Pathian laka ro chan kan neih hlu ber chu kan fate hi an ni tih Sam 127-ah kan hmu a; Deuteronomy 6:7-ah Israelte hnenah khan an fate chu Pathianin a thu zirtir ngun turin a chah tih kan hmu bawk. Thufingte 22:6-ah pawh naupang chu zirtirna dik pe tura hrilh kan nih thu kan hmu a; Exodus 20:12-ah chuan naupangin kan nu leh pate kan chawimawi chuan malsawmna leh damreina pek kan nih tur thu kan hmu bawk. Chutih rual chuan Bible hunlai khawvelah leh vawiin thleng pawh hian naupangte kan dah pawimawh tawk lo fo thin a; Lal Isua’n naupangte a hmuh dan behchhanin vawiinah hian naupang chungchang hi kan thiam tawkin kan zir ang.
Lal Isua hun laia naupang dinhmun
Bible leh Lal Isua hunlai khawvelah hian naupang leh hmeichhiate hian ngaihpawimawh an hlawh tawk loin mihring tam lam chhiarnaah pawh an telh khat hle a. Chanchin Tha bu pali – Matthaia, Marka, Luka leh Johana - te hian Lal Isua’n mipui 5000 a hrai thu kha an ziak theuh a; chutihlaiin an tam lam mipui 5000 hi patling zat chauh an ni a; naupang leh hmeichhia an chhiar tel lo. ESV Global Study Bible-in min hrilh dan chuan – hmanlai hunah khan naupangte hi an tha chhawr theih an nih hma chuan chhungkaw tana phurrit angin ngaih an ni a, chuvangin an langsar ngai lo.
II Lalte bung 5-ah khan Suria lal Sipai hotu Naamana chu phar a ni tih kan hmu a, a phar natna damna tura Zawlnei Elisa kawhhmuhtu kha Israel ram atanga sal atana an man hmeichhe naupang a ni a. He naupang hnathawh hi a ropui the lul nen a hming hi kan hre thei ta lo a nih hi. Lal Isua deh atan leh tawngtaisak tura Lal Isua bula naupang an lo hruai pawhin Zirtirte kha chuan an lo hnar tih kan hmu bawk (Matt. 19:13). Mizote pawhin naupangte chu ‘uite rim in nam’ tiin an lo hnar tawh thin a nih kha.
Lal Isua leh naupangte
A chunga kan tarlan atang khian hmanlai khawvelah khan naupangte hian ram leh hnam, sakhuanaah hmun pawimawh an chang ngai lo hle tih kan hre thei a. Lal Isua erawh chuan naupangte kha a ngaipawimawhin a ngai hlu hle a; a hunlai khawvelah khan Judai rama sakhaw zirtirtu/hruaitu dang zawng zawngin naupang an hnarin Lal Isua rilru ang hi naupangte chungah an pu ve ngai lo niin ESV Global Study Bible chuan min hrilh. Zirtirte’n naupangte khan an hnar laiin Lal Isua erawh chuan naupangte kha a ko a, mal a sawm tih kan hmu a, tehkhin thu ropui tak sawifiahna atan nuapangte kha Lal Isua’n a hmang zui tih kan hmu.
British Pathian thu thiam Frederick Fyvie Bruce (F.F Bruce) chuan, “ Lal Isua zirtirte chuan Lal Isua khawih tura naupang an lo hruai chu Lal Isua hun hlu tak lak heksak luihnaah an ngai a. Mahse chuti anga hautute chuan Lal Isua hauh an tawk zawk a ni. Marka hian Lal Isua thinrimna a tarlan tlemte zinga pakhat chu naupang an hnar hi a ni a, a chhan pawh a ngaihnawm hle. Naupangte thlarau dihmun aia pawimawh thil tam tak awmin kan ngai mai thei a, mahse Isua chuan a ngaihlu em em a, kan tan inzirna tura entawn atan a chhawp fo zawk a ni,” tiin he lai Bible chang hi a sawi fiah a ni.
Van rama mi ropui ber chu naupang anga inngaitlawm
Lal Isua zirtirte khan Lal Isua dam lai khan Lal Isua zirtirna leh a thusawi awmzia kha an hre fiah nghal vek bik lo a; Lal Isua pawh khan kawvel ram leh hman inrelbawlna thila hotu ber angin an ngai a, ropuina, zahawmna, chawimawina leh thuneihna kha Lal Isua zuitu nih lawmmanah an duh a ni tih ESV Global Study Bible chuan min hrilh a. Chutiang rilru an put avang chuan ‘Vanramah tu nge ropui ber ang?’ tiin an inhnial ta reng a nih kha (Matt 18:16). Chu an buaina chinfelna tur atan chuan Lal Isua hian an ram leh an sakhaw thila mi ropui lo leh langsar lo nuapang bawk kha tehkhin thuah a hmang leh mauh mai! Ropuina leh chawimawina um mihringte chuan Vanramah chan kan nei lo ang a, naupang anga inphahhniam leh rilru thianghlim nei, mi dangte tana rilru leh ngaihtuahna seng mi chu Vanramah mi ropui ber an ni ang tiin Lal Isua’n a zirtirte kha a hrilh a nih kha.
Ropuina leh chawimawina uma rawngbawl emaw, min tlin lohna leh that lohna hmu reng thin rawngawltu tanVanramah khian chan tur mumal a awm lo tih Lal Isua’n a sawi chiang hle mai a. Naupang rilru thianghlim tak anga awma rawngbawl tur kan nih zia Lal Isua’n min hrilh hi kan hriat chian nawn a tha hle mai.
Naupangte hmangaihtu Lal Isua Krista
Lal Isua Krista hi khawvela rawng a bawl laiin mitthi pathum a kai tho a, chung zingah chuan Jaira fanu hmeichhe naupang kum 12 a upa a tel tih kan hmu (Mk 5:38-42). Lal Isua hian Juda sakhaw dana thiang lo – mitthi taksa khawi chu tenawm leh thiang lo a nih laiin Jaira fanu thi tawh taksa chu hmangaihna leh khawngaihna avangin a khawih a, thihna ata a kai tho tih kan hmu. Lal Isua hian Juda sakhaw ngaipawimawh loh thil hi a ngaipawimawhin naupangte pawh a dah hlu hle tih kan hmu thiam awm e.
An ram leh an khawtlang nuna mi pawimawh lo leh lang sar ve lo, ngaihsak hlawh lo leh mi chuang tlai anga ngaih naupangte kha Lal Isua rawngbawlnaah hian an tel ve a, hmun pawimawh tak an chang tih hi kan zirchhuah tur pawimawh tak a ni. Naupangte chunga kan mawhphurhna hi a len zia kan hriat nawn a ngai hle.
Lal Isua’n naupangte a ngaihpawimawh dan kan zir atang hian keini pawhin kan theihtawp chhuaha nuapang enkawl leh kaihhruai hi kan mawhphurhna, Pathian thu pek a ni tih kan hriatchian nawn a tul hle. Kan ram leh hnam lungphum hmasa ber chu vawiina naupangte hi an nih zia kan hriat a tul hle. Sorkar leh Kohhran pawhin naupang a ngaipawimawh em em tawh a; keni nu leh pa leh chhungkua pawhin naupangte hi ngaipawimawh zual ila. Kan ram leh hnam, kohhran leh mimal dinchhuahna tura bul tan dikna hmasa ber chu naupangte hi kawng dikah Pathian thua kaihhruai leh enkawl tlat hi a ni tih i hre nawn ang u.
Comments
Post a Comment