Phurrit a bo ta Kalvariah

Rev. John M. Moore a chu Kirkintilloch, Dunbartonshire, Scotland ah September 1, kum 1925 khan a lo piangin Pathian tihmi tak chhungkua atanga lo seilianin kum 16 a upa a nihin a paingthar a.   Glasgow, Scotland ah rawngbawlna/ministry zirin chu  lai vel kohhranah chuan rawng a bawl thin a. North America lamah a pem hmain nupui Esther Marr neiin Ontario, Canada-ah Baptist Pastor leh thurihtu ropui tak a ni a, November 2, kum 2017 khan a boral a.

Rev. Moore hi Pathian hla phuah thiam tak mai a ni a, hla 150 chuang zet phuahin chung zingah chuan Mizote pawhin kan hriat lar em em ‘Phurrit a bo ta Kalvariah’(Burdens Are Lifted at Calvary) tih kum 1952 a a phuah hi khawvel deng chhuak khawpa a sulhnu a ni. He hla hi Mizo tawngin Rev. Lalrinmawia chuan mawi tak maiin min lehlin sakin tun hnaiah One in Christ te chuan mawi tak maiin an sa a nih kha.

He a hla phuah mawi tak mai leh ringtute tana innghahna tlak Lal Isua a nih zia heti hian Rev. Moore chuan a sawi a-

“Glasgow, Scotland a Seamans Chapel a Assistant Superintendent ka thawh laiin vawi khat chu lawng lam company lian tak secretary-in min lo rawn phone a, Glasgow damdawi in pakhata an lawng hnathawk tlangval la naupang tak na taka a damloh thu leh tlawh turin min lo a ngen a. Chu tlangval chu ka va kan a. Kan titi hnuah chuan ka ipte ka dap a, kristian thuziak sem chi ka ah chu ka dap a. Chutah chuan Kristian Vanram Kawngzawh lehkhabu kawm a mi, mi pakhatin phurrit tak mai phur chunga Kraws a pan lai lem chuanna chu ka pe ta a.

“Chu milem ka pek pah chuan Kristian Vanram Kawngzawh chanchin te chu a tawi thei ang berin ka hrilhfiah a, ringtu nun kawng bumboh zia leh kawng awlsam kan zawh vekloh zia ka tawn hriatte chu ka hrilh pah bawk a. Kei ngei pawhin Lal Isua Kraws ka pan hnuah ka phurrit zawng zawngte lak bo sak ka nih thu te chu ka hrilh a. Ani chu a lu a lo bu nghat nghat a, tichuan ‘Heti ang hian phurrit hreawm tak hian a delh ve reng thin che em?’ tiin chu damlo tlangval chu ka zawt a. Chumi hnuah chuan kan pahnih chuan kan tawngtai dun ta a. Chu tlangval hlim tak maia a nui hmel leh thlamuanna a neih chu engtikahmah ka theihnghilh leh tawh ngailo ang. Ani pawh chuan a phurrit zawng zawngte chu lakbo a nih thu min hrilh bawk.

“Chumi hnuah chuan zan rei tawh lamah meilum aiin ka thu a, lehkhapuan leh pen ka inchhawp a. Kha damlo pa phurrit lo bo tak dan kha ka theihnghilh thei reng renglo mai a. Tichuan ka ziak tan a, heti ang tak hian he hla tlawmte hian hlut a hlawh ang tih hi kha damlo ka kan hma khan ka ngaihtuah ngailoa, ka suangtuah phaklo bawk. Mahse khata tang khan mi hian he hla an sak hian malsawmna tam tak an dawngin damna an chang tih ka hre ta a ni.”

Ni e, khawvela kan awm chhungin ringtu tha leh ropui tak pawh kan ni thei e. Mahse khawvel hreawmna leh phurrit, tahna leh thihna ngei pawh hian min kiansan hlen dawn lo. Chung zawng zawng a lo thlen hunah pawh chuan Lal Isua hnena innghah tawp mai hi kan tihtur leh kan thlamuanna, kan hahchawlh hlenna tur a nih zia hi he hla atang hian chiang takin kan hmu a ni.

Phurrit a bo ta Kalvariah

Phuahtu: Rev. John M. Moore

Lettu: Rev. Lalrinmawia

Satu: One in Christ

Lungkham manganna ten min bawm

Khawhar takin ka awm

Phurrit a bo ta Kalvariah

Isua a hnai reng e

Phurrit a bo ta Kalvari ah

Kalvari ah, kalvari ah

Phurrit a bo ta Kalvari ah

Isua a hnai reng e

I mangan a hnen ah thlen la

I lungngaihna zawng nen

Lal Isuan a hriatpui a che

I tuarna zawng zawngte