Thuthlung Thar bu pali kan neih zingah Chanchin Tha Marka ziak hi Chanchin Tha ziak hmansa berah mi thiamte chuan a ngai a. Marka ziakah hian chang 678 a awm a, chumi zinga chang 623 aia tam hi Matthaia hian Chanchin Tha bu ziahna atan a hmang chhawng a, Luka hian chang 328 vel hi Marka ziak mi a hmang chhawng bawk tiin Bible zir mite chuan an sawi a. Matthaia leh Luka te hian Chanchin Tha ziahna atan hian Marka ziak hi thu lakna hnar berah neiin an ziah belh niin an ngai. Chuvangin Marka ziak hi Chanchin Tha bu pali te zingah chuan ziak hmasak ber niin an ngai a ni.
Tu nge Marka?
Lal Isua chanchin, Chanchin Tha bu ziaktu Johan Marka hi Juda mi kristian, Barnaba tupa, Jerusalema-a mi awm thei tak Mari fapa niin a lang a (Tirh. 12:12, 15:37), Tirhkoh Paula ten en pawh rawng an bawl tlang thin niin a lang (II Tim 4:11). Marka hi Petera tawng letlingtu niin Petera’n Lal Isua chanchin a hril atangin Chanchin Tha bu hi a ziak niin Eusibias-a chuan a sawi a. Hieropolis, tun laia Pamukkale, Turkey khaw Bishop Papias-a chu mi duhtui leh thil finfiah duh mi leh ziaka awm ringawta lungawi lo, a hrechiang te tawngka leh thusawi ngei hre duh khawpa pa fir a ni a. Marka ziak Chanchin Tha bu pawh hi Marka ziak ngei a ni em tih fiah hre fiah turin Upa Johana, Lal Isua zirtirnate lo dawng sawngtu chu a va zawt fiah ngat a ni tiin Eusibias hian a sawi. Ireneus-a chuan AD 180 velah khan Chanchin Tha bu ziak a nih dan hrang hrang a ziak a; Tirhkoh Paula leh Petera te thih hnuah, Petera rawngbawlpui leh tawng lettu Marka chuan Petera thusawi behchhanin Lal Isua chanchin a ziak niin a sawi bawk. Rom mi Kristiante khan Petera thuhrilte ziak turin Marka chu an ngen tiin Kohhran pate – Origien-a, Clement-a, Tertulliana leh mi dangte chuan an sawi.
Lal Isua hi mihring a ni
Marka ziakah hian Lal Isua chanchin hi a nih ang taka tarlan niin mihring pangngai a nihna pawh a lang hnem hle. Chanchin Tha bu dangte nena khaikhin phei chuan Marka hian Lal Isua mihrinna hi a tarlang tam ber a ni. Matthaia leh Luka te chuan Chanchin Tha an ziah hian Lal Isua chanchin hi an thup mawi hram hram a, Pathian a nihna lam lang sar zawkin an ziak thin. Marka erawh hi chuan thup leh zep nei loin Lal Isua nihna hi a ziak chhuak hmiah hmiah a; Lal Isua mihring ze tam tak pawh Marka hian a ziak lang hmiah hmiah mai a ni. Matthaia chuan Lal Isua hi ‘thingrem siamtu fapa’ tia a sawi laiin Marka erawh hi chuan ‘thingrem siamtu’ (6:3) tiin a sawi mai a ni. Lal Isua thinlung leh ngaihtuahna mihrin zia hi Marka anga ziak hi an awm lo hial awm e. A zirtirte chungah pawh Lal Isua hi a lungawi lo tih te (10:14), thinur chungin Pharisaite pawh kha a melh a ni tih te (3:5), mipui tam tak te pawh kha a khawngaih em em a ni tih kan hmu bawk (6:34).
