Thuziaktu hlawkna

Kan thian thenkhat hnen atanga zawhna kan dawn fo chu ‘Chanchinbua thu in ziah hian pawisa in hlawh em?’ tih hi a ni a; a chhanna chu ‘Pawisa kan hlawh lo’. Chutih rual erawh huang neia thuziak te erawh hi chuan sum leh pai tlem te chu an hlawh ve ang. Thawnthubu leh lehkhabu tihchhuah atang erawh hi chuan, sum dawnna atana hman tlak loh sum leh pai tlem chu la lut an awm bawk ang a. Sum tam tak hui lut khawpa lehkhabu hralh thei hi tun Mizoramah chuan mi sawm chuang an awm lo ang. Chuti si, thuziah hi eng nge a hlawkna?

Anmahni tan an ziak

Thu chhiar tlak leh chanchinbua chhuah tlak, lehkhabua chhuah tlak ziak tur chuan lehkha chhiar te, thil thleng ngaihven te, a hun leh hmun te hriat a ngai a. Chung zawng zawng hriat hnuah chuan taima taka  thil hriat leh vei te chu ziah chhuah a ngai thin. Mi taima lo tan thuziah a theih loh. Chutiang a nih avang chuan taima leh hun bi nei taka hun hman a ngai a, lehkhabu tha leh ropui tak ziak tur phei chuan kum tam tak pawh a ngai hial thin. Chuvangin, thu ziah emaw lehkhabu ziah emaw hian, a hmasa berah chuan a ziaktu hian an hlawkpui nghal a ni. An thil hriat an ziah te chu an zawm vek thei lo emaw an hre vek thei lo emaw pawh nise, a ziaktute hian an hlawkpui a, ziak ve ngai lo leh chhiar ve ngai lo ai chuan an hlawk zawk tho tho a ni. 

Mi dangte tan

Miin taima taka lehkha a zir te, a thil chhui leh a thiamna te, a ngaihtuahna leh a vei zawng te, ram leh hnam pum huapa kan hriata kan ngaihven tul nia a ngaihte a sawi chhuak a, a ziak a, zir tlak a lo ni thin. Chung kan mi thiamte thuziak, thusawi, thawhrimna leh hlawhtlinna te chu kan tan atang kai a, hma kan lo sawn ve phah thin a ni. Chutianga an thawhrimna leh taimakna hmanga lehkha an ziah chu mi dangte tan, nang leh keia tan hian a tangkai ta em em mai a ni. Khawvela mi ropui leh hlawhtling te hi lehkha chhiar nasa, mi thiamte thuziak zira chhiar nasa an ni zel tih kan hre vek awm e. Vawiina zirlai naupang zawng zawngte pawh hi mi thiamte thuziak zir vek kan ni a, lehkha zir zo tawh zawng zawngte pawh hi kan ni bawk. Chuti ang chu a ni, thuziaktu hlawkna leh lawmman chu – mi dangte hnenah finna a pe thin. 

Rawngbawlna huangah

Khawvela kan awm chhungin sakhaw nei lo ram leh hnam kan awm lo a; sakhaw lehkhabuin mihring nunah hmun pawimawh tak a chang a ni tih kan hre vek awm e. Kan sakhaw vawn theuhah hian rawngbawltu pawimawh leh tangkai ni tur chuan lehkhabu ziah, chhiar, zir leh ngaihthlakte hi a hlawk em em a; chutiang ti ve ngai lo chu a sakhaw tan a tangkai nep thin. Lal Isua pawh khan Thuthlung Hlui bu a zir nasain a chhiar nasa a; chung a thil zir leh a chhiar hmanga a zirtirna te chu vawiin thlengin kan sakhaw lehkhabu pawimawh – Bible hi a ni. Bible ziaktute khan an hun laiin Bible-a pawm tur lehkhabu hrang hrang an ziah lai khan sum leh paiah hlawkna an neih a rinawm loh. Mahse Bible ziaktute hlawkna ber chu nang leh keiin chatuana nunna thu kan neih phah hial a nih hi! Sum leh paiin a lei theih loh leh a hlutna teh zawh rual loh chu Bible ziaktute avangin nang leh kei hian kan lo nei ta ni. 

Chhiar hnuah ziak ila

Hripui vang te leh Social Media vang tein tun lai khawvelah chuan thuziak tha tak tak kan neih belh a, a va lawmawm em! Ziak ila, thu tha tak kan ziah theihna turin i inchhar zau deuh deuh ang u. Central Service – IAS/IPS/IFS adt kan neih belh mawhna chhan bul ber pawh hi lehkha kan chhiar tak tak peih loh vang a ni. Lehkha ziaktute hlutna hre lo thangthar tan chuan khawvel tukverhah a dah ve theih loh. Ni tin chanchinbu, kohhran chanchinbu, kan kohhran tualchhung chanchinbu pawh chhiar ngai miah lo kan nih chuan, ram leh hnam hawlhtlang thilah tihtheih kan nei tlem hle ang. Lehkhabu pawh chhiar ngai lo tan thu tha tak a ziah theih loh a, ziak leh chhiar hi a inkawp tlat a ni.

 

Thuziaktute zingah sum leh pai uma thuziak hi an lo awm palh a nih pawhin an tlem hle ang. Nun kan neih a, khawvel leh van ram thlenga chhawm tlak nun kan neih hi thuziaktuin an duh leh kan laka an beisei chu a ni. Hengte hi thuziaktuin pawisa pakhatmah hlawh lo leh a hun tam tak senga thu a ziah lawmman thenkhatte an ni. Hmingthanna, sum leh pai hi chu a ken tel ve mai a ni. Thuziaktu hlutna leh hlawkna hi pawisaah a innghat ve lo tih kan hriatthiam chuan, ram leh hnam hmasawn kan ni ngei ang.