Ka awm angin ka lo kal ang

Mahni nihna ang anga Pathian angchunga tlukluh tawpna hla ropui leh tha ber pawl chu ‘Ka awm angin ka lo kal ang’ (Just as i am, without one plea) tih hla Charlotte Elliot-i phuah, Kristian Hla Bu kan hman meka number 368-na, Rev. David Evan Jones-a’n mawi tak maia Mizo tawnga min lehlin sak hi a ni ngei ang. 

He hla, mahni nihna ang anga Pathian hnena inhlanna tha em em mai hi Charlotte Elliot-i hian kum 1836 a a phuah a ni a. John Brownlie lehkhabu ‘The Hymns and Hymn Writers of the Church Hymnary’ ah chuan heti ang hian he hla ropui tak phuah a nih dan hi a inziak a-

Kum 1836 khan Charlotte Elliot-i unaupa Rev. H. V. Elliott-a chuan kohhrana rawngbawltute fanu te'n zirna sang zawk an zir zel theihna turin St. Mary Church kaltlanga tanpuina pek a tum a. Chumi atan chuan Brighton khuaah thil zuarin an buai hle a. Hemi atan hian Charlotte  Rev. H. V. Elliot hian a farnu Charlotte Elliot chu tel ve se a ti hle a. Mahse Charlotte Elliot-i hi a hrisel loin a kut leh ke pawh hmang tha hlei thei lo khawpin natna khirh takin a tlak buak a. 

Chutia tanpuina pek an tum hma zanah chiah chuan Charlotte Elliot-i chu amah leh amah inngaihtuahin, tangkaina nei lo leh hman tlak loh tak mihring niin a inhria a. Thlarau lama a dinhmun te a ngaihtuah a, a rilru a nain tangkaina nei ve lo mihring han nih tawp mai chu hreawm a tiin a muhil thei ta reng reng lo a; Pathian hnenah zawhna zawtin a vui hial a.  A tuka a chhungte zawng zawng an kal bo hlan chuan ngun takin a inngaihtuah a, Lal Isua tana mi tangkai nih ve a chak hle a. 

Kum 12 zet kal taa Geneva atanga lo kal Dr. Ceaser Malan-a’n Pathian tana inpe ve tura a sawmna te chu a ngaihtuah chhuak a, engmah ti thei lo a nih avanga tangkaina nei ve loin a inhria a. Mahse Pathian khawngaihna thuk tak a chunga lo thleng chu hrethiamin, a awm ang angin Pathian chuan a pawmin a hmangaih a, a tling tawk a ni tih chu inhrechhuakin khawvela Pathian hla ropui ber pawl leh chuai tawh ngai lo tur ‘ Ka awm angin ka lo kal ang’ tiin hla ropui tak mai a lo phuah chhuak ta a ni. 

Taksa lama bawrhsawm, chak lo leh che thei lo a nih avanga Pathian tan pawha tangkaina nei ve lo leh tling ve lo nia inhria, chuanlam nei reng mai Charlotte Elliot-i chuan Pathian chu a nih ang angin a pan a. Chu a nihna ang anga a panna hla ropui tak mai chuan keini pawh min hneh a, vawiin thlengin rilru leh tihtakzetin Pathian hnena kan inhlanna atan kan la sa ta zel a nih hi. 

Kan chhuanlam leh kan tlin lohna zawng zawng nena min ngaidama min pawm theitu Lal Isua pan tawp mai hi kan tihtur dik tak a lo ni reng mai. Kan chhuanlam leh kan tlin lohna changchawia Lal Isua hnen hi kan pan duh lo tlat a nih chuan – kan natna tihdamna tura kan bula damdawi awm reng ei duh loh vanga boral ang lek kan lo ni dawn a ni. 

Min pawmtu tur zawkin chhuanlam leh sawinawi a neih loha tlinga min pawm miau chuan i pan mai teh ang u. Kan nihna ang anga kan pan phawt chuan kan tlinlohna leh kan that lohna zawng zawng chu Lal Isua ngei hian min tihbo sak vek dawn a ni. Tling leh pan tlak nih hmasak kan tum chhung hian khua kan tlai palh thei. Chuvangin nang leh kei hian kan nih ang angin Lal Isua hi pan ve tawp ila, a bak chu a kutah dah i dah tawp mai teh ang. 

Ka awm angin ka lo kal ang

Ka awm angin ka lo kal ang,

I thisen hlu ka tan a luang;

Tin, Nangin min sawm avangin,

Ka Tlantu, ka lo kal.

Ka awm angin mangang ila,

Indo leh ringhlel mah ila;

Rilru leh pawn lam hlauhawmin,

Ka Tlantu, ka lo kal.

Ka awm angin Nangin min lawm,

Min ngaidam, min tithianghlim ang;

I thutiam ka rin avangin,

Ka Tlantu, ka lo kal.

Ka awm angin min hmangaih ang,

Min dal zawng zawng i tibo vang;

Tunah i ta ni fo turin,

Ka Tlantu, ka lo kal.

Ka awm angin i hmangaihna,

Zauzia, thukzia, seizia, sanzia;

Hetah leh khitah hre turin,

Ka Tlantu, ka lo kal.