Zawlnei hi tunlai khawvelah an la awm em?

Khawvela harsatna leh buaina kan tawh chang te, khuarel chhiatna leh hri lengin min nuai mek lai te, Kohhran te kan hlima kan lawm em em lai te hian Pathian hnen atanga thuchah dawnga Zawlnei anga thil lo thleng tur leh kan hmalam huna kan awm dan tur hrilhlawkna ang chi kan hre fo thin a, thil thar a ni lem lo. Heti anga hrilhlawkna ang chi hi thleng dik tawk te, lo la thleng lo leh thleng dik ta lem lo te pawh a awm nawk a, Mizo zingah pawh Zawlnei anga thil sawi leh hrilhlawk thin hi an awm a, kan hre fo a, kan la hre zel bawk ang.

Tute nge Zawlnei? 

Mizo tawng Zawlnei kan tih chuan, Sakhaw thil nena inzawm, Pathian hnen atanga hriattirna, thuchah, zilhna leh thil lo thleng tur sawi lawka mipuite zirtir thin Isaia, Ezekiela, Jeremia adt te ang kan sawina hi a ni a. Bible-in Zawlnei a sawi hmasak ber chu Abrahama a ni (Genesis20:7). Amosa 3:7-ah chuan Pathianin a rawngbawltu, zawlneite hnenah chuan thuruk hrilh loin engmah a tih dawn loh thu kan hmu a. Numbers 12:6-ah chuan Pathian chu zawlnei hnenah  chuan inlarin a inhriattir ang a; a mumangah pawh a biak tur thu kan hmu.

Zawlnei chu Pathian hnen atanga thuchah dawngtu, hun lo kal tur hrilhlawktu emaw chhiatna lo thleng tur sawi lawktu emaw zilhhauna leh simna thuchah kengtu emaw hi a ni tih kan hria a. Zawlnei chu mihring leh Pathian inkara palai, roreltu leh thuchah kengtu tiin kan sawi thei ang.  Pathian atanga chhuak ni lo hrilhlawkna, thuchah leh thil lo thleng tur sawi lawk emaw hmu lawk emaw chu Zawlnei an ni thei lo tihna anih chu. 

Zawlneite hnathawh

Bible kan chhiar chuan Pathianin mihringte hi hmaichhanah a be ngai lo a, Zawlnei kal tlangin a be thin tih Thuthlung Hluiah kan hmu a. Pathianin mihringte hnenah sawi duh a neih chuan Zawlneite kaltlangin a hrilh thin a nih kha. Lal Davida chuan Uria nupui Bathsebi a uire a, thil sual a tih avangin Zawlnei Nathana hmangin Pathianin Davida chu a sualna leh hrem a nih tur thu a hirlh a nih kha (2 Samuel 12).

Ninevi khawmite sualna chuan Pathian hnen a thleng a, hrem an nih tur thu va hrilh turin Jona chu Pathianin a tir tih kan hmu a. Isaia kal tlangin Lal Isua Krista lo pian tur thu leh chhandamin kan awm dawn thu kan hre bawk. Baptistu Johana chuan Lal Isua Krista chu rawngbawl turin a lo kal dawn tih a tlangaupui thu kan hmu bawk. 

Zawlnei hmangin Pathianin Israel mipui te leh hnam hrang hrangte khan an awm dan tur te, hrem an nih tur thu te, sim tur te, thil lo la thleng tur te kha hrilh lawk thin tih kan hmu a ni. 

Tunah Zawlnei te hi an la awm em?

Hebrai Bible then danah chuan Isaia, Jeremia leh Ezekiela te hi Zawlnei hnuhnungah an dah a, kan Bible hman laiah chuan Malakia hi Zawlnei hnuhnung ber a ni thung. Chanchin Tha Johana ziak bung 6:14-ah khan Lal Isua’n mipui 5000 a hrai khan Lal Isua chu zawlnei, khawvela lo kal tura kha a ni tih an hria a; bung 7:16 –ah chuan Lal Isua’n Pathian hnen atanga a dawn thu chu mipui a ziritir thin tih kan hmu bawk a. Chuvangin Lal Isua Krista hi Zawlnei hnuhnung ber a ni e tiin Bible zirmite chuan an sawi thin. 

Lal Isua Krista lo hi Zawlnei an la awm em tih hi zawhna chhan harsa leh inhnialna chawk chhuak thei khawpa thupawimawh tling a ni. Chanchin Tha Matthaia ziak bung 7:15 kan chhiar chuan Zawlnei derte lakah fimkhur turin Lal Isua’n min chah a, an mahni kan tehna tur chu an rahah a nih thu min hrilh bawk. Helai thuin a kawh tum ber nia lang, English Standard Version Global Study Bible-in min hrilh dan chuan – Zawlnei nia inchhal te awm dan leh an thusawi chu a rah – Lal Isua Krista zirtirna nen a inmil em tih nena teh turin min hrilh a ni.  

Kohhran siamṭhatu John Calvina chuan helai thu hi Lal Isua'n kohhran hote fimkhur tura min zilhna niin a ngai a, zirtirna dik lo leh thu dik lo laka kohhran hmum him tlat turin Lal Isua'n min hrilh lawk niin a ngai. 

Ephesi 4:11-ah hian rawngbawlna hna chi hrang hrang thilpek kan hmu a, chungte chu – Tirhkoh, Zawlnei, Chanchin Tha hriltu leh Kohhran chawmtu an ni. John Calvin’s Commentation on St. Paul’s Epistle –ah chuan John Calvin-a chuan he lai thu hi tihian a sawi a, ‘Tirhkoh/Apostle te, Zawlnei te, Chanchin Tha hriltu te hi chu hun eng emaw tichhung atana ruat bik an ni a, kumhlun tur an ni lo; Sakhuana a tlakchhiata kohhran thurin te chawi nun a nih leh nana Chanchin Ṭha hriltute hi nasa taka chawi kan an nih leh te a nih loh chuan.' tiin. 

Tunlai Mizoram khawvelah pawh Pathian hnen atanga puan tur nei leh Pathianin zawlnei nia inchhal kan awm a; an mahni kan tehna ber tur chu Bible thu, Lal Isua zirtirna nen an thusawi, an thu ken leh an thuchah a inmil em tih hi a ni. Zawlnei der leh Zawlnei tak hi Thuthlung Hlui atangin kan hmu tawh a, vawiinah pawh hian an la awm zel dawn a; Lal Isua chanchin lo hi chu thu tak dang a awm lo tih hi kan hre reng tur a ni.