Senate of Serampore College (University) hnuaia Pathian thu zirna - Bachelor of Divinity - ah hian Eco Theology/Eco Justice hi a awm a. Hei hi vawiin khawvela thilpawimawh leh kan mamawh, a taka kan hman nghal tur leh Pathian thu kan awihna kawnga pen khata hma kan sawnna tur a ni bawk.
Theology kan hriatsa
Pathian thu -Traditional Christian theology kan hriat ṭhan em em chu mihring lam hawi (anthropocentric) vek a ni a, leilung (environment) leh mihring lei leilung inkhungkaihna (ecology) emaw pawimawhna leh humhalh a ṭulna emaw hi a huapzo lo hle a nih kha. Mihring nun leh hamṭhatna lam an ngaihtuah nasain thil siam dangte chhandamna leh humhalh a ṭulna an ngaihthah thung.
Eco theology
Ecotheology kan tih chu nunna leh boruak zir chianna (ecology), Pathian leh rinna, theology zirna nen a thlunzawm a ni. Pathian-Leilung -Mihring inzawmna hi a ni tiin kan sawi thei ang a; Pathianin duh taka a siam kan chenna khawvel hi humhalh turin mihringte hi mawhphurhna min pe a ni tih Bible aṭanga kan hmuh te zirna hi a ni tiin kan sawifiah thei ang.
Eco-theology leh Leilung chunga mihring mawhphurhna - ethics
Eco-theology bul ṭanna chu Genesis-a thilsiam chanchin aṭang hian kan hmu thei a. Mihring leh leilung inkarah hian inzawmna nghet tak a awm a, a chhan chu mihring hmasaber ‘Adama tih hming hi Hebrai ṭawng ‘Adamah’ tih aṭanga lak a ni a. 'Adamah' awmzia 'lei/ground' tihna niin Pathianin vaivut aṭangin mihring a siam a nih kha. Chuvangin, a tir aṭangin leilung leh thil siam dangte nen hian inṭhen thei kan ni lo nghal tihna a nih chu(Gen. 3:19).
Pathianin ni ruknaah mihring a siam chhan chu mihring hi leilungah a innghat dawn a, a rilṭam huna a eitur te chu leilunga awm te a nih vang a ni ang. Kaina leh Abela, Lota leh Abrahama, Esauva leh Jakoba, adt te pawh kha an eizawnna atan thil siamah an innghat nasa hle a ni. Tuilêt hnuah Pathianin Nova nen thuthlung a siam a, chumi hmang chuan Nova chu Bible-a Ecologist hmasa ber anga ngaih theih a ni a, a chhan chu Pathianin amah leh a thilsiam dangte nena thuthlung a siam vang a ni.
Theology huangah Leilung humhalh zirna
American Historian Lynn Townsend White chuan leilung humhalh ṭulna tarmit (ecological perspective) aṭanga Kristian theology sawiselna tur article “The Historical Roots of Our Ecological Crisis” tih chu kum 1967 khan a tichhuak a. Judeo-Christian theology chu a bul berah chuan thilsiam khawvel a hmang ṭangkai a; a chhan chu mihringin thilsiam chunga thuneihna a neih thu a nemnghet a, chuvangin anthropocentrism (lei leh vân hi mihring tân liau liauva siam a ni) tih chu a chawisang a ni tiin a sawi. He thuziak hian theology leh tunlai leilung chhiatna (ecological crisis) inzawmna chungchangah inhnialna a lo hring chhuak a.
Kristian theology-a hrilhfiahna hrang hrang bakah khawvel lum zel avanga khuarel chhiatna (nature disaster) nasa tak chuan Kristian theologian-te chu Kristian sakhaw hlutna bulpui (core value) chhui nawn leh turin a fuih a. Chu chuan Kristian theology-ah hian Eco-theology kan tih mai theih tur hmelhmang thar a lo chhuak ta a ni. Chutiang chuan Eco-theology lo piang chhuak chuan sakhua leh thilsiam inzawmna chu a ngaihtuah ber a, a bik takin boruak ngaihtuahna aṭangin a ngaihtuah a ni.
