Pawl khat zirlai naupang atanga Master Degree thlenga vawiina zirlai ni mekte hnenah hian fuihna thu sawi tur hian mi ropui leh mi thiam ka ni lo a; lehkhathiam lo tak ka nih avang zawkin fuih ka duh a, hrilh duh ka nei a ni. Muangleia sikul kan kal theih lai pawha kan duh khawp thiamna kan neih theih mang loh laia Hripui leng kara ‘online’ a sikul kal mek zirlai duhawm tak tak leh lehkhathiam em em te hnenah hian nasa taka lehkha zir pawimawh zia hi sawi nawn a tul a, nu leh pate pawhin kan ngaihtuah tel a ngai a ni.
Hripui khawvel
Kan tum loh leh rinlawk loh lutukin kum 2019 December thla atangin Hripui lengin khawvel a tibuai a, kan nun phung pangngai leh kan hun hman dan zawng zawng min nghawng dan hi kan hre vek a. Nunphung pangngaia nun tumin Kohhran leh Sorkar, kan zavaiin kan tangrual taknain chuti mai chuan kan ziaawm mai thei dawn rih lo tih a lang a. Heti ang hian eng chen nge kan awm dawn kan hre lo a, Hripui hian eng chen chiah nge min tihbuai dawn kan hre lo. Chutih rualin engkim chawlhsana Sepui ruah tuar ngawt ngawta awm thei kan nih loh avangin Hripui khawvel hnuaiah kan theih ang angin hma kan la a, zirna pawh kan chhunzawm hram hram a nih hi.
‘Online Class’
Thingtlang kilkhawr bera sikul naupang nei chhungkaw tan pawh he Sap tawng hi mikhual a ni tawh lo a, khawvel puma Sap tawng kan hman rim ber pawl a ni mek ang. Kan awmna leh kan chhungkaw dinhmun a zirin kan ‘online’ sikul kal dan chu a in ang vek lo ang a, kan harsatna leh kan awlsamna dan pawh a in ang vek lo ang. Hripui leng mahse kum leh hun a ral lo thei lo a, zirna sikul pawh kan theih dan ang anga chhunzawm angaih miau avanga hetianga lehkha zir chhunzawm hi kan ni a. A hlut zia leh a pawimawh zia hi kan hriat thara kan ngaihhlut hi a ngai hle mai.
Zirai naupangte mawhphurhna
Sikul pindan chhungah lehkha kan zir theih rih loh avanga hetianga sikul kal chhunzawm hi kan ni a, zirlai naupangte hian kan ngaihpawimawh a tul hle mai. Khawl thil leh Internet kaihhnawihte a nih avangin harsatna kan nei thei e, chu erawh chu kan sawi phak ni se la. ‘Online Class’ kal mekte hian hna dang thawk pahte, ngaihthlak satliah mai mai leh run dal chauha va chhim loin rilru leh tih takzeta kan ngaihpawimawh a tul hle mai. A tlangpui thuin zirtirtute hi chuan thahnemngaitakin an sikul naupangte hi lehkha an zirpui a, tihturte an pein zawhna pawh an zawt taima hle. Zirlai naupang zawkte hian kan namnul a nih chuan nakinah kan tuar dawn a, chuvangin sikul pindan chhunga lehkha kan zir ang chiaha ‘online class’ ngaihpawimawh hi kan bat leh kan tihtur, kan mawhphurhna a ni. Nu leh pate pawhin kan fate hun awl tha tak siam sak ila, kan theihtawp chhuah pui ang u.
Mark tha, mahni tha lo
Hripui kara sikul naupang result hi a tha hlawm hle a, mark pawh an hmu sang hle tih kan hre vek a. Kan mark hmuh hi kan phu em? Kan mark hmuh tlukin kan thiam em? Miin kan zirlai kaihhnawih min zawt se, ‘Google’ tel loin kan chhang nghal thei em? Zirlai ni mekte hian mahni theuh in zawt ang u. Exam leh a kaihhnawih class test leh a dangte hi mahni inlum atanga kan tih a tul miau avangin exam hall boruak nen chuan a in ang loin kan tang nep tih hi thudik tak a ni. Hetiang a nih avang hian kan marksheet-ah chuan kan ‘A’ fur hlawm a, subject tina mark kan hmuh pawh a tha hlawm hle. Tun hnai maia Mizoram University hnuaia Graduate tharte result kha a tha hle a nih kha. I certificate-a i mark hmuh phuin zawhna i zawh ngam em tih hi infiah la, belhchian tlak kan nih tak meuh em tih in en chiang ang u. Marksheet ena mahni zirlai hre vek tura ngaih, zawhna min zawha chhang thei lo kan nih leh si chuan kan in enfiah a ngaiin zak tur kan ni.
Copy Paste Zirlai
Pathian zara kan kum a lo upa a, kan lehkha zir degree phua kan thiam leh si lo hi a pawi zia hretute kan ni a; chuvang nang chu lo ni ve suh. Tun lai khawvela inelna san tawh ziate, Sorkar hna tawh tur van tawh zia leh mi kan in tlansiak nasat tawh ziate hi hre chiang nawn ila. Chutiang inelna khawvela kan chen tawh laia Google-a mi copy paste tawpa hlawhtlinna kan chang a nih chuan miin min nuihzat ang a, keimahni ngeiin hreawm kan ti ang. Pathian thu kan zir laiin kan thianpa pakhat chuan internet-a mi eng emaw copy paste mai theih pawh kha a Laptop-ah khan a chhu chhuak vek zel a. A chhan ka zawh chuan, copy paste tawp ai chuan ziah/chhut zawh khan kan hrechiang zawk a ti a, a sawi dik hle. Graduate leh Master Degree lai nei sia kan zirlai kaihhnawih min zawha sawi tur mumal hre lo kan nih chuan hlawhtlinna tak tak hi kan chang ve ngai dawn lo. Chuvangin lo hah zual la, lehkha lo chhiar ngun la, i mark hmuh aia tam zawhna leh chhanna hria zirlai lo ni teh. Lehkhabu leh chanchinbu chhiar ngai lo zilrai nih te hi hlau ila, i zak ang u.
Social Media - Facebook, Instagram leh Twitter-a likers leh followers ngah loh kan hlauh aia nasain kan marksheet-a mark inziak zat phu lo zirlai nih hi i hlau zawk ang u. Likers leh followers ngah, lehkhathiam bawk si, hmeltha bawk si, fing bawk si leh Pathian thuawih em em zirlai ni turin kan theihtawp i chhuah teh ang u.
Comments
Post a Comment