Ka pu Dak Pu

Hripui leng avanga mi an tawmim em em lai pawhin ka pu kha chuan kan khaw dung a suar tluan ziah - Dak Pu, Lehkha semtu kha a ni miau si a! Kan hriat theih tirh atanga Lehkha semtu a nih tawh avangin ka pu chuan kum 30 aia tam lehkha a sem tawh a, a taima lutuk hi kan hau zawk thin! Lehkha thiam pawh a ni lo a, ziak leh chhiar thiam tawk tawk niin a lehkha sem tura hming inziak kha a chhiar thiam sawih sawih a, chu chu a eizawnna atan chuan a tawk der! A bak zawng chu a taimakna leh a inpekna kha a ni tawh mai.

Hripui leng avangin khualzin an tlem a; chu chuan Dak In a ti lun a, dak pu mawhphurhna a sang zual hle. Social Media kal tlanga ‘soft copy’ a inthawn vek thei loh thil, lehkha leh eng eng emaw thawn ngai a lo awm a. Chung avang te chuan ka pu pawh chu khaw lun leh lian taka Dak Pu a nih vangin kar tin hian lehkha sem tur a nei reng a. A sem loh tum pawhin phone hmangin an lehkha thawn chung chang chu an lo zawtin an lo um zui reng thin. Chuti ang hunah chuan ka pu chuan lehkha sem chung changa an harsatna te, theih tawp chhuaha hma an lak thute chu zaidam takin a lo hrilh thin a. Zawhna lo zawttute chu mize inang lo tak tak, thinchhe deuhte, zaidam deuhte, phungthlu tak leh tawngkam chaldelh tak takte pawh an awm nawk mai a; mahse ka pu chuan zaidam leh dawhthei takin a lo chhang thin.

Kan khua chuan Tokyo Olympic 2020 a tel pha nula pakhat kan nei a, duhsakna leh lawmpuina chi hrang hrang bakah lehkha pawimawh tak tak a dawng nasa em em a. Ka pu pawh chuan chu nula lehkha dawn – Mizoram chhung leh Central India atanga a dawnte leh foreign atanga a lehkha dawnte thlengin a va pe thin a. Chung lehkhate chu a chhunga thute chu hre ve lo mah ila a pawimawhin a hlu hlawm hle ang tih erawh chu kan ring thiam ve mai. Ka pu danglamna chu, mi pawimawh tak leh mi naran ve tak pawh nise, an lehkha tur chu phur taka pein a ngaihpawimawh dan a in ang reng thin.

Hripui lengin Mizoram a tuam a, kan khua pawh min kal kan hauh lo. Home Quarantine, First Contact, Mask, Sanitizer, Positive, Total Lockdown, Covid -19, VLTF, Swap Sample adt tih te chu Sap tawng a ni tih pawh hre loin kan Mizo tawng hman hmiah hmiah tawh a. Ka pu Dak Pu, Sap tawng thiam lo pawhin a Mizo tawng upa sawi hmiah hmiah tawh mai a ni. Chuti ang tak chuan keini khua pawh chu hripuiin min nuai a, chuvangin kan khaw nula chhuan vawr, Tokyo Olympic 2020 a tel pha ngat, India ram pawhin an ngaihzawn rawn chu duh anga ropui leh hluin kan chawimawi thei lo a. Social Media leh Phone kal tlangin kan lawmpuiin kan chhuan zia chu kan sawiin amah pawh kan va hrilh a, chu chu kan tihtheih san ber a ni rih mai.

