Bible-a bu lian ber chu Sam hi a ni a; Sam bu hian chhiar a hlawhin mi nawlpui pawhin kan hriat tlanglawn tak a ni awm e. Tuna kan sawi tur Sam 37 pawh hi kan hriatchian pawl tak a nih a rinawm. He Sam 37-na hmang hian kan thiam dan danin mihring nun leh Pathian nen kan inlaichinna te zirchhuah kan tum dawn a; kan thiam tawk leh theihtawk erawh chu a bei tham hle ang.
Tu ziah nge?
Sam 37-na hi tu ziah leh phuah nge tih hi Bible-ah kan hmu lo a; Sam 37:25-ah hian a ziaktu chu putar, mihring nuna tawnhriat ngah tawh tak a ni tih erawh chu kan hmu a. Mi tamtak chuan Lal David-a ziak a nih an ring a; Lal Davida’n a tawnhriat atangin he Sam hi a phuahchhuak a ni ang e an ti. Mi thiamte chuan he Sam hi kum BC zabi 4-na vela phuah niin an ngai a, Thuthlung Hlui lama mi thiam Artur Weiser, German mi chuan Israel fate sal tan hmain he Sam 37-na hi phuah niin a ngai.
A phuah dan kal hmang
Sam hi hlahril/poetry hmanga ziah a ni tlangpui a; Sam 37-na pawh hi chutianga phuah leh ziah chhuah chu a ni. Hebrai ho hian A Aw B (Alef, Bet, Gimel) 22 an nei a; chumi mil chiah chuan hlawm 22 –ah thenin he Sam hi phuah chhuah a ni. Zirna huangah chuan Sam 37-na hi ‘Finna Pai Sam' (Wisdom Literature) a ni a, Thufing bu te anga finna thu keng a ni. Mizo Bible-ah pawh a thupuiah ‘Mi sual leh mi tha tawpna tur’ tiin dah a ni a, Bible lehlin tharah chuan ‘Mi sual leh mi tha chanvo tur’ ti a dah a ni. Norway mi Pathian thu thiam Sigmund Olaf Plytt Mowinkel chuan Sam 37-na hi Pathian biakna lam hawi lo Sam niin a sawi.
Mihring nun chhungril zawhna
Sam 37-na thu hi kan chhiar chuan mihringin zawhna kan neih zawng zawngte hi he Sam hian a chhang kim vek emaw tih turin zawhna pawimawh tak tak hmu a ni. Mi tha leh fel tak tak te’n vanduaina leh harsatna an tawh laiin mi sual tak tak te chu an vanneiin an hmuingil em em mai a; Pathian hi a awm chiah lo em ni?
Kan theihtawp chhuahin Kohhran-ah kan inhmang a; dik takin thil kan ti ve a, kan retheih phah a. Anni pawh Kohhrana inhmang tho siin dik zik tluak loin thil an ti a, an hausain an ropui thur thur mai a. A tawpah chuan kohhran leh khawtlangin an zah rawn an lo ni ta daih mai a. Dik taka nun leh tha taka thiltih hi atna leh mawlna mai a ni tawh zawk em? Pathian hian chung dik mang lo te chu a hrem mai si lo a, an va itawm ve!
Pastor chhungkua, Missionary chhungkua, Kohhran Upa chhungkua kan ni a; kan theitawp chhuahin thil tha kan ti a, tling lo takin Pathian tan kan hun leh kan neih te kan hlan zo ve a. Chutih laiin Politics vanga mi hausa, sum thianghlim lo ni ngeia kan hriat hmanga hausa chhungkaw ropui zawkte chu ram leh hnamah mi langsar, mi zah rawn leh thuneihna changtute an ni zel a. Pathian thuawih tlat mai hi atna chi khat mai a ni lo maw?
Keini aia sual nia kan hriat ngei te hian hma min sawn khalh a, an changkangin an hausa a, khawiah pawh an tlatlum zawk daih a. Pathian chuan mi sual nia kan hriat te chu a va hrem si lo ve! An va hrisel si ve! Keni aiin an la dam rei daih zawk leh nghal!
Mi sual te chu an la boral ngei dawn
Pathian thuah, he Sam 37-ah ngei pawh kan hmuh angina mi sual te chu hrem an ni ngei dawn a; Pathianin chiang takin a sawi a ni. Mi sual te vanneihna leh hamthatna avanga mi tha te rilru natna leh hrehawm tihna tam tak hi Pathianin a hria a, chuvangin mi sual te chu hrem an nih dawn thu leh dikna chu nunpui tlat turin Pathianin a mi te hi a fuih a ni. Khawngaihtu Pathian a nih avang erawh chuan kan thiltih sual ang zela min hrem nghal loin khawngaihna hun min pe a, sual sima Pathian lam kan hawi theihna turin hun min la pe hram hram zawk a ni. Mahse sual kan kalsan loh chuan hremna hi kan pumpelh dawn lo a, Pathianin mi sual chu hrem lohin a chhuah dawn lo.
Mi tha leh dik hre rengtu Pathian
Sam 37-a kan hmuh ang hian Pathian chu mi tha leh mi dik te chu a hre reng a, an lawmman atan malsawmna leh chawimawina pawh pek a tiam tih kan hmu. Pathian thu kan awih avangin he khawvelah malsawmna zawng zawng chu kan dawng vek lo a nih pawhin kan thlarau lam malsawmna erawh chu a bo hlen ngai dawn lo. Pathiana innghat tlattu nun chu khawvela engthil mahin a tichhe zo lo a, Pathian hnena lawmna nei chungin khawvel a chhuahsan thin. Sum leh paiin a lei theih loh leh a hlutna chhut chhuah zawh loh khawpa hlu – Pathian nena nun inzawm neih te hi mi tha leh dik te hausakna chu a ni. Pathian chuan a thuawih tlat tute hi thlahthlam a duh lo a, a tawpah chuan mi dangte neih ve loh leh chan ve loh thilin a vur zel a; chutiang mite nunah chuan Pathian ropui zia leh Pathian hi a awm ngei a ni tih kan hmu chiang nawn thin.
Chatuan Pathian rorelna
Malsawmna kan dawn duh vang te, mi sual te hi Pathianin hrem nghal se tih kan duh vanga he thu hi sawi kan ni lo a, Sam 37-na phuahtu pawh hian chumi a duh vanga he hla hi phuah a ni hek lo. Naupang a nih atanga putar a nih thlenga mihring nun a hmuh dan leh a tawnhriat atangin he Sam 37-na hi a phuah a; mi tha leh mi sual te chunga Pathian rorel dan chu min hrilh a ni.
Nang leh kei hian kan ram, kan hnam, kan khawtlang leh mi mal nun theuah hian dikna leh rinawmna hi nunpui hram hram ila, chu chu Pathian pawhin min hriatsak reng a ni tih hria ila. Kan ram leh hnam dinchhuahna tur te, kan thlah te thlenga khawvel tha siam tur te, mihring nun awmze ril phawrhchhuak tur leh Pathian hi rintlak leh chatuan daih Pathian a nih zia a lan chhuah zelna turin nang leh kei hian Pathian thu kan awih tlat hi kan mawhphurhna, a bata kan bat a ni e.
Comments
Post a Comment