Exodus 3:14-na kan chhiar chuan Pathianin Mosia zawhna chhangin ‘AWMA KA NI’ tiin a hming leh a nihna a hrilh tih kan hmu a. He lai thu hmang hian kan thiam tawk tlemte hmangin Pathian hi tu nge a nih tih zir kan tum ang a; Pathian chuan Mosia hnena a nihna leh a hming a puanchhuah chu a pu zo reng em? Pathian chu a awm tak tak em tih te kan zir dawn a ni.
Tu nge i hming?
Mihring zingah chuan Mosia tluka Pathian dawr nasa leh hnaihchilh hi an awm tawh lo ang. Aigupta ram atanga Israel te hruaichhuak tura Pathianin Mosia a thlan khan Mosia khan chhuan lam hrang hrang siamin a pha tih kan hmu a. Mosia dinhmun atang hi chuan thil tih awm tak a ni a; an hunlai khawvelah Pathian an hriat dan a la tawiin pathian lem tam tak an be bawk a nih kha. Aigupta ho pawhin pathian lem tam tak an bia a, chuvangin pathian hming hriat kha a pawimawh em em a. Mosia pawh hian amah tirtu hnenah hian tu nge a hming tih kha a zawt a; mipuite hnenah Pathian hming sawi lan kha a pawimawhin a tul a ni tiin ESV Global Study Bible chuan min hrilh.
Pathian hming
Mosia’n Pathian hming a zawh khan Pathian chuan mi ropui leh thiltithei, Pathian chak tak leh ropui tak leh engkim siamtu a nihna kha sawi loin ‘AWMA KA NI’ tiin a chhang a nih kha. Hebrai ho chuan Pathian chu ‘YAHWEH’ an ti a, JEHOVA tia lam leh hman a ni bawk. Chu chu Sap hoin ‘Lord’ an ti a, keini Mizo te chuan ‘Lalpa’ tiin kan sawi a. Isarel fate hian Abrahama, Isaaka leh Jakoba Pathian chu be thin mah se a hming hi an la hre ngai lo a; chu chu Mosia hian a zawt chhuak ta a ni. Pathian hming chu a thianghlimin lam chhuah mai mai pawh a hlauhawm hle a; mahse Israel fate leh Aigupta mi te pawhin Pathian chu tu nge a nih tih an hriat theihna turin Mosia hnenah hian Pathian chu a inpuangchhuak a ni.
‘AWMA KA NI’
Pathian chuan “AWMA KA NI’ ti a a hming a puanchhuah rual hian Pathian nihna pawh kan hmu tel nghal a ni. Douglas Harper’s Etymology Dictionary-a kan hmuh dan chuan Pathian hming YHWH chu Hebrai tawng ‘Hayah’ tih atanga lo piang niin a awmzia chu ‘awm’ tihna a ni a. Awm, awm mek leh lo la awm zel tur tihna niin Pathian chu chutiang mi chu a ni tihna a ni bawk. John I. Durham, Hebrai leh Old Testament lama mi thiam, North Carolina, USA a mi lehkhabu ‘World Biblical Commentary, Exodus’ a kan hmuh dan chuan Pathianin Mosia hnena ‘AWMA KA NI’ tia a sawina Hebrai tawng kan en chuan Pathian chu tuna awm mek leh thil ti mek, la ti zo lo leh hman atanga vawiin thlenga awm leh nakin zelah pawh la awm tur a nih thu a in sawina a ni a. American mi Walter C. Kaiser Jr., Thuhthlung Hlui lama mi thiam pawhin helaia Mosia hnena Pathian inpuanna chu Mosia hnenah hian Pathian chu a awm tlat dawn a, tunah leh nakin zelah pawh a awmpui tlat dawn a ni. Pathian chuan a tirah chuan amah insawina atan mahni insawina tawngkam ‘kei/ka’ tih hlir a hmang a; a vawikhatna atan Mosia hnenah hian mi dang chanchin sawina angina ‘AWMA’ hmangin hun lo la awm zel turah pawh ‘AWM’ reng tur Pathian a nih thu kha a puangchhuak a ni. Chu chu Pathian hming – chatuana awm tur leh a nihna Pathianin a inpuanchhuah dan chu a ni. ESV Global Study Bible pawhin Pathian chu awma, awmmeka leh awm-zel-tura a ni a, a mi te tan rinawm takin a awm reng dawn tiin he lai thu hi a hrilhfiah bawk.
Pathian chu a awm zel em?
Exodus bu atang chauh pawh hian Pathian chu amah leh amah a insawi ang ngeiin Mosia leh Israel mipuite chungah chuan a awm zel a; Aigupta ram atangin Pharaoa kut ata a chhanchhuah dan te, kawng laka an ei leh in tur a ngaihtuah sak dan te, Tuipui Sen kan thu te leh Kanaan ram an luh thu te kan hre vek awm e. Chu chu vawiin thleng pawhin a la dik a, Israel ram pawh vawiin thlengin a la awm tih hre tute kan ni. Thuthlung Hlui atanga Thuthlung Thar, Lal Isua hun lai atanga vawiin thlengin Pathian chu kan zingah a la awm a; Mosia hnena a insawina ang ngeiin vawiin thlengin a la awm ta zel a, chatuan thlengin a la awm zel dawn a ni.
Vawiinah hian zawhna kan neih reng chu Pathian hi a awm tak tak em tih a ni a, ringhleltu leh a awm tak tak lo titu hi hman atangin vawiin thlengin khawvelah kan la awm zel a, kan pung telh telh bawk. Thiamna leh finna a lo sang a, thil kan chikin kan chhui kilkhawr tawlh tawlh a. A lang thei lo lai leh a kum kar zawng zawng thlenga phawrh chhuaha pho lan vek duhna khawvelah kan cheng tawh a; chutiang chuan thil kan ti tawh thin. Khawvel lo indin chhuah dan te, mihring thluak that dan leh kan ropui zia te hi kan hre thuk telh telh a, kan inpawm tawlh tawlh bawk. Chutianga mihring mihrinna leh finna vawrtawp kan neih chhoh mek lai chuan Pathian hi a awm em tih zawhna bawk hi kan tawp kharna a ni. Chu zawhna chu kan la zawh fo tur a ni tih Pathianin a hriat avangin Mosia hnenah pawh a hming leh a nihna inkawp chu a hrilh a ni.
Comments
Post a Comment