Kan Bible-ah, a bikin Thuthlung Thar lamah Kristiante nun dan tha zirtirna (Ethical Teaching) hi Paul-a lehkhathawn te leh Chanchin Tha bu hmasa pathumte atang hian kan hmu nasa a. Heti ang lam hawia thuziak leh lehkhabu chhiar tur pawh tam tak awmin Sunday Sikul Zirlai Bu-ah te pawh kan zir tawh thin a nih kha. Chutih rual erawh chuan Chanchin Tha Johana-a ziak atang erawh hi chuan chutiang lam hawi zirtirna thuziak leh lehkhabu erawh hi chu hmuh tur a vang ang reng hle.
Kum 1970 hmalamah khan Chanchin Tha Johana ziak atanga nun dan tha zirtirna (ethical teaching) hi zirchianna a awm hran lo a; Bible bu dang nena sawi kawp emaw chauhin a lo lang ve a. Kum 1999 khan Jan van der Watt chuan zirchiang tanin kum 2012 khan Zimmermann nen kan thupui sawi mek zirchianna bu hi an tichhuak a. He lehkhabu hlu tak hian Pathian thu zirmite mit ti varin Chanchin Tha Johana ziak hi kan thupui sawi mek lam hawi khian an zir nasat phah hle a.
Chuti anga mithiamte’n an zir chhoh dan zawng zawng chu kan sawi vek seng dawn lo a; Chanchin Tha Johana ziak atanga Kristian te’n nun dan tha kan zir tur te lo tarlang ila-
Chatuan nunna: Chanchin Tha Johana ziakah hian ‘nunna’ tia a sawi hi Pathian atanga chhuak chatuan nunna a ni a; chu chu Lal Isua Kristaah awmin keini mihringte tan pawh chu nun chu kan tawm ve tur a ni a. Mihring nunna; engtik lai pawha boral thei reng, chatuan hremhmuna kal tur chu Pathianin a fapa Lal Isua Krista kaltlangin chatuan nunna min pe a. Chu nunna min petu Pathian chu mi dik leh famkim a nih avangin keini pawhin nunna min petu Pathian nihna leh a ze pui chu tawma dik tak leh fel taka nung tur kan ni. Pathian atanga chhuak chatuan nunna, dik leh fakim changtu Kristian, Lal Isua avanga chatuan nunna neitu kan ni tawh a nih chuan mi dangte tan pawh luangchhuaka chatuan nunna an neih ve theihna tura hrilh leh zirtir hi kan bat a ni (7:38; 17:20).
Eng chhuah tur kan ni: Chanchin Tha Johana ziakah Lal Isua chu nunna eng petu a nih thu kan hmu a(8:12, 12:14), Lehkhathawn lamah Pathian chu ‘eng’ a nih thu kan hmu bawk a nih kha 1Jn 1:5). He khawvel sual leh thim tikiang turin Lal Isua’n ‘eng’ a nih thu min hrilh a; keimahnia thim awm – kan ze tha lo te, kan rilru sual leh mi dangte chunga kan sualna zawng zawng tiboa eng chhuah tura lo kal a nih thu chiang takin a sawi a (12:46). Keini hi Lal Isua’n ‘eng fate’ tiin min ko a(12:35-36), chuvangin thil dik taka ti tur te, mi dangte pawhin Lal Isua Krista neitu kan nihna te chiang taka an hmuh theihna tura fiah leh eng taka nun hi kan bat a ni (3:9-21).
Hmangaihna: Johana hian Pathian chu hmangaihna a nih thu a sawi a(1 Jn 4:8, 16), chu Pathian hmangaihna Isua Kristaa awm kha keini mihringteah pawh a awm thu Lal Isua’n a sawi a(17:26). Chu hmangaihna Lal Isua leh Pathian inkara awm chu keini pawhin kan lo changin kan lo nei ve zel a (14:21, 23,16:27). Pathian hmangaihna chuan keini mihringte suala boral tur tan a fapa Lal Isua Krista kaltlangin chatuan nunna min pe tih chiang takin kan hria a. Chuti anga Pathian atang chhuak hmangaihna nunpuitu leh neitu kan nih tawh avang chuan keini pawh inhmangaih tawn tur kan ni tih Lal Isua’n min hrilh a nih kha. (13:34-35).
Thutakah: ‘Thutak’ tih thu hi Johana hian Pathian nihna sawina tan leh Pathian thu chu thutak a nih thu sawina atan a hmang a(3:33, 17:17). Thutak chu Pathian leh Lal Isua nihna sawina atan a hmang a ni. Lal Isua Krista chuan amah chu kawng leh thutak a nih thu a sawi a; amah chu Pathian hnena thlenna kawng awmchhun a nih thu min hrilh a nih kha (14:6). Thutak hi Lal Isua Krista zirtirna laimuah hmangin mihring sualna zawng zawng pawh he thutak hian a chhuah zalen dawn tih a zirtir thin a (8:31-32). Johana hian ‘thutak’ hi a ngaipawimawhin a sawi zing hle a; thutak chu kan thiltihah te(3:21), Pathian kan biaknaah te (4:23-24) te tihtakzetin kan ti tur a ni tih min hrilh.
Comments
Post a Comment