Rev. Dr. H. Vanlalauva lehkhabu ‘John Calvin-a Theology (Reformed leh Presbyterian Thurin Tobul)’ thlirna

Hripui leng vangin thil tih a harsa a; lehkhabu tlangzarh leh zawrchhuah chenin harsatna kan tawk a. July ni 26, 2021 zana tlangzarh, Rev. Dr. H. Vanlalauva lehkhabu ‘John Calvin-a Theology (Reformed leh Presbyterian Thurin Tobul)’ pawh hi mi tam takin lei kan duhin chhiar kan duh a; hripui avangin kan duh anga hmain kan nei thei lo zawk a nih kha. He lehkhabu hlu leh ro tling, chatuan nunna hawlhtlang thu pai sawifahna bu hi keini ang chuan a hlut zia leh a thuk zia hi kan sawi fiah thiam lo nachungin, kan thiam dan ang angin he lehkhabu hlu tak hi kan sawi dawn a ni.

Tu nge Rev. Dr. H. Vanlalauva?

Mizoram Presbyterian Kohhran leh Senate of Serampore College (University) hnuaia Pathian thu zirte chuan Rev. Dr. H. Vanlalauva hi an hre chiangin, inhmelhriattir a mamawh awm lo e. Mizoram Synod hnuaiah kum 28 rawngbawlin Aizawl Theological College-ah zirtirtu a ni a, kum 9 chhung (1999-2007) Principal a ni bawk. Kum 2007-08-ah Mizoram Synod Moderator niin a pension zui a. A pension hnuah pawh Theological College lamah Mizoram Synod tirhin Professor hna leh SATHRI Dean hna kum 2014 thleng a thawk a. Tun thlengin (2021) Aizawl Theological College-ah Adjunct Professor hna a la thawk a, Leitan South Kohhranah lawiin Leitan South, Durtlangah an awm. Fapa pahnih David H. Lalthangliana (MPS) leh Rev. Andrew H. Laltlanliana a nei a, fanu mal Rebecca Lalrinmawii (w/o Rev. R. Lalrinliana) a nei bawk. July ni 6, 2016 khan Rev. Dr. H. Vanlalauva hian a nupui duh tak Pi Lallianlianpuii chu a chan a; a nupui hriatrengna atan he lehkhabu pawh hi a siam a ni.

Rev. Dr. H. Vanlalauva hi a chanchin ringawt pawh lehkhabua ziah tham khawpa pa ropui a ni a; kan sawi vek seng lo ang. Kum 2016-2020 chhunga Aizawl Theological College-a Pathian thu kan zir ve chhungin Christian Theology leh John Calvin-a Theology min zirtir thin a. Zing dar 9:15AM -ah chiah class kan tan thin a. Pu Auva hi vawikhatmah a tlai ngai lo a, zing dar 9:15AM chiah chiah a lo lut thin a, second hnih khat bakin a tlai ngai lo. Tum khat pawh Synod programme pawimawh a nei a, minute 20 vel chauh min zirtir hnuin, tihtur pawimawh tak a neih avangin hemi tum hi chu amah hrethiam tura min ngenin class ala zo thei lo chu thupha zuk han chawi a! Pa inngaitlawm, mi zawng zawng zah kai leh mi dik em em, keini bulah mai mai pawh tlawm taka awm thin, Mizo pastor ropui berte zinga mi a ni. Pathianin damna leh hriselna tha pe zel se la, lehkhabu tha leh ro tling min ziah sak zel rawh se.

John Calvin-a hi tu nge?

Siamthat/Protestant Kohhrante zingah John Calvin-a hre lo hi chu kan awm awm lo e – a hming tal hi chu kan hre vek ang. Ruatlawk Thurin hi mi nawlpuiin John Calvin-a kan hriatna ber pawh a ni bawk awm e. Kum 1509, July ni 10 khan French khaw pakhat Noyon-ah a lo piang a. A hun laia Pathian thu thiam ber te zinga mi, kohhran siamthat hna thawktu ropui a ni a. John Calvin-a Theology hi Reformed leh Presbyterian Kohhran thurin Westminster Thurin innghahna, Baptist Kohhran thurin tobul, London Confession of Faith (1698) leh Philadelphia Confession of Faith (1742) te innghahna a ni bawk. Chuti taka kohhrante thurin innghahna pawimawh Pathian thu duang chhuaktu chu a ni a; Mizorama kohhran te tan phei chuan he lehkhabu hi chhiar hmaih chi a ni lo.

