Taylor Swift, American zaithiam leh vawiin khawvela ṭhlalaite atchilh rawn chuan, " Hei hi kum thar a ni a, bul ṭanna thar a ni. Tin, thil a danglam dawn bawk" tiin beiseina thar nena kum bul ṭan turin min sawm a nih kha. Albert Einstein, kum zabi sawmhnihna leh vawiin thlenga Scientist ropui ber ang hiala mi te ngaihsan chuan, "Nimin lam kha inzirna atan hmang la, vawiin atan nung la, naktuk atan beiseina nei ang che" tiin min chah bawk.
Nunna nei zawng zawngte hi hmasawna kan dam chhung hun hmang zo tura duan kan ni a. Chumi chhehvela awm nunna nei lo te chu hmasawnna tura kan mamawh min petu te an ni. Chuvangin nunna neia kan dam a nih phawt chuan hmasawn hi kan dam chhan a ni.
Kum a lo thara, ruahmanna leh hna thawh tur te pawh a bul aṭanga ṭanin, chumi tihlawhtlinga hmasawn zel tur chuan keini hian mawhphurhna kan nei a, indawm kun reng hman kan ni lo. Hmasawn ve tum miah lo leh beiseina nei lo mihring kan nih chuan mi vanduai tak kan ni ang. Hmasawna hmalam pan zel hi nun awmze dik tak a ni. Grik Philosopher Plato chuan, "Bul kan ṭan hi kan hnathawhnaa a pawimawh lai ber chu a ni" a lo tih tawh kha.
Hlawhchhamna leh vanduainate hi mi zawng zawng ta, pumpelh hauh loa kan tawn leh kan paltlang vek a ni. Chu hun harsa leh hrehawm chuan mihring nun hi awmzia a neih tir a, chumi aṭanga hlawhtlinna changa hmalam pan te nun leh chanchin chu khawvela chanchin ngaihnawm leh hlu a ni. Chuvangin hun ṭha nei leh thei tura damna leh hriselna ṭha kan nei a nih chuan nun awmzia tak tak hre turin hmabak kan la nei a ni. Khawvela ram ropui USA President pathumna Thomas Jefferson chuan, "Hun kal tawh te aiin hun lo la awm tur hian ka ngaihtuahna a luah zawk" tiin hmalam pan zel turin min fuih.
Tisa thil chauh ni lo, thlarau nunah pawh intuaithar ngai leh hmasawn ngai kan ni a. Hmana Eden huana sual avanga mihring thi tawh, hlawhchham tawh, nunna nei tawh lo kha khawngaihna avanga hun ṭha pek leh kan ni a. Bul ṭan thara nun thar nei leh turin Isua Krista chuan hun ṭha leh beiseina min pe tih a tak ngeia hretute kan ni. CS Lewis, British Pathian thu thiam leh vawiin thlenga a lehkhabu te pawh la chhiar hlawh em em chuan, "Bul ṭan thara suangtuahna thar nena hmala leh tur hian ka tar tawhin ka upa tawh lo ti ngai suh!" tiin hmalam pan zel turin min chah a nih kha.
Englaipawhin vawikhatnaa hlawhtling nghal an awm reng dawn a; vawi tam tak hlawhcham kan awm bawk ang. A tu emaw zawk zawk pawh ni ila hmalam pan zel hi hlawhtlinna awmzia chu a ni. Hlawhtlinna hian min lo pan dawn loa, hlawhchhamna tlan pelin hlawhtlinna hi kan insiam chawp tur a ni. Chu mi tur chuan hun ṭha leh damna kan neih hi a tawk a, a bak zawng chu Pathian kut a ni.
Kan rilru put hmang hi a pawimawh em em a; chona hmachhawn thei tura rilru paukhauh neih hi kan tih tur a ni. Angelina Jolie, a hun laia lemchan thiam leh mipa tam tak ngaihzawn rawn ni phak khawpa hmeichhe duhawm chuan, "Thawmhnaw nalh leh changkang ber ber chu i duh hun hunah i ha reng thei. Mahse mi rilru paukhauh leh tumruh i nih si loh chuan chung i thawmhnaw nalh tak tak te chuan pawimawhna an nei lo" tiin rilru paukhauh tak leh tumruh tak ni turin min fuih.
Damna leh hriselna ṭha kan neiha khawvelah hian kan la dam ve a nih si chuan hmabak neiin nung ila; chu chuan hlimna leh lawmna min pe ang. Hmabak nei lo leh beidawnna tluka hrehawm hi khawvelah thildang a awm awm lo e. Chutih rualin mahni chhiat vekna khawpa lungkham luattuk neih te, a dik a dawk thlu loa mi dangte pal buan buan chunga hlawhtlinna chan tumte erawh chu sual a ni thung.
Kumin hi nang leh keia tan kum ṭha, malsawmna kum nise la; tisa leh thlaraua hma kan sawnna kum lo ni mawlh teh se.
Comments
Post a Comment