Lalremruati Ngente Hlahril bu ‘Sêih’ thlirna

Vawiin March ni 6, 2021 hian MZP Hall-ah Nula Lalremruati Ngente Hlahril bu ‘Sêih’ chu Prof. RL Thanmawia’n a tlangzarh dawn a, he lehkhabu hi ₹120/- man tur a ni a. Mizoram Publication Board-in sum leh pai tum sakin Zorin Compugraphics kut chhuak, ISBN nei niin phek 152-a chhah,  Zofate tana thu leh hlaa hmasawnna; a bik takin Hlahril/Poetry lama kan hausak belhna tur lehkhabu rotling tur a ni. 

A ziaktu chanchin tawi

He Lehkhabu ziaktu Lalremruati Ngente hi Kawrthah nula niin tunah hian Aizawl Khatla South-ah a u nen in luahin an cheng a. Mizoram University atangin MA (Mizo) hi kum 2017 khan a zirchhuak a; tunah hian Hrangbana College-ah hian zirtirtu duhawm (Guest Faculty) a ni mek bawk. Thu leh hla lamah a tuiin chanchinbu lamah te pawh thu a ziak ve zauh zauh thin a. Tin, Social Media –Facebook lamah te pawh a thuziak chhiar tur a awm thin a, MZP Chanchinbu-ah hian editorial board-ah a awm mek bawk a ni. Thutluang pangngai aiin Hlahril/Poetry lam hi a tuiin Mizo Poetry Society (MIPOTY) ah pawh committee member niin he pawl hian Zofa, Hlahril lama tuite kutchhuak lakhawmin lehkhabu pawh tum eng emaw zat a chhuah tawh a. Chung lehkhabuah-te pawh chuan Lalremruati Ngente kut chhuak pawh hi kan hmu fo tawh a ni. 

‘Sêih’ chu

He Hlahril bu-ah hian hla 82 zet mai a awm a; an thu hawi lam leh chah chi hrang hrang, mahse tangrual tha tak si kan hmu a. A phuahtuin khawvel thlir dan leh a hmachhawn dan te, leilung mawina (nature) in a rilru a luah hneh zia te he hla bu atang hian kan hmu chiang hle a. Heti hian khaikhawm i tum teh ang-

Hlimna hi kan chakna thahrui pakhat a ni: He lehkhabu hming put chhan ‘Seih’ tih hi hlaah hian mihring nuna harsatna hrang hrang – keimahni siam chawp leh khuarel thil- a lo thleng chang leh min nan buai lai pawhin hlim taka i nui seih hmel kha min hmuh hram hram ang che tiin a ngen a ni. Phek 31-naah ‘Khawvel Thar’ tih kan hmu a; he hlaah hian mihring nun dik tak – khawvela kan awm chhunga kan duhamna te, kan innghirnghonate leh mahni inhaivurna zawng zawngte kalsana khawvel thara hmangaihna nena kan awm dun tur thu kan hmu a ni. ‘I tan’ tih te, ‘Khawfing chah hunah chuan’ tih te hi min fuih phurtu leh min nawr kaltu hla tha tak an ni. 

Thawnthu min hrilh: He hlahril bu tihlutu pakhat nia ka hriat chu hla hmanga thawnthu min hrilh thiam hi a ni. ‘Thinlung hla mawi’, ‘Chhiarloh thawnthu’, ‘Favang thawnthu’, ‘Kan thawnthu’ te hi han chhiar ila, hla thu mawi tak hmangin thawnthu ngaihnawm tak ngaihtla ang kan ni a. ‘Chhungril indona’ tihte hi han chhiar ila, keimahni chanchin hi ngaihnawm takin kan chhiar thla thei a ni. Heti anga thawnthu ang maia ngaihnawm taka hlahril hmanga thil min hrilh thla melh melh thei hi a phuahtu themthiamna tak niin kei chuan ka hria. ‘Literature ropui ber’ tih te hi han chhiar ila, Bible hlut zia kan hriat nawn phahin min hrilh dan a ngaihnawm hle bawk. 

Leilung mawina a pho chhuak: He hla phuahtu hian leilung mawina hi a hmu chiangin ‘pâr’ tih ringawt pawh a hmang nasa hle a; ‘Ram Pangpâr,’ Thlaler Pangpâr’, tih te kan hmu a. ‘Si-ar Chawngmawii’ tih te hi han chhiar ila; Arsi eng mawi tak Chawngmawii chu kan beidawn lai ber pawha mawi taka kan chunga lo eng tur a nih thu a han sawi te hian leilung mawina hlut zia min hriat chhuah tir hle. ‘Ram Pangpâr’ hmanga mihring nun nghet lo leh duhamna nun a tarlang te hi a ngaihnawmin a fiah tha hle. 

Chhungkuaa chhiar tlak a ni: He Hlahril bu hi chhungkaw kima chhiar rual dual dual tlak khawpa tawngkam mawi leh tha, zahawm leh zir tlaka mawi a ni a. Tawngkam mawi lo leh bawlhhlawh, zahmawh lam rawng kai emaw awm miah lo a ni a. Mihring nun kawngchhuk chho chiang takin a tarlang a; kan tu leh fa - mihring nun phung lo zir chho mek turte tana an hmachhawn tur khawvel inzirlawkna leh hmachhawn an thiam theihna tura fuihna hla bu tha tak a ni tiin kan sawi thei ang. He lehkhabu ziaktu hi nekchep leh neksawr, dikna leh takna duh avanga vawi tam tak hlawhchham tawh a nihna hi he hlaah hian kan hmu thei a. Kan tu leh fate’n mihring nun dik tak hi zawh ve se kan ti a nih chuan he lehkhbu hi leiin i fate le hi tute tan a riin chhiar thin ang che. 

Lalremruati Ngente (Aremruati) ‘Sêih’ mawi tak mai hmu turin inbuatsaih la; a thu leh hla hmanga mawi taka a ‘Sêih’ hi i hmu lo palh a nih chuan Mizo thu leh hla mawi tak mai i chan tihna a ni ang. 

“Ka hringnun a chauh laiin,

Ka nunkhua a zuai hunah;

Thinlung thlaphâng a rûm laiin,

Rauthla lêng a vaih hunah;

‘Seih’ mawi mi bân la.”  

  -Aremruati Ngente