Mizo zingah lên denga sangha man thin mi tam tak kan awm a; vawiin thlengin lên denga eizawng hi khawvelah mi tam tak kan la awm a; kan la awm zel bawk ang. Lên hmangin dilah emaw luiah emaw sangha man kha lên den awmzia chu a ni mai a; chutianga lên hmanga sangha mantu chu lên dengtu emaw sangha mantu emaw tiin kan sawi thin.
Lên dengtu pali te
Lên dengtute zinga hmingthang leh lar ber chu Lal Isua zirtirte hi an ni awm e. Israel ram hmar lam Galilee khu Lal Isua hun lai chuan lên hmanga sangha man hi sumdawnna lian tak a ni a; Galilee bul vela mi nawlpui kha chu lên den thiam an ni ti ila kan sawi sual lutuk awm lo e. Chutiang zingah chuan Petera leh a unaupa Andria te, Jakoba leh Johana te unau pawh kha lên dengin ei an zawng a, an eizawnna lên an la vawn lai mekin Lal Isua’n rawngbawlpuiah sawmin an zui tih Chanchin Tha bu-ah kan hmu. Hemi te pali hi khawvela lên dengtu langsar leh vawiin thlenga kan la hriat zui tak zel te an ni awm e.
Sangha man tur a awm lo
Lal Isua rawngbawlna kha Galilee ram leh a chhehvelah khan kan hmu tam ber a, mipui tam takin an zuiin an chimbuai thin tih kan hmu bawk (Lk 5:1-3). Gennesaret dil kama Lal Isua'n rawng a bawl tum pawh hian zing kar atangin Lal Isua hi mipuiin an bawhbuai niin a lang a. Chuti anga a zirtir zawh chuan Lal Isua hian Petera hnenah len deng turin a tir a; Petera erawh chuan zankhuaa lên an den thu leh an hlawhchham thuin a chhang a nih kha (Lk 5:4-5). Petera hi Lal Isua zirtirte zingah chuan a thawmna leh huhang ngah a ni a, Lal Isua thilsawi pawh hi a chhang let ngam ve fo tih Chanchin Tha bu-ah kan hmu a. Hemi tum pawh hian Lal Isua thupek chu chhang letin sangha man tur a awm loh thu a hrilh tih kan hmu a. Lal Isua'n mipui a zirtir zawhah lên deng turin thu a pe a, Petera hian zankhuaa lên an den thu leh sangha man tur a awm loh thu a hrilh dan atang hian zing kar atangin mipuiin Lal Isua zirtirna an ngaithla niin a lang.
Li thûk lam pan la, sangha man turin in lênte deng rawh
Sangha man lama tawnhriat nei tha, kum tam taka sangha man eizawng tawh Petera te’n zan khuaa lên an den hnuah an beidawng a, an lênte an su fai a (Lk 5:2). Zankhuaa lên deng an nih avangin an chauin chhun lamah hian han mutthilh ve lawk te pawh Petera te hian an chak ve ngei ang. Chutianga chau tak leh hah taka an awm lai chuan, sangha man leh lên den lama tawnhriat pawh la nei lo Lal Isua chuan thu a sawi zawh khan ‘li thûk lam pan la, sangha man turin in lênte deng rawh’ tiin lên deng turin Petera kha thu a pe a nih kha (Lk 5:4). Mihring rilru atang chuan Lal Isua hi a ngeiawmin Petera te tan phei chuan Lal Isua thusawi zawm mai hi a sak ve talh ang. Zankhuain lên an deng a, an hlawhchham avangin lên te an su fai a, chawlhhahdam te pawh an mamawhin an duh ve ang. Chuvangin Petera pawh hian zankhuaa lên an den thu leh an hlawhchham thu hi Lal Isua hnenah hian a sawi ve ngat ni te pawhin a lang (Lk 5:5). Hetih hun laia Lal Isua thupek hi Petera te tan chuan zawm chak awm loh leh peihawm loh tak a ni ve ngei ang.
Rinna leh thuawihna hi Pathian thiltihtheihna lo lanna a ni
Phun ve deuh nang nang chungin Petera leh a thiante hian Lal Isua thupek zawmin, zan khuaa an lo hlawhchham tawhnaah chuan lên chu an deng nawn leh ta poh a! Eng nge lo thleng? Mihring lama an hlawhchham tawhna leh beisei tur awm tawh lohnaah chuan Lal Isua thupek an awihna leh rinna chuan Pathian thiltihtheihna a hmuh tir a, lên chat chat pheuh pheuh khawpa sangha tam an man a. Anmahni mai pawhin sangha chu an hnukchhuak zo lo a, an thiante chu tanpui turin an sawm hial tih kan hmu a nih kha! Lawng pahnih pil lek lek khawpa tam sangha an man tih kan hmu (Lk 5:7).
Mihring kan nih chhungin hlawhchhamna leh beidawnna te, harsatna leh thihna te hian min kian san ngai dawn lo. Chutianga hun harsa tawpkhawkah leh mihring lama thil tihtihtheih tawh loh kan hmachhawn hunah chiah hian Pathian thuawihin Lal Isua thupek hi rinna nen zawm ila; Pathian ropuizia hi a taka hmutu leh changtu kan lo ni ang.
Comments
Post a Comment