Bible-a mihring chauh chhandamna leh tlanna thupui chauh hi ngaihtuah loin thilsiam dang chunga thlirna zau zawk nei tura kotu theology a ni.
Thuthlung Thar lam aṭangin
Chanchin |ha Marka ziakah hian Isua chu thlalerah a awm a, ni sawmli chaw nghei hnuah ramsate nen an inṭhianṭha kan hmu a. Isua hi ramsa zinga cheng Adama pahnihna anga ngaih a ni (Mark. 1:13). Chanchin Ṭha Matthaia buah hian, “Mi thuhnuairawlhte chu an eng a thawl e, Leilung hi an luah khat dawn si a" (Mat. 5:5) tih thu kan hmu a. He tah hian a ziaktu hian 'ecological image' tam tak a ziak a.
Matthaia 9:37 -ah, "Buh seng tur a tam hle si a, nimahsela a thawktute an tlem" tih Isua'n a sawi hian chutih hun laia thilsiam mawi tak takte chu a tarlang a ni.
Paula lehkha thawnah hian 'ecological concept' eng emaw zat kan hmu thei a. A hrilhfiahnate chu Ecological a ni. Israel hmasate baptisma a hrilhfiah lai hian Ecological baptisma chi khat a nih thu a sawi. Kristaah chuan thilsiamte chu zalenin a awm. Isua thawhlehna hi Pathianin mihring zawng zawng nena a inzawmna leh khawvel pum pui siam thar lehna kawngah a pawimawh ber a ni tih kan hmu bawk. Thilsiam zawng zawng hian Pathian nena an inzawmna leh tholeh Kristaah an inzawmna an nei vek a. Paula chuan mawi takin, "Thil siam zawng zawngte ngei pawh chu chhiatna bawih ata tihchhuahin an awm ang a, Pathian fate zalenna ropuiah chuan an lut dawn si a" tiin Rom 8:21 -ah a sawi a nih kha.
Mizoramin kan mamawh
Ruah a sur tam deuh apianga Mizoramin chhiat kan tawk ta fo te, a bikin Aizawl khawpuia kan harstana tawh tam tak te hi ngun taka kan en chuan Pathian thu kan awih famkim loh rah tiin kan sawi thei ang. Rem leh rem loin awih pangah in kan sa a, tuichhe paihna te kan siam uluk thei tawh lo a. A hmunin min daih lo a, awih pangah te in kan sa a, a tawt chung chunga khawpuia awm kan tumna rah hi ruah a sur apiangin a ṭha lo zawngin kan têl chho zel ang tih a hlauhawm hle.
Kan lui tui te, kan leilung te hi kan hlawkna tur a nih chuan kan laiin kan tichhe hreh hauh lo a. Khampang leh leilung nghet tak awm mek te, thing leh mau te kan lai chhia a, in emaw dawr emaw petrol pump emaw te kan han siam/sa ngawt zel a. Chumi rah chhuah chu leimin, lui tui hnawk, tui in tur PHE aṭanga dawn mumal loh adt kha a ni ta zel mai a, kan la chim rup ang tih a hlauhawm hle!
Kham pang mawi tak te, lui tui te, leilung mawi tak te hi humhalh ila. Kan hmasawnna atan leh kan nawmsakna tur atana kan ram leilung, thing leh mau, lui tui kan suamsam vak vak te hi Pathian thu awih lohna ni tih hi i hre thar ila, i sim ang u. Rem lo chung chunga leilung laichhiaa in/dawr sak luih ṭalh te, kan leilungin min zo ṭha lo chunga khawpuia inhnawih luih tlat te hi sim ila.
 |
| Vanglaini |
Pathianin kan ram leilung min pek leh kan tui leh lui te mila damkhawchhuah tum hian Mizo Kristiante hi piangthar nawn ila. Tuna khuarel kan chhiatna tam tak - leimin, inchim, tui harsa, bawhhlawh paihna awm mumal lo lak aṭang te hian kan fimhlim \euh thei ang. Chuti loa kan leilung leh lui tui leh thing leh mau tichhe zawnga kan in bengbel lui zel a nih chuan chhiatna rapthlak zawk hi kan tawk ang tih a hlauhawm hle.
Comments
Post a Comment