Hripui leng leh Furpui chuan khua chu a tuam a, kawng chhia leh leimin avangin lehkha thawn pawh a kal sawt loin ka pu pawh an lo zawt zing malh malh hle a. A chang chuan lehkha chu kan sem chhawk a, kan awl hram hram thin. Amah hi pa taima, lehkhahtawn sem hi a rawngbawlnaa ngaia rinawm tak sem thin mi a ni a. Lehkha a hmuh rual rualin laklawh pawh sawi loin a sur a sa hnuaiah pawh lehkha sem nghal zel thin a ni a, hmahmawh lutuk lo turin keini pawhin kan hau fo a - a sim thei chuang lo. Hna kan thawh avangin in lamah kan awm lo fo a, chutiang huna lehkha sem tur a lo thlen tawh chuan ka pu chuan a lo sem nghal thuai thuai a, chawhnu pum te hi chuti ang chuan hun a hmang thin.

Ruah sur nasa leh kawngchhia, chu achhapa hripui leng nen chuan lehkha lo kal vel chu a muang ang reng hle mai a. Phone hmangin ka pu chu an lo zawt fo a, ka pu chuan an harsatna tawh dan chu dam takin a lo hrilh thin a. Lehkha chu a lo thlen hun hunah an sem chhuah nghal tur thu leh an ngaihpawimawh tur thuin a hrilh hlawm a. Ka pu pawh chu Hripui laka a him theihna turin leh a hriselna ngaipawimawh hmasa ber turin kan chah ngunin kan theihtawpin kan enkawl ve a, ani pawhin thu a awih hle.

Tumkhat chu ruah a sur buan buan a, kan inah chuan ka pu sem tur lehkha thawn eng emaw zat chu an lo dah a, a tam zawk chu speed post hmanga lo thawn an ni hlawm. Envelope sen, cheng 10 man chi, mi lem lu chuang pakhat hi a lo awm tel ve a. Chu lehkhathawn chu a tet hrip hrep tawh a, Mizoram chhim tawp atanga lo thawn niin a kawma kut ziak lo lang atang chuan naupang kut ziak ni awm tak a ni a, kan nula chhuanvawr, Tokyo Olympic-a tel pha ngat lehkha tur a ni. Chu lehkha chuan ka pu mit chu a la hmasa ber a, envelope tet hrip hrep tawh, ruah surin a nan hnawn zawp lek leh tawh chu lain thuk mei lum bulah chuan a hem lum vat vat a.

Ruah a sur chuan han mai a tum lo a, khaw eng ut hnuaiah chuan a sur buan buan a. Ka pu chuan a nihliap dum lian zet chu lain lehkha sem tur chu a ip hman than em emah chuan dahin a chhuak ta a. Kan nula chhuanvawr em em te in lam pan chuan ka pu chu a kal ta vang vang a, envelope tet hrip hrepa tuam lehkhathawn kha a ngaipawimawh ber a ni ngei ang. Hetih lai hian keini chu hnuh kuaiin hlo kan thlo a, ruah sur avangin thlamah kan chawl a. Ka phone chu a lo ri ral ral a..

“….khawiah nge in awm? Inah in awm em?

“Hlo thloin kan feh a..eng nge ni ta?”

“A…eng em em ni lo e…I pu lehkha sem hi a che sual palh a…”

“E khai a! Engtin tak nge a awm tunah? Khawiah nge in awm mek? Engtin maw a chetsual dan tak?”

“Ruah sur kawng nalah a tlu palh a…a lu a tauh a…tunah hian Damdawi Inah kan kalpui mek a..a la harh lo a…in lo nghal theih chuan a pawi lo ang”

Kan theih anga rang chuan in lam panin kan haw nghal a; rang taka inbualin Damdawi In lam ka pan nghal a. Ka pu chu ka nu leh pa chuan an lo awm pui a, a lo rum tiah tiah leh nghal a. Ka pu ka va hnaih a, ka va ko a, rei lo te hi a lo meng a..

“Naupang lehkhathawn kha kan nula chhuanvawr hnenha khan min va pek sak ta che…ip te…”

A sawi zawm thei lo a, a maimitchhing a, ka mittui a hnam sawk mai. Nurse leh Doctor te an lo kal vat a, ka pu chu ICU –ah an nawr lut ta a.