Lehkhabu leh a thupui

He lehkhabu hi phek 335 a chhah niin cheng 250 man lek a ni a, a paper leh a kawm/cover pawh a tha hle. Rev Dr. C. Lalhlira/ Lal Hlira Mizoram Synod Moderator ni mekin sawi hawnna leh duhsakna thuchah a ziak a, chumi zawhah chuan ziaktu thuhma a awm. He lehkhabu hi thupui 17 ah then niin sawifiah vek a ni. Senate of Serampore (University) hnuaia Bachelor of Divinity (BD) zirlaibu mila then a ni a; BD zirlaite leh BD zir tumte tan chuan chhiar hmaih chi a ni lo. Ngun taka zir ngai leh chhiar ngai lehkhabu a ni a, heti anga lehkhabu hlu leh ro tling ang hi chu a chhuak zen zen ngai lo.

Kohhran siamthat tulna leh Pathian thu chher chhuah dan

He lehkabu bung 1-4 chhungah hian Kohhran siamthat a tulna te, a hun lai khawvel te, John Calvin-a chanchin leh a rawngbawlna te, John Calvin-a’n Pathian thu a chher chhuah dan te kan hmu. Theologian/Pastor/Kohhran Hruaitute pawimawh zia leh kohhran kalsualna laka min vengtu tura Pathianin min pek leh ruat an nih zia te kan zirchhuak thei awm e. John Calvin-a hian Pathian thu a chher chhuah dawn hian Kohhran Pate thu ziak leh Pathian thu pawm dan te, Bible pawimawhna te a hre chiangin, a hun lai mite rilru put hmang leh ram leh khawtlang nun te a hrechiang a; chung chu Pathian thu (Theology) chherchhuahna atan a hmang a ni tih kan hmu.

Bible Thu neihna, Pathian Hriatna chungchang

He lehkhabu bung 5-6 -ah hian Bible thuneihna chung chang te, Pathian hriatna chungchang leh engkim chunga Pathian lalna leh thuneihna chungchangte John Calvin-a zirtirna atangin fiah takin kan hmu a ni. Bible hi Pathian inpuanna famkim, mihringte hnena La Isua chanchin leh chhandamna puanchhuahna a nih thu min hrilh a. Roman Catholic Kohhran te’n, khatih hun laia Bible aia Kohhran an dah chungnuna chhandamna pawh Pope thu thu a ni an tih kha dodalin, thuneihna tawp chu Bible thu hi a ni e tiin min zirtir a ni. Bible chu lehkhabu satliah a ni lo a, Pathian thu, Pathian Thlarau Thianghlim thawkkhuma ziah, Lal Isua Krista awmna a nih zia min hrilh a. Pathian chu a thilsiam – tlang, arsi, khawvel leilung adt ah inpuang chhuakin Lal Isua Krista hi Pathian inpuanna vawrtawp leh mihringin chiang taka Pathian kan hriattheihna a nih thu te kan hmu. Kan chhia leh tha hriatnaah pawh Pathian chu a inpuan thu kan hmu a; sakhaw nei miah lo pawhin a rilruah Pathian a awm tih hriatna hi an neih vek thu te kan hmu.

Pathian thuneihna, Ruatlawk Thurin

He lehkhabu bung 7-naah hian Pathian thuneihna leh engkim chunga rolreltu leh thuneitu a nih zia kan hmu a, chu chuan chhandamna thleng pawhin thuneihna a neih thu a keng tel. Pathian chu engkim chunga thuneitu, enkawltu leh roreltu a nihna kan hmu. Pathian chuan a thilsiamte chu a enkawlin a ngaihsak a, a thilsiamte chunga thil thleng zawng zawng pawh a hriatpuiin a hmu vek a; A thu veka thleng a ni tih kan hmu. Chhandamna chung chang thlengin Pathian thuneihna hnuai vek a nih thu kan hmu a; chhandamna chu Pathian remruat leh hnathawh, a ruat lawk leh bo thei tawh lo a nih thu kan hmu a. Mihringin ama duh thua chhandamna chang thei emaw bosan thei emaw a nih lo zia leh Pathian khawngaihna leh remruatna atanga chhandamna chang thei chauh kan nih zia kan hmu.

