Philosophy zirna huang pakhat – Fideism – ah chuan rinna – faith leh ngaihtuahna fim – reason – hi kalkawp thei miah loa ngaih a ni a. Chutih rual chuan Pathian thu thiam – theologian te zingah rinna leh ngaihtuahna fim kalkawp theihzia leh a ṭangkaina te sawi chhuaktu mi tam tak an awm a. Chung zingah chuan CS Lewis te, Augustine te, Thomas Aquinas te hi a langsar zual an ni awm e. Tin, Alvin Palntinga te pawh khan rinna leh ngaihtuahna fim kalkawp theih dan te pawh kha an lo chai viau tawh a nih kha.
Fideism zirtirna
Fideism chuan – Kan rinna – faith – hi Pathian a awm tih hriat chianna leh mimal inpekna aṭanga lo awm leh din a ni a. Chuvangin kan sakhaw rinna hi kan mita kan hmuh theih a ni lo a, mihring ngaihtuah thiam theih phak piah lam thil a ni. Chhandama kan awmnate hi mihring rilru ngaihtuahna – rational thinking – leh Science thiamna hmanga chhuichhuah rual a ni hek lo. Sualin mihring rilru leh ngaihtuahna hi a tibuai tawh a, chuvangin rintlak a ni tawh lo a. Bible-a kan hmuh thutak – truth – hi ring mai tur kan ni – tih lam hawiin a zirtir a ni.
Soren Kierkargaard
Danish Philospoher khan – rinna hi Pathian a awm tih hriatna leh mimal inpekna a nih avangin ngaihtuah – reason – nen hian an inhmu rem thei lo a ni – tiin a sawi ṭhin a. Hetiang hian hmun thumah a ṭhen a –
Approximation Argument : Pathian hi a awm ngei a ni tih kan ngaihtuahna ringawt hian a fiah zo lo a, mihring ngaihtuahnaah hian dik lo a awm tawh avangin Pathian a awm tih kan hriatna pawh a ni lo zawngin kan sawi bo daih zel a. Chuvangin hriatna dik chu rinnah a awm a, kan ngaihtuahna ringawt hian a hmu thiam thei lo.
 |
| Vanglaini |
Post Ponoment Argument : Ngaihdan kan neih hmasak kha kan ngaihdan hnuhnung zawk,a thar zawk hmangin kan thlak danglam zel thei a. Science thiamna hmanga finfiah phak loh rinna hi kan thlang mai tur a ni. Kan ngaihtuahna hmang hian Pathian hi hre thei ni ila, Pathian kan rinna hian awmzia a nei lo ang a, Pathian rin pawh a ṭul dawn lo a ni.
Passion Argument : Kan hriatna hian tawp chin a nei a, thutawp kan siamnaah hian rinthu a tel lo thei lo. Chuvangin mimal inpekna hi a pawimawh em em a, rinna hian hriatna zawng zawng khumin kan rinna nen min suihzawm tlat a ni.
CS Lewis
Pathian awm ring lo, a hnuah Kristian lo ni ta CS Lewis chuan hetiang hian rinna leh ngaihtuahna fim hi a sawi ve leh a –
Common ground of Christianity : Kristian zawng zawngte rinna bulpui – mere christianity – a awm tih a sawi a, chu chu ngaituahna fim – reason – hmanga pawm theih a ni a, Kristian rinna lungphum a ni nghal bawk.
Rational basis : Kristiante rinna chu rinna mit del, ngaihtuahna leh phurna – emotion – mai maia innghat a ni lo a, ngaihtuahna fim tak hmanga innghat a nih thu a sawi. Chhia leh ṭha kan hriatna – moral law – te, Chanchin Ṭha bu pali te chu ngaihtuahna fim tak hmangin kan zir a, kan hrethiam a ni.
Role of reason : Thlarua lam nuna thudik te ngun taka lo dawnsawna lo hriatthiam theih a ni a, chumi atan chuan ngaihtuahna fim kan hmang a. Kan ngaihtuahna fim chuan thil dik leh dik lo thliar hrang tur te, khawvel nihphung leh khuarel awm dan hrethiam thei tur te, kan tawnhriat te hmanga khawvel kan hmachhawn dan tur leh kan thlir dan tur te hi min hrilh a ni.
Super natural element : CS Lewis hian ngaihthuahna fim a dahsan em em rual hian Kristian sakhaw chhunga thil mak tam tak – Isua thihna leh thawhlehna ang chi – te kha pawmin, chu chu mihringte hriatthiamna paih lam thil a ni a, kan rinna a ngaih thu a sawi bawk.
