Lal Isua Krista-ah i kir ang u

Khawvela hun pawimawh leh hlu ber hi eng nge a nih tih inzawt ila, kan pawimawh tih zawng hi a in ang lo zung thei ang. Chutihrual erawh chuan kan zavaia kan pawm tlan theih tur erawh chu, chatuan thlenga nunna kan neih theihna tura Lal Isua Krista lo pian ni – Krismas hi a ni kan ti thei ang. Sakhaw dang betu leh Sakhaw nei lo hrim hrim tan pawh a hlutna hi a ngai reng a; keimahni zawk hian kan hlut leh hlut lohah a innghat zawk a ni. 

Kum 2000 chuang zet liamtaa chhungkaw tlawm leh ropui lo ve tak; khualbukah pawh leng loa ran chaw pekna thleng mai maia lo piang Lal Isua Krista piancham chu kan hma lawkah hian a lo thleng dawn a. Kum 2020 Krismas hi Hripui leng vangin Mizoram leh khawvelah pawh kum dang angin kan lawm dawn lo tih kan hria a. Mi hausa ber atanga mi harsa ber, mi sual ber leh mi tha ber pawhin kan thinlungin he hun hlu tak hi kan lawm dawn a. Hetiang tluka Krismas hlu hi kan tawng nawn leh tawh kherin a rinawm loh a; chuvangin kan zavaiin Lal Isua Kirsta-ah i kir ang u. 

Kum hlui chang mai turah leh kum tam tak chhungin thil tha lo leh sual tam tak pawh kan lo ti tawh a ni thei a. Phurrit tak leh lungngaihna nasa tak kan lo tuar tawh pawh a ni theiin Tan inah tang mek pawh kan ni thei. Kan hun tawn leh kan awmna inang lo tak taka tang pawhin kumin Krismas chu ang khatin Lal Isua Krista hi chibai kan buk tlang vek dawn a. He hun hlu tak leh dangdai tak hi a thlawn mai maiin liamtir lo hram ang u. 

Kum lo thar turah Lal Isua nena bul kan tan theihna turin kumin Krismas atang ngei hian bul tan ila. Hlawchham tawhna leh hnawl kan nih tawhna te, sit leh sel kan nih tawhna te, natna leh lungngaihna kan tawrh mek leh kan tawrh tawhna zawng zawng te pawh Lal Isua hnenah hian thlen ila. Lal Isua henah hian kan zawng zawngin kir ila; amah nen nun bul i tan tha ang u. 

Cancer natna tuar mek, chhungkhatte leh Doctor te beidawn ruk san tawh leh nangmah ngei pawh beidawng ru tawh pawh i ni thei e. Mahse Lal Isua-ah kir la, mi hrisel leh dam tha zawk te ang thoin kumin Krismas hi i hmang dawn a, beiseina thar nen Lal Isua-ah kirin lo innghat tlat ang che. Tualthah leh sual rapthlak tak i tih vanga damchunga Tan ina tang tura awm mek i ni thei e; nangpawh Lal Isua Krista-ah lo kir la, kumin Krismas hi i dam chung leh chatuan thlenga nun tak i neihna tur hun bul tanna atan lo hmang ang che. 

Kum danga zankhuaa rui thin, tlaivara nawmsip bawla serh leh sang awm lo leka hun hmang zoa Krismas lawm thin paw hi ni thei. AIDS natna vanga beiseina reng reng nei thei tawh lo leh mi zingah pawh awm inthlahrung em em paw hi ni thei e. Mahse nangmah ang thoin kumin Krismas chu Pastor leh Kohhran Upa te pawhin an lawm dawn. Chuvangin Lal Isua Krista-ah lo kir la, Lal Isua hi thinlung leh tihtakzetin chibai i buk teh ang. 

Kum danga Krismas Tree leh kawrmawi nei zo lo, in leh a vel pawh cheimawina nei zo ve lo khawpa chhungkaw harsa tak pawh i ni thei a. Chutiang boruak vel avanga Krismas pawh huphurh tak leh nuam lo tiru taka lo hmang ru thin pawh i ni thei e. Mahse kumin Krismas erawh chu chutiang sum leh pai senna tur thil awm miah loin kan hmang dawn a,nang leh kei pawhin inthlahrung hauh loin kan inchhung atangin Lal Isua piancham kan lawm dawn. Lawmthu sawia tawngtaiin Lal Isua hnenah a zawng zawngin i inhlan dun ang aw. 

Lal Isua’n hmun sang ber a chang dawn a; a va nuam dawn em tir’u? Thi leh tur, kan chanchin nakina la sawi leh vek tur kan nih avangin kuminah ngei hian Lal Isua Krista-ah kirin sawi tlak chanchin mawi leh ngaihnawm kan neih theih ngei theih nan Lal Isua-ah hian kir mawlh teh ang. Kan vaia intluk tlang leh inang veka Krismas kan hman theihna hunah hian Setana tan hun leh hmun kian tawh loin Lal Isua’n hmun sang ber lo chang mawlh teh se!    

Inchhir lehna tur awm miah loa Krismas kan hman theihna hun hlu leh dangdai takah hian inchhir leh hram turin hun hmang suh ang che. Pathianin kan nuna thil tum leh duh a neih tihpuitlinna tura hun hlu leh dangdai tak min pek hi a bawhpelh tu leh a chang ve lo tu ni lo turin Lal Isua Krista-ah chauh kan rilru dahin, a thlawnin Lal Isua hi i pian nawn tir tawh lo ang u.