Kuminah eng nge ka tih ve ang?

Kum thar chibai ule. 

Khawvela kan lo pianna hi kan duhthlan a ni lo a; chhan neiin kan lo piang a ni tih erawh chu mi zawng zawngin kan hre vek awm e. Genesis 1:26 –ah Pathianin ama anpuia mihring a siam khan mawhphurhna min pe nghal a, khawvela thil awm zawng zawngte enkawl turin mawhphurhna min pe a nih kha. Khawvela sual lo lut avangin mihringte hian kan nih tur ang kan ni phak ta lo a; Lal Isua Krista hmanga siam that ngai, din thar leh ngai kan lo nih phah a nih kha. Kum tharah hian Lal Isua nen eng nge kan tih ve ang?

Hmabak hlen tur nei mihring

Mihring pangngaia kan lo piang chhuak a nih chuan mawhphurhna leh tihtur hi kan nei vek mai a; kan tihtur leh mawhphurhna erawh chu a inang lo. Mi thatchhia emaw mi taima tak emaw pawh ni ila keimahni tawkah tihtur leh hmabak hi kan nei theuh a; chumi lak atang chuan tumah kan zalen thei lo. Kan dam chhung chuan tihtur, hmabak leh hmasawn ngai kan ni a; chuvang chuan kan hma zawn theuha tih tur leh mawhphurhna kan neih te hi hlen chhuak tura kum bul atanga kan rilru kan siam hi a va pawimawh em! Hetia awm mai mai ringawt hi Pathianin min siam chhan a ni lo a, a tir atang renga tihtur nei mihring kan nihna hi kan hlenchhuak tur a ni. Chu tihtur leh hmabak kan neihna chu kan hlutna, mihring kan nihna chhan pawh a ni. Engmah hmabak nei lo, ruihhlo ringawt buaipui leh sakhaw ngaihsak ngai miah lo kan nih chuan nun awmzia leh hlutna kan hre lo a; midang chu sawi loh keimahni ngei pawh hi kan inhlut lo. Chuvangin kumin chu tihtur lo nei ve phawt mai teh. 

Pathian tan eng nge ka tih ve ang?

Eng sakhaw be mi pawh ni ila, Pathian nei lo sakhua chu kan vang hle awm e. Pathian awm ring lo te kan nih ngawt loh chuan Pathian hnen atangin thil tam tak kan beiseiin kan duh a, malsawmna tin reng pawh kan duhin kan beisei a, kan dil thin. Chung kan dilna te chu Pathian pawhin min pe – kan dil loh te nen lam. Chutih mek lai chuan Pathian tan hian eng nge ka tih ve ang tih hi zawhna pawimawh leh kan tihve tur a ni. India rama Missionary ropui tak mai, Mizorama kohhran lian ber ber Pastor ho te Pathian thu zirna Senate of Serampore College (University), Kolkata awm dintu William Carrey khan, “ Pathian hnen atangin thil ropui tak beisei la, Pathian tan thil ropui tak tih tum rawh” tiin a sawi a. He a thusawi ropui tak mai hi vawiin thlengin mihringte tihtur pawimawh tak a ni. Pathian hi kan tana thil tha zawng zawng min tihsaktu atan chauh kan beisei tur a ni lo a, Pathian tan thil ropui leh tha tak tih kan tum ve tur a ni. Chuti ang rilru pu chuan kum bul tan ila, depression kan neih thin te leh zan mut theih loh kan neih te hi a dam phah duak hian ka ring a ni. Kumin chu Pathian tan eng emaw tak tih ve i tum teh ang u. 

Hmasawn belh zel

Tihtur tha tak nei, ti mek leh mi hlawhtling tak pawh kan ni ang. Chumi ringawta lungawia hmasawn tawh lo tur mihring chu kan ni lo a, kan dam chhunga hmalam pan zel tur kan ni. Tisa leh thlarau lam thilah pawh hmasawn zel tur kan ni a, ni tin hian hmalam kan pan zel tur a ni. Khawvela mi hausa leh mi ropui tak tak te hian an duham vang emaw chin tawk an neih loh vang emawa an hnathawh lai hi bansan phal lo an ni lo; hmasawn zel an duh vang zawk a ni. Vawiin thlengin khawvela mi hausa Bill Gates, Jeff Bezos, Mark Zuckerberg, Mukesh Ambani adt te hian hna an la thawk a; hmasawnna tumin tan an la sauh sauh tih kan hmu. Tirhkoh Paula, van ram kai tur chiangsa anga kan ngaih pawhin ni tin hmasawn tumin a beih thu leh hmalam a pan talh talh thu kan hmu a nih kha (Phil 3:14). Chutiang chuan hmasawn tawh sa leh mi hlawhtling tawhte pawhin tihtur neia an buai lai chuan keini phei chu mu mai mai hman kan ni lo tih sawi nawn a ngai awm lo e. Kumin chu kawngkhat tala hmasawn tumin tan la teh ang u. 

Pathian neih

Tihtur tha tak tak leh hmabak ropui tak tak kan neih te pawh hi a chang chuan kan ti thei lo a, kan hlawhchham a, vanduaina te pawh kan tawk thin. Mihring lama kan inbuatsaihna te chuan a tha vawrtawp pawh thleng mahse a titu tur mihring lam zawk chak lohna te, vanduaina leh thihna te pawhin min nang a. Kum 2020/21 chhunga kan ruahmanna ropui tak leh tha em em te pawh kha Hripui vangin kan ti thei lo bawk. Chutiang chuan mihringin kan inbuatsaihna piah lama kan thunun theih loh harsatna pumpelh theih loh kan nei thin a, kan tawng vek tawh bawk. Chung hunah chuan Pathian neitu nihna hlutna, Pathian hlutna leh Pathian rin hlutna a lo lang chiang thin. Kan thiltihtheih piah lamah Pathian a che thin a, chu chuan kan chunga thil thlengte pawm thiam dan min zirtir nghal bawk. Kan tih theih nia kan hriatah leh kan tih theih loh nia kan hriatah pawh Pathian hi ring tlat ila, lungawina kim kan hmu zel ang. 

Tih tur nei ila, tih loh tur pawh nei bawk ila, tisa leh thlaraua kan hmasawnna turin kumin hi Pathianin mal min sawm sak rawh se.