April ni 12, 2015 zing kar a ni a, zingkar mah ni se a lum le - vairampur a ni tlat a!
"I no min lo pe teh, ka lo call lawk ang che."
"Nga tan? Signal in neih dawn chuan loh chu.."
"I phal loh chuan i thu thu...."
"Ka pe che nga, lo call lo la..."
An inpe ta nge nge a; mahse mipa chuan a ngaihzawn dawn loh thu a sawi avangin tleirawl, pawl 12 zirlai hian messenger kaltlangin a number hi a pe niin a lang.
Ni 369 hnuah chuan a mipa zawk chu College a kal ṭha leh a; vanduaithlak takin a phone chu a chhia a. Mahse number pakhat chu a phone tharah chuan a la awm ta zel a, a sim card-ah a save a ni mahna!
Kum 2015 kum tira pawl 12 zirlaiin ngaithla tura a hrilh We The Kings hla 'Sad Song' pawh chu memory card-ah chuan a lo la awm mial a.
Chu tleirawl nen chuan Arsenal Facebook Group aṭanga inhria an ni - zing kara Pathian thu a post te a lo like ziah reuh a nih kha!
Ni 523 hnuah chuan tleirawl pawh chu nula a lo ni tawh a, College a kal tawh. Ṭumkhat chu mipa chuan an College-ah chuan nula sang tak mai, pawn lam aṭanga lo kal a hmu a. Tu nge a nih a hria - a vawikhat hmuhna chauh a ni.
Mahse, a thawmhnaw chhe tak te, a chapal ṭhing ve tak te nen chuan chu nula nalh tak, amah aia sang zawk chu a be ngam ta lo a nih kha. Chumi zan chuan WhatsApp-ah khan nula chu a hmuh thu kha a hrilh ta em tih a chiang ta lo.
Ni 2920 hnuah chuan an inhmu ve ta nge nge a, mahse mipa zawk chuan a be ṭha ngam lo a, amah aia sâng zawk hmeichhia a nih vang ngawt chu a ni lo. An pahnih chauha thlalak dun te pawh a duh a, mahse a sawm ta lo. A tak aiin phone kaltlangin an innel zawk ve ve!
Mipa hian hmelṭha a tiin a 'star' a ni tih hi a tir aṭang khan hmeichhia hian a hre tawh a, a theihnghilh leh tawh zawk ang.
Kum sawm dawn a vei hnuah pawh an la inkawm ve ta zel a - phone kaltlangin. A takah erawh chuan an inhmu tam lo a. Hetih chhung hian inbe duh lo khawpa buaina tenau erawh an nei ve fo a.
Mipa hian a phone vawi thum a thlak hnuah pawh a number hi a la nei ve ta zel bawk - number dang a bo nual pawhin hei hi chu mak deuhin a bo lo ve tlat zel!
Ṭhian ṭha tak chu an ni lo a, an inkawm ve zel a. Nula chuan tlangval chu a duh chin thil hrang hrang a zawt a, a duh chin thil tam tak a tih tir bawk.
Ngaihzawng an nei ve ve a, nupui pasal pawh an la nei ve ve ngei ang. Mihring nun hlutna pakhat chu hei hi a ni ve reng tawh ang.
Comments
Post a Comment