Isua Kristia leh Thlarau Thianghlim nihna leh a hnathawh kan hmu

He lehkhabu bung 8-9 –ah hian Lal Isua Krista chanchin leh a hnathawh te, Thlarau Thianghlim pawimawh zia te kan hmu. Lal Isua chu mihring leh Pathian famkim a nihna te, chhandam kan nih theihna tura palai a nihna te kan hmu a. Thlarau Thianghlim chung chang leh a nihna, a hna thawh leh a pawimawhna chiang takin kan hmu bawk. Thlarau thianghlim chu Pathian atanga chhuak, chhandama kan awm theihna tura min tanpuitu, Kohhran min awmpuitu leh Bible ziahna tura puitu a nih thu kan hmu. Thlarau Thianghlim chu Pathian, Bible min hriattirtu a ni a, Bible thu kalha Pathian thu sawi leh hril te hi Thlarau Thianghlim hnathawh a nih loh zia kan hmu bawk.

Trinity, mihring leh sual thu, chhandamna

Pathian pakhata mi nung pathum, Mihring leh sual thu leh Chhandamna thu te hi he lehkhabu bung 10-12 ah hian kan hmu bawk. Pathian hi amaha mi nung pathum awm a nihna te, mihringte hi suala kan tluk luh hnua kan awm dan te, chhandam kan ngaihna leh chhandama kan awm theihna tura tul leh mamawh te chiang taka tarlan a ni. Kan duhthlanna leh theihna hmanga chhandamna chang thei kan nih loh zia leh, Pathian khawngaihna vang chauha Lal Isua Krista kaltlanga rinnaa chhandam kan nih theihna thu he laiah hian kan hmu chiang hle.

Kohhran chungchang, Kohhran rawngbawlna, Sacrament, Hun hnuhnung leh Vantlang chhandamna

He lehkhabu bung 13-17 ah hian Kohhran nihna dik tak te, kohhran dik leh dik lo tehna te, kohhran rawngbawlna thuang pali te, nemngheh rawngbawlna leh kohhran inrelbawl dan tur te kan hmu. Sacrament awmzia, a pawimawhna, Baptisma Sacrament leh Lalpa Zanriah Sacrament chungchang thu te kan hmu bawk a. Kristiante thurina pawimawh ber pawl – hun hnuhnung thu pawh chiang takin kan hmu bawk. Hnam leh khawtlang siamthatna kawngah te, ei leh bar zawnna leh ram rolrelna kawngah te Kristiante hian mawhphurhna lian tak kan neih ve zia he lehkhabuah hian kan hmu bawk a ni.

A tawp berah hian he lehkhabu tlipna thu hi kan hmu a, a khaikhawm kim tha hle. Rev. Dr. H. Vanlalauva lehkhabu hlu tak mai hi sawisel bo khawpa famkim erawh a ni bik lo a; chhut sual neuh neuh hi hmuh tur a awm ve bawk.

Eng vangin nge vanduaina kan tawh? Eng vangin nge ni tin chhandam loh mihring an thih? Pathian hi engtin nge a awm tih kan hriat? Trinity hi eng nge? Ruatlawk thurin chu eng nge? Pathian hi tu nge? Kohhran hlutna leh nihna hi eng nge ni? Kristiante hi Politics-ah kan inrawlh ve dawn em?

Chung zawhna zawng zawng chhanna lehkhabu chu hei hi a ni e. Heti anga lehkhabu hlu leh ro tling hi a chhuak zen zen ngai lo a, lei la, chhiar la, tisa leh thlarauah hlawkna i chan belh ngei ang.