Ril tam thin Lal Isua
Mihring famkim a nih miau avangin Lal Isua Krista pawh hi a ril a tam tih kan hmu. Bethani khua a chhuahsan hnuah a ril a lo tam a, hmun hla taka awm theipui kung, a hnah pawh duah hluah mai chu Lal Isua hian a hmu a, a rah ei tumin a va pan a. Ril tam tak leh chau taka theipui kung a va pan chuan rah a lo chhuah si lo a, Isua thinrim ril tam hian theipui kung hi a hau hlum tih a nih kha. Matthaia chuan helai thu hi thup ang reng takin a ziak a, Marka erawh chuan theipui hi a rah hun a nih loh thu a sawi. He ta tanga lo lang chu Lal Isua mihring zia – ril tam thinchhia, theipui rah hun lo napui a ril tam avanga hau hlum a nih thu kan hmu chiang hle. Lal Isua hi nang leh kei anga mihring awm, ril tam thei, thinchhe ve thei a nih zia a lang chiang hle.
Chawlh hahdam mamawh Lal Isua
Lal Isua hian chauh chang a neiin chawlh hahdam a mamawh thin tih Marka ziak atang hian kan hmu bawk (6:31, 4:38). Mipui sangnga an hrai hma khan zirtirte nen khan chawl hahdam turin thlaler an pan tih kan hmu a; chaw pawh ei hman lo khawpa mipuiin an zim buai avangin Lal Isua hian a zirtirte nen khan chawlh hahdam a duh a ni tih kan hre thei. Zirtirte nena lawnga an chuan laia thlipui a lo tleh pawh khan Lal Isua chu lawng mei lamah awmin a muhil tih kan hmu. Matthaia leh Luka te chuan Lal Isua mutthilh thu hi an ziak ve tho a, Marka hi chuan lukham kham meuhin Lal Isua mutthilh thu hi a ziak a nih kha. Thlipui vanga tuifawnin lawng a tihbuai a, zirtirte pawh an mangan em em laia lukham meuh nena muhil thei Lal Isua hi a taksa a chau ve tawngkhawng a ni ang tih chu kan hre thiam vek awm e.
Mi lungngai thei Lal Isua
Krawsa khenbeha thihna hmachhawn tur a nih meuh chuan Lal Isua pawh a lungngaiin Gethsemane huanah khan a lungngai hle tih Marka ziakah chuan kan hmu a (14:32-40). Matthaia chuan Lal Isua lungngaihna hi a sawi tam lo a, Luka phei chuan Lal Isua lungngaihna tawngkam phei hi chu a tarlang lo. He mi tumah hian Lal Isua hi a mangangin a lungngai em em a, vawi thum ngawt a tawngtai tih kan hmu. Marka ziak atang hian Lal Isua Krista hi nang leh kei anga mihring nihna famkim nei, lungngai thei, he khawvela awm ve ngei leh cheng ve ngei a nih zia kan hrechiang awm e.
Lal Isua Krista Pathian zia
Lal Isua Krista mihring nihna tam tak kan hmuh rualin Marka hian Lal Isua hi Pathian fapa ngei a ni zia a ziak kan hmu tam hle bawk. Lal Isua chanchin a ziak bul tannah ‘Pathian fapa Isua Krista Chanchin Tha..’ tiin bul a tan nghal tih kan hmu (1:1). Ramhuai te pawh khan Lal Isua nihna an puanchhuah pawhin ‘Nang Pathian fapa chu i ni..’ tiin an au thin tih Marka hian a ziak (3:11, 5:7). Sipai za hotu pawh khan Lal Isua chu Lal Isua a thih khan Pathian fapa a nih zia kha a hrehiang hle tih Marka hian a tarlang (15:39). Baptisma a chan lai leh hmel danglamna tlangah khan Pathianin Lal Isua Krista chu ‘Ka fapa’ tiin a ko tih Marka hian min hrilh bawk (1:11, 9:7). Lal Isua thihna leh thawhlehna chu chhandamna tur a nih thu te (10:45), Sabbath serh leh dan pawh palzut thei a nihna te (2:28) adt, hi Marka hian Lal Isua Krista hi Pathian fapa a nih zia a tarlanna a ni.
Comments
Post a Comment