng zawng ,hatna an ngaihtuah vang a ni. Mahni chauh inngaihtuah loa an bula awm zawng zawng ṭhatna leh hmachhawnna dah pawimawhtute chuan an daih rei ṭhin,' tih a ni.
Isua zirtirnaah chuan midangte tih a ni satliah lo a, hmelmate thlenga hmangaih a, min hawtute pawh malsawmsak tur tih a ni. Samari mi ṭha tehkhin thute pawh hemi huanga mi a ni a, Isua zirtirna laipui a ni.
Social Philosophy leh Leadership Philosophy
Khawtlang nuna finthuril (Social philosophy) huanga Isua zirtirna pawh hian belh chian a dawl hle. A hun laia Juda khawtlang nun inkhaichhawndiat ṭhiata hotu leh hruaitu nih duh chu chhiahhlawh, mi dangte rawng bawlsaktu nih a ngaih thu a zirtir a. Amah ngeiin a zirtirte ke a silsak. Social philosophy leh leadership philosophy chungchanga Isua zirtirna hian mihring thinlunga chapona awm, mihringa ṭhatna leh hriatna dik hliah fotu chu a rawn ṭhiat chiang hle a ni.
Remna leh muanna
Isua hun laia Rome hovin Juda-te laka chhiah an lak thin dan leh Isuan chhiah pek dan tur chungchanga a zirtirna hian philospher dik tak a nihna a tarlang chiang hle a. Rome hoin Juda mipuite laka chhiah an lakna tura Juda mi an hman (Sanhedrin, Pharisai, lehkhaziaktute leh chhiah khawntute) te leh mipuite inkara inhriatthiam lohna awm chungchanga Isua zirtirna (Mathaia 18:15-17) hian tharum hmang lova buaina chinfel dan tur a sawi chiang hle a ni.
Tlang chunga Thusawi - hian Isua philosophy-a remna nei tura tharum tel loa buaina chinfel dan tura a zirtirna a tifiah hle a. He a zirtirna hian tunhmaa an lo inzirtir dan - Ha aiah ha, mit aiah mit - tih chu paihthlain, biang lehlama bengtu laka biang lehlam dawh tura zirtirnate hian hmangaihna hmanga hnehna chan dan chu fing takin a zirtir a. Tun hnu thlenga khawvel hriata philospher leh scholar-te pawhin zau zawka an hrilhfiah tak zel a ni a. India hnam pa - Mahatma Gandhi pawhin Isua zirtirna hmang hian kum 300 chuang awptu British chakna chu a hneh thei a ni.
Hetiang taka zirtirtu ropui leh mi fing a nih vangte pawh hi a ni ang e – vawiin thlengin Science thiamna leh philosophy hmangte hian Isua Krista chanchin leh a zirtirna te hi nuaibo tumin nasa takin ṭan la ṭhin mahse a la hlawhtling tak tak thei lo a nih hi. Thil chiang lo leh a taka hmuh tur awm lo – rinna chauha innghat – tiin Sakhuana hi um bo tumin ṭan la ṭhin mahila, nghet takin mihring thinlungah hian zung a kaih tlat a nih hi.
 |
| Vanglaini |
Thawnthu phuahchawp leh innghahna nei lo, thu puarpawleng mai maiah kan rinna hi a innghat lo a. Chatuana thu nung Isua Krista zirtirnaa innghat kan ni a, chu chu a nungin chatuan a daih dawn a ni.
Comments
Post a Comment