Thupuan bu hi khawvelah hre lo kan tam awm lo e. A bu chhung thu zawng zawng hi hre vek lo mahila ‘Sakawlh leh 666’ hi chu kan hre hle a. Insawithaihna leh hun hnuhnung rorelna anga ngaiin kan sawiin kan zir thin a, Sakawlh leh 666 phei hi chu tu emaw kan puhin kam hmehbel nual tawh a nih hi! Chuvangin Thupuan bu hi engtiang chiaha zir tur nge ni a, engvanga ziah leh tu te tana ziah nge a nih tih kan zir ang a. Kan tunlai khawvel inlumlet milin Thupuan bu hi kan thiam dan ang angin zir kan tum dawn a ni.
Thupuan bu hi engtia hrilhfiah tur nge?
Kan hriat theuh angin Thupuan bu hi ‘khuhhawnna’ (apocalyptic) niin thil inthup leh biru hai lan thu sawina a ni. Hun kal tawh, tun hun leh hun lo la awm huama thu leh thil inthup sawina bu a ni a; inlarna bu a ni tel bawk tih kan hre vek awm e. A zir danah pawh hian chi hrang hrang – hun kal tawh leh awm mek sawina, ngaihdan indona, kohhran chanchin pum pui sawina, thil lo thleng tur anga sawina leh a thuziak kalhmang atanga hrilhfiahna anga zir a ni a. Johana’n Patmos thliarkar atangin Rom sorkar hnuaia ringtu, tihduhdah tuar mek te tana a ziah a ni tih erawh kan hre reng tur a ni.
A ziah chhan leh a ziah hun
Thupuan bu hi Domitian-a lal laia Asia Minor-a Kristian te tana AD 95-96 vela ziah a ni a. Thupuana chhinchhiahna awm te hi a hun thu zirna hmanrua ber a ni. A chhunga thu awm te hian Nero-a hunlai ai chuan Domitian-a lal lai a ni tih a kawk a. Domitian-a a lal tantirh kum lam kha chu a ralmuang viau a, amaherawhchu a lal hun tawp lamah chuan a khauhin thu a duh hle a, Pathiana inchhal hial a duh ta a. He amah leh amah a in atchilhna hian tun hmaa lalte, pathian ang maia an biak thinna kha a rawn tharthawh leh a. A hranpain lal chu pathian biak tur a ni tih dan a siam hauh lo nain, ram bial awptu te chuan Domitian-a tlawn nan leh tihlawm an tum avangin mipui te chu pathian biaka be turin an tir lui a ni. Chutiang karah chuan ringtute chuan nasa takin tihduhdahna an tuar a, mi tam tak an thih phah bawk a. Chung tihduhdah tuar ringtute tan chuan Johana hian Patmos thliarkar atangin Thupuan bu hi a ziak a; Johana ngei pawh hi Domitian-a hian Patmos thliarkarah a tan tir a ni.
Rom lalram rorelna leh India ram
Thupuan bu hian Rom sawrkarna chu tihluihna leh tha chakna hmanga mipuite awpbeh a nihzia leh rawng taka awpbeh an nihdan a tarlang a. A inrelbawlna dan chuan rawng taka awpbehna leh ei leh bara inhrekna a keng tel a. Rom lalram nihphung tilang tu aiawh entirna pahnih awm chu ‘sakawlh’ leh ‘nawhchizuar’ te kha an ni a. Sakawlh chuan Rom sipai leh politics-a a chakna a entir a. Babulon chu Rom khawpui a ni a, a hausakna te chu dik lo taka hnehchhuha a neih a ni.Thupuan bung 13 thu hi politics lam a ni ber a, bung 17 -18 hi ei leh bar lam a ni a, a zavai hian thuk takin sakhaw lam sawina a tel bawk a ni.
Kan India ram pawh hi sakhaw pakhata awm tir tumin chak taka hmalak a ni a; a theih dan ang angin Sorkar thuneitu te pawhin tan an la tih kan hmu a, CAA awmzia leh a thiltum pawh kan hre vek awm e. Chuti ang karah chuan Kristiante hi chhel taka awm tur te, kan rinna kawngah pawh theihtawp chhuaha kan tan a ngaih zia hi kan hre thiam vek awm e. Hripui leng te hi han reh se, he harsatna lian tak hi Kristiante chuan kan hmachhawn tur a ni a. Thupuan bua Johana thuchah hmang hian keini ringtute hian Sorkar hmachhawn hi kan zir tur a ni.
Hnehtu beramno Lal Isua
Thupuan buah hian thil pahnih pawimawh tak a awm a: 'Tu nge Isua chu?' tih leh ‘Isua thiltih/hnathawh eng nge ni’ tih hi an ni a. He thil pahnih hian Thupuan buin Pathian Thu a chhuinaah hian chhungrilah inzawmna thuk tak an nei a ni. Thupuan bu laimu chu Isua khan a thihna leh thawhlehna hmangin sual laka hnehna min chansak tawh a, chu chu Lal Isua’n khawvela Pathian lalram a din nemnghehna a ni. Thuthlung Thar bu dangah Isua Krista chu ‘beramno’ anga sawi ni bawk mahse, Thupuan bu hian a hman dan hi chu a danglam bik hle a. Beramno chhinchhiahna hi ngaihtuahna hrang hrang atanga a lak a ni a, chhinchhiahna thar hlakah a chhuah a ni. Hei hi Kristiante Rom sawrkar hnuaia tihduhdahna tuar mek te tan thuchah ropui tak a tling.
Thupuan bu thuchah – tunlai khawvelah
Indopui pathumna leh Sakawlh/666 hian Kristiante rilru a luahin, Kohhran chhuahsan te, Aadhar Card nei duh lo te kan awm phah hial reng a nih kha. Sakawlh hi a lo thleng tawh emaw a lo la thleng dawn emaw pawh nise, Sakawlh hnehtu Lal Isua Krista neitu kan nihna zawk hi a pawimawh ber chu a ni. A tir lama kan sawi tawh angin India ram hian – ngaihdan pakhat, sakhaw pakhat, hnam pakhat, tawng pakhat hmanga min hrut rual tumin tan a la nasa tih kan hre vek. Chung hunah chuan chhel tak leh rinawm taka Lal Isua hnung zuitu ni turin kan inbuatsaih reng a tul a ni.
Sakhuana zawnah te, zirna leh ram leh hnam inrelbawlna zawnah pawh Kristiante hian tan kan lak a ngai em em a. A bikin Mizoram phei hi chu Kristian ram kan ni a, mi dangte tana entawn tlaka kan nun a ngaihzia kan hriat nawn a tul hle mai. Party politics hmanga inbeih te, hnathawk tha mang loa neih teuh kan tumna rilru zawng zawngte hi paih boa tihtakzeta bul kan tan thar hi a ngai hle mai.
Tisa leh thlaraua hmasawn te, mi dangte tana entawntlak leh harsatna tam tak paltlanga Kristian kan nihna lan tir hi kan mawhphurhna a ni. Khawvelah Kristian kan nihna dik tak lan tir hi kan bat a ni a; chu kan nihna chu Vanram thlenga kan chhawm chhoh tur a ni. Chutiang rilru pu chuan Thupuan bu hi chhiar nawn ila, Pathian kan rin tlatna hmangin kan ram leh hnam hi kan siam tha thei a ni tih i zirchhuak nawn ang u.
Comments
Post a Comment