Khawvel changkang zelin a ken tel chu Pathian thu hriatchian duhna leh Kohhran faksel leh sawisel hi a ni a; huat leh do tur a ni lo a, tun aia nasa zawk hi a la hmachhawn dawn chauh a ni. Kum zabi sawmhnih pakhatnaah phei hi chuan mihring finna a sang em em tawh a; Kristian leh Kristian ni lo mi fing tak tak te lo chhuak zelin kan Bible te, Pathian leh Kohhran te zirchiangin Pathian awm ring lo tam tak khawvelah lo chhuak zelin Mizoramah te pawh kan awm hial tawh a nih hi. Mi kan dil chhutin thil lang tlang leh lang chiang, fiah theih apiang fiah tumin kan hmanhlel tawh a. Kohhran sum leh pai hman dan te kan zir chiangin sawma pakhat kan pek thinte pawh a hman dan nen lama hriatchian tumin kan dilchhut a, Kohhrana pek luh kher tul ti lo tawk te pawh kan awm leh zauh thin. Chuvangin sawma pakhat hi eng nge a nih chiah a, Kohhranah hian eng vanga pe nge kan nih tih te hi kan hriat hnu ni tawh mahse kan thiam dan ang angin i han zirchiang nawn leh teh ang u.
Engtik atangin nge sawma pakhat an pek?
Pathian thu zirmi te chuan Kaina leh Abela thilhlante kha sawma pakhat nên inlaichinna nei thuk hlein an ngai a; Kaina thilhlan kha chheh fel a nih tâwk loh avânga Pathianin pawm lovah an ngai a ni. Ngun taka kan Bible kan zir chuan Salem Lal, Chungnungbera Puithiam —Melkisedeka hnênah Abrama ral that haw khan sawma pakhat a pek kha Bible-a ziak kan hmuh hmasak ber niin Jakoba pawh khan sawma pakhat hi an pe thin tih kan hmu a (Gen 14:20, 28:22). Chumi hnuah chuan Mosia kaltlangin Pathianin sawma pakhat hi amah pe turin Israel fate kha thu a pe tih kan hmu leh a. Sawma pakhat chu Israel fate hun laia Sakhaw puithiam lam hna thawktu Levia chite eitur a nih thu kan hmu a nih kha (Numbers 18:2).
Eng vangin nge kan pek ang?
Malakia bung 3:8-10 ah sawma pakhat hi kan pek loh chuan Pathian thil kan ruk sak a ni tih chiang takin Israel fate kaltlangin Pathianin min hrilh a. Pathian ina eitur a awm theihna turin sawma pakhat pe tur leh amah fiah turin min ti a; kan pek avanga malsawmna nena vur min tiam thu kan hmu bawk. Deuteronomy 6:16 te, Matthaia 4:7 te leh Luka 4:12 te kan chhiar chuan Pathian chu fiah mai mai tur kan nih loh zia kan hmu a, chutih rual erawh chuan sawma pakhat chungchangah erawh chuan fiah hial pawh a phal a nih kha. Kristian, Pathian thuawih leh ringtu tan chuan sawma pakhat hi Pathian thu pek a nih avangin pe tur kan ni tih fiah takin a lang chiang hle.
Thuthlung Thar lamah sawma pakhat hi a lang em?
Thuthlung Thar hi ngun taka kan chhiar chuan sawma pakhat pek loh tur thu emaw tihbo a nih tak thu emaw kan hmu reng reng lo a. Chanchin Tha Matthaia ziak bung 23:23 ah pawh khan Lal Isua’n Pharisaite a hauh khan sawma pakhat chu an pek that zia a lang chiang hle a; sawma pakhat hi felna te, khawngaihna te, rinawmna te nena pe turin Lal Isua’n a zilhhau tih kan hmu a ni. Lal Isua thih hnua Kohhran ding tir te pawh khan Pathian hnena thilpek hrim hrim hi chu an uarin vawiin thlengin eng Kohhran pawh hian sawma pakhat hi kan pe deuh vek tiila kan sawi sual awm lo e. Chuvangin Kristian kan nih chuan kan dam chhungin sawma pakhat hi Pathian thuawihin kan pe zel tur a ni.
Kohhranah chauh em ni sawma pakhat kan pek ang?
Hei hi kan inzawt nawnin kan sawi fo thin a; Malakia 3:8-10 a kan hmuh angin Pathian in, Kohhranah ngei hian sawma pakhat hi pe tur kan nih thu kan hmu a, kan pek loh emaw hmun danga kan chheprelh emaw kan hmang emaw a nih chuan Pathian ta ruksak kan nih thu chiang takin kan hmu a. He lai thu thlakna hi Bible-ah hian vawiin thlengin a la awm si lo a, Pathian in, kohhranah ngei hian kan sawma pakhat hi khawvel awm chhunga pe tur kan ni tih a lang chiang hle. Midang tanpuina tur leh mi harsa zawk te chhawm dawlna tura thilpek kan pe duh a nih chuan sawma pakhat bang zawng – pakaw hmanga tanpuina pek hi kan tih tur a ni.
Khawihah nge sawma pakhat hi an hman?
A tir lama kan sawi tawh ang khan thil kan chikin kan ngaihven tawh a; Kohhrana sawma pakhat kan pek pawh hi a hmanna nen lam kan ngaihvenin kan chhui zui ru fo tawh tih hi thudik tak a ni. Kan sawma pakhat pek tlingkhawm te chu kan Kohhranin a tul dan ang zela lo sem darhin Chanchin Tha hrilna atan te, thawktu te leh Pastor te hlawh atan te, motor leina atan te, zin veivahna atan te leh a tul ang zela Pathian ram lo zau zelna turin an lo hmang ral thin a nih hi. Kohhran hi a neitu chu Lal Isua Krista a ni a, vawiin thlengin Kohhran kaltlangin Pathian pawh a la inpuang chhuak zel a. Kohhrana sawma pakhat kan pek te pawh a neitu Pathianin min la hratpuiin a hman chhuah dan nen lam min la pawmpui tih hi a lang chiang em em a ni.
Pathian thu kan awih zelna tur te, amah kan fak leh chawimawina tur te, malsawmna tam tak kan dawn let lehna tur atan te, Kohhran a lo dinngheh sauh sauha Chanchin Tha puan darh a nih zel theihna tur atan te leh khawvela kan awm chhunga Lalpa rawngbawlna chanvo kan hlen chhuah ve zel theihna tur tein sawma pakhat hi pe zel ang u. Chuti ang pek tur kan neih zel theihna tur pawhin Pathian hnenah malsawmna dil ila. Ui chunga pe loin, loh theih loh anga ngaia pe hek loin, kan thinlunga kan tum ang zela pein; Pathian chuan hlim taka petu chu min hmangaih si a.
Comments
Post a Comment