Rorelna dik

Hman atang tawhin rorelna dik leh dik lo hi a awm reng a; Mizo lalte zingah pawh lai lo taka rorel ching kha an awm ve zauh niin a lang bawk. Chutianga rorelna dik leh dik lo chuan ram leh hnamah nghawng chhuah lian tak a nei a, ram leh hnam ropui tak tak an tluk chhiat phah a; hnam te nau leh hriat hlawh mang lo te pawh an dinchhuah phah hlauh thung a nih hi. Bible-a Zawlnei tam zawkte hnathawh leh rawngbawlna pawh hi ram leh hnam siamtha tura Lal leh thuneitute fuihna leh thupek a ni deuh vek tih kan hre awm e. Vawiinah hian Zawlnei Amosa bu behchhanin rorelna dik pawimawhna leh a tulna kan zir ang. 

Tu nge Amosa?

Zawlnei Amosa hi Juda ram chhunga khaw pakhat Tekoka khuaa bream vulha eizawng a ni a; Amosa tih awmzia chu ‘phur’ emaw ‘phurtu’ emaw tihna a ni. Zawlnei zingah Amosa thupuanchhuah hi ziaka awm hmasa bera ngaih niin Juda lal Uzzia (783-742 BC) leh Israel lal Jeroboama II (786-746 BC) lal hun chhunga zawlnei a ni a. Amosa hi mi hausa beram vengtu nge ama beram ngei enkawltu a nih tih te, mi hausa tak nge mi rethei ve tho tih te hi chiang taka hriat a har tawh a. Mi hausa leh roreltute’n mi reitheite an rahbeh avanga a demna thu hi huaisen taka a puanchhuah thin avangin mi retheite dinhmuna ding a nih ringtu mi thiam tam tak an awm. 

Engvangin nge dik taka rorel a tul?

Pathianin khawvela kan awm chhungin lal leh roreltute hi min pe tih Rom bung 13 –ah kan hmu a; chu chu khawvel awmchhunga kan awm dan tur niin a lang. Roreltute mawhphurhna chu dik tak leh tha taka mipuite tana rorel a ni a, mi hausa leh rethei a thliar hrang tur a ni lo. Pathian nung betu Kristian te tan ngat phei chuan dik taka rorel hi kan mawhphurhna a ni a, Pathian thupek a ni. Dik lo taka roreltu leh rorelna chu a tlo ngai lo a, a tluchhe ngei ngei thin. Tuna Delhi Chief Minister Arvind Kejriwal te khuan a dik thei ang bera ro a rel avangin mipui ngainat leh ngaihsan a hlawh chho mek tih kan hre vek awm e. Pathian nung be lo mahin dik leh tha taka ro a rel theih chuan keini Kristian te tan phei chuan kan tihmakmawh a ni. 

Pathian chu mi dik tak a ni

Amosa 5:24-a kan hmuh angin Pathian chu mi diktak a nih avangin mihring te chu dik tak leh fel taka rorel turin a phut a ni. Kristian kan nih vang hrim hrim pawhin dik taka rorel tur kan ni tihna a nih chu. Mahse Mizoram chhungah ngei pawh kan rorel dan hi a fel hlel niin a lang a, mi hausa leh rehthei te chunga kan rorel dan hi a lai tawk lo niin a lang. Mipat mipatna leh inrukbona lam hawi lek lek theia thubuai ziah luh mek an bawhzui dan an sawi te hi a tak tak a nih chuan, kan ram rorelna hi a lai tawk lo hle a ni ang. Chakma lamin dik lo taka dawta min beih chungchanga Politician pakhatin FIR a theuh luh an bawhzui dan te kha kan lung a awi chiah lo niin a lang bawk. Pathian kohhrana rawngbawltu nemngheh hial ni chunga ram leh hnam rorelna dik lo tak kan kalpui a nih chuan Pathian pawisawina lian tak a ni. 

Mi hrem ching Pathian

Pathian khawngaihna thukzia, that zia leh san zia kan sawi rual hian, mi hrem hmang Pathian a nihna lam pawh hi kan hre ve reng tur a ni. Thuthlung Hlui hunah phei kha chuan Pathian hi a rorum hle a, a rorelna pawh a khawng hle tih kan hmu. Pathian ringtu leh betu kan nih chuan Pathian hian kan laka beisei a nei sangin phut a nei bawk a. Chuti anga kan tih loh chuan kan sualna zawng zawngah min hrem ngei ngei dawn tih Amosa buah hian kan hmu bawk (2:6-6:14). Mizoram mipuite pawh hi dik lo taka kan nung zel a nih chuan Pathian hian min hrem ngei ngei ang tih hi thudik a ni a; dikna kan nunpui loh chuan malsawmna ringawt hian min daih reng dawn lo. Kan sualna avanga mi hrem ching Pathian kan bia tih hi i hre nawn ang u. 

 Malsawmnaa min vurtu Pathian

Pathian hian a thu kan awih phawt chuan malsawmnain min vur hreh reng reng lo a; a thu kan awih lo chung pawhin malsawmna tam takin min la vur hram hram thin tih a taka hretu leh tawngtu kan ni. Amosa buah pawh hian Pathianin Israelte chu malsawmnain a vur leh dawn tih kan hmu a, keini pawhin dik tak leh fel taka ro kan rel a, kan nun dan kan siam that phawt chuan Pathian hian min tung ding dawn a ni tih chiang takin kan hre thei awm e. Pathian malsawmna dawng tur chuan keimahni hi kan dik phawt a ngai a, malsawm tlaka kan nun hmasak a ngai a ni tih kan hriat chian nawn a tul hle mai.

 

Rorelna dik a awm theihna tur chuan mipui leh roreltu te kan pawimawh a, mipui kan dik phawt chuan rorelna dik hi chu a lo lang nghal ang. Roreltuin dik tak ro a rel dawn pawha mipui lam kan dik tlat loh chuan awmzia a nei thei lo. Chuvangin bul tan tha ila; he khawvelah hian Pathian ram kan din thei a ni tih hriain Pathian malsawmna dawng tlak ram leh hnam kan nih zel theihna turin dik tak leh fel takin i awm teh ang u.