Rinna leh ngaihtuahna fim hi a inkalh lo a, a intifamkim tawn zawk niin CS Lewis hi chuan a ngai a. Pathian chungchang te, Lal Isua chanchin te chu ngaihtuahna fim tak hmanga lo zira lo pawmin, a rintlak a ni tih kha a ngaihdan a ni.
Pathian kan ring nge kan rinna?
Mizote zinga a taka Pathian rinchhan langsar em em, India sorkar pawhin Padma Shri a pek Dr Sangthankima kha – Pathian a awm leh awm loh chungchang an zawt a. Ani chuan Pathian awm ring lo te hi chuan an rinna mai mai an ring a, an rinnah khan Pathian an ring pha lo hrim hrim tih lam hawi khan a sawi a nih kha. Ani chuan Pathian a rinna leh a ngaihtuahna fim hmang kawpin tun saw a thleng kan ti thei awm e.
Tirhkoh Paula khan rinna hi Kristiante innghahna laipui ber a ni tih a sawi rual khan ngaihtuahna fim kha a hnawl miah lo tih Grik leh Rom mi te nena an inhnialnaah khan a sawi lang a nih kha (Tirh 17:16-34). Kan chhia leh ṭha hriatna thiang tak hmanga thu tak, chanchin ṭha, Lal Isua, Pathian kha ring tur kan nihzia sawiin mi fing tak tak te lakah khan Isua Krista a rinna kha ngaihtuahna fim hmangin a hnial tih kan hmu. Chuvangin Paula khan a mihring rinna mai ni loin Pathian a rinna kha a nun pumpui innghahna atan a hmang ta vek a, a thihchilh ṭhak tih kan hmu.
Thlarau Thianghlim
John Calvin theology kan en chuan – mihring hian keimahniin Pathian kan pawh thei tawh lo a. Chuvangin Isua Krista kaltlangin Pathian khawngaihna vawrtawp a lo lang a. Chu mi hmang chuan mihring leh Pathian chu kan lo inzawm leh thei ta a, Isua ringa Pathian hnen thleng tur chuan Thlarau Thianghlim puihna kan mamawh a ni.
Miin Pathian awm a rin loh chhan te, Pathian hnen a thlen loh chhan te, Pathian laka a hel chhan te hi a in ang vek lo ang. Mahse Thlarau Thianghlim puihna leh hriattirna aṭang chuan Pathian chu a fiahin a chiang em em a; ngaihtuahna fim – reason – leh Science hmanga a finfiahna – proof– ang thoa chiang leh innghahna tlak a nihzia chu kan hmu si a ni. Mi dawihzep, lehkhathiam lo leh Isua phatsantu Petera kha Thlarau Thianghlim a dawn hnuah khan Isua chanchin kha huai takin a tlangaupui a, a thih thlengin chutah chuan a innghat a ni.
Petera kha ngaihtuahna fim hmang thei lo khawpa mi a a nih thu kan hre lo a. A zui ṭhin Lal Isua kha a ngaihtuahna fim – reason – hmangin ngun takin a ngaihtuah a. Thlarau Thianghlim puihnain Isua Krista chu a ring – faith – zui a. Isua dam lai aiin a thih hnuah Petera hi Isua tana rinawm zawk fe a, Isua a hriatna – reason – leh a rinna – faith- kha a thihpui hmak a nih kha.
Chuvangin Kristian kan nihna te, Pathian kan rinna te hi kan mawl vang emaw kan thluak min suksak vang emaw, kan nu leh pa te min hrilh zel vang emaw, kan hlauh vang emaw lawmman kan dawn duh hrim hrim emaw vanga ring kan ni lo. Chutiang hmanga ring an lo awm a nih chuan an daih rei chuang lo ang.
Kan chhia leh ṭha hriatna, kan ngaihtuahna fim tak hmangin Pathian kan hria a, chu chu kan rinna hmangin Pathianah chuan kan innghat a. Miin mi a, thil ṭul loa buai, a tak ni lo ring, innghahna tlak loha innghat adt tiin min dip dal hi tum mahse, vawiin thlengin kan la ral lo a. Kan rin Pathian hi a rintlak lohna leh thil kawrawng leh innghahna nei loa innghat kan nih lohzia hi Pathian ring nasa apiangte nunah a lang a. A nung a, a nung reng dawn a ni.
Comments
Post a Comment