Naupang Sunday Sikul kai rual atanga kum sawmriat chuang tawh pawhin Sam 119:105 thu hi kan hre vek awm e. He lai thu hmanga hla an phuah pawh Amy Grant-i’n mawi takin a sa a, Mizo tawng pawhin mawi takin kan let a, kan sa thiam fur awm e. He lai bible châng hlu tak hmang hian Pathian thuawih hlut zia hi kan thiam tawkin kan zir ang.
Sam 119 - Acrostic Poem
Bible hi Thu leh Hla/Literature ropui tak mai a ni a; Pathian thu nung a nih piah lamah hian thu leh hla khawvelah pawh zir hlawh leh chai hlawh khawpa lehkhabu ropui a ni a. Pathian thu zirna huangah pawh Bible hi Thu leh Hla/Literature ropui tak a nih thu te, Thu leh Hla ziahna leh sawi chhuah dan chi hrang hrang (form) hmanga zir tel a ni thin. Sam 119 thu pawh hi zirmi te chuan ‘Acrostic Poem’ a ni an ti a; Hebrai A AW B (Alef, Bet, Gimel) 22 hmanga a indawt a phuah tihna a ni. Thuthlung Hlui hi Hebrai tawnga ziah niin A AW B hi 22 an nei a; Sam 199-na pawh hi Herbai A AW B (Alef, Bet, Gimel) indawtin a hla châng tin hi an phuah tihna a nih chu. Sam buah chuan Sam 199 hi a sei ber a, hla châng 22-ah hla thu 8 zel awmin a vaiin hla thu 176 zet a nei a nih hi.
Sam 119 hi tu phuah nge?
Sam 119-ah hian a phuahtu emaw he hla satu emaw hi kan hmu lo a; chutihrualin mithiamte chuan Lal Davida phuah ngei niin an ngai. A hla thu hman dan leh a tawng kam velah hian Lal Davida phuah ngei niin zirmite chuan an ngai a ni. Chuth rual chuan mithiam thenkhat erawh chuan Israel fate sal an tan hnu, Nehemia leh Ezra te hun laia phuah nia ngai pawh an awm bawk. He hla tha tak hian a sawi tum ber chu – Pathianin dan leh hrai min pek zawm hi mihring kan nih chhunga kan nun kaihhruaitu atana thil tha ber a nih thu uar taka sawina a ni.
Êng – Pathian kaihhruaina
Thuthlung Hluiah hian Pathian hi ‘êng’ angin Israel te zingah khan a inlan fo a; Aigupta – Kannan kawngah pawh khan Israel mipuite khan Pathian kaihhruaina leh awmpuina kha meialh/êng angina an dawng fo tih kan hmu a nih kha. Sam 119-na phuahtu pawh hian Pathian kaihhruaina leh awmpuina chu a dawng nasa em em a; chuvang chuan Pathian thuawih hi mihring kan nih chhungin kan nun kaihhruaitu atan leh Pathian kaihhruaina kan dawn theihna tur atan a pawimawh ber a ni tih kha chiang takin min hrilh a ni. A tak ngeia Pathian kaihhruaina leh awmpuina changtu hian Pathian thuawih hlut zia min hrilh a; a pawmawmin a rintlak hle a ni.
Khawnvar – kawng min entu
Khawnvar leh êng hi thil thuhmun angin a sawi theih ang a; Sam 119:105-thuah hian khawnvar chu kan kalna tur, kan ke chhehna tur kawng min kawhhmuhtu atan a hmang a ni tih kan hmu. Pathian thu kan awih a, Pathian thu pek kan zawm tlat chuan, mihring kan nih chhunga kan ke penna tur, kan kalna tur kawng min kawhhmuhtu chu Pathian thu hi a ni dawn tihna a ni. Pathian thu kan awih loh emaw Pathian thu kan zawm loh emaw hian kan ke pen a buai a, a tawpah phei chuan thihna hial kan tawh phah thin. Pathian thu kan awih hian kan hmalam huna kan kawng zawh tur hi a lang chiangin a him a; khawnvar êngin kan ke penna tur a ên angin kan nun kawng zawh chhoh tur hi a lang chiang hle tih min hrilh a ni.
A tak ngeia tawngtu sawi a ni
A chung lama kan sawi tawh angin Sam 119:105 thu hian min hrilh a tum ber chu – Pathian thuawih hi kan nun kawng hruaitu leh Pathian kaihhruaina kan chan theihna a ni. Chuti anga a tak ngeia Pathian kaihhruaina leh awmpuina changtu chuan Sam 119 thu hi a phuah a, Pathian a chawimawi a ni. Vawiinah hian nang leh kei pawh hian Pathian thuawih hi mihring kan nih chhunga kan kan nun kaihhruaitu ber atana hman hi kan tihtur a nih zia kan hriat nawn a ngai hle mai.
Hun harsa leh hreawmna tam tak kar atanga Pathian kaihhruaina leh awmpuina changtu, Pathian thuawih that zia hriaa puangchhuaktu thusawi hi ngaipawimawhin zawm ve ila. Nang leh kei hian Sam 119:105 thu hi finfiah ila, a dikzia puangchhuaktu ni turin tan ila teh ang tiin kan insawm a ni.
Comments
Post a Comment