Zofate zingah hian Rev. Vanlabela hi hre lo kan lo awm palh a nih pawhin mi tlem zawk kan nih a rinawm a; amah chiang taka hre lo pawhin rawngbawltu ropui tak a nihna hi amah kan hriat dan tlang lawn ber a ni ang. Chuti ang taka Pathian mi hman leh rawngbawltu ropui tak chuan ama chanchin a ziahna lehkhabu ‘Ka hmaah dawhkan i buatsaih thin’ tih chu September ni 5, 2020 khan a tlangzarh a. He lehkhabu hlu tak mai hi phek 350 a chhah niin thlalak hlu tak tak phek riat a inzep tel bawk a; cheng 250/- man niin chhiar a man hla hle.He lehkhabuah hian thupui sawmthum leh pasarih (37) awmin Mizo tawng thiam kan neih zinga a ber pawl C. Chhuanvawra endik niin hawrawp chhut sual pahnih khat erawh chu awmin chhiar a nuam hle a; C. Chhuanvawra hian thuhmahruai pawh a ziak nghe nghe a. He lehkhabu hlu tak mai atang hian kan ngaihsan rawn leh kan hriatchian chak Rev. Vanlalbela hi tunge a lo nih chiah tih chiang takin kan hre thei awm e.Rev. Vanlalbela te inah hian kum 2018 a BD 2nd Year kan zirlaia Bawngkawn Presbyterian Kohhran kan tlawh tumin an inah mikhual ka ni a. Tukthuan te eiin Rev. Vanlalbela nupui C. Vanlalfeli hian cheng 500/- zet mai min pe a, ka zakin ka lawm hle a. Chumi hnuah kum 2019 December ni 16 khan BD Final Year Thesis chungchangah ‘interview’ tawite ka neih pui leh a. Hemi tum hian tuna a lehkhabu tur hi a endik lai mek niin ka thil hriatduh te pawh hemi lehkabua a ziah thenkhat hi a thla ka la nual nghe nghe a, chu chu kan inhriat ve dan awm chhun a ni mai awm e.Kan Pastor ngaihsan leh Pathian rawngbawltu ropui Rev. Vanlalbela hi a lehkhabu ziah atang hian tu nge a nih i lo belchiang dawn teh ang-Chhungkaw harsa ve tak atanga lo chhuak a ni: He lehkhabu ziaktu leh Pastor ropui tak mai hi chhungkaw harsa ve tak leh sum leh paia hmachhuan tur nei bik miah lo atanga lo chawr chhuak a nih zia a lang chiang hle a. Mahse chuti chung chuan retheihna hi a inhneh tir duh miah lo a, tun hun hi Pathian zarah a lo thlen phah a ni tih kan hre thei a. He lehkhabu chhiartu zawng zawngte pawh hian Rev. Vanlalbela atang hian kan retheihna hi kan hmalam hun daltu chhuanlam atan a tling tawk lo tih kan hre theuh awm e.Mi tumruh tawpkhawk a ni: He lehkhabu atang hian Rev. Vanalbela tumruh zia hi hmuh hmaih theih a ni lo a; sum leh pai hman tur a nei lo chung leh pawl thum lek chauh sikul pangngai a kal chunga vawiin a thlen theihna chhan hi mihiring lamah chuan a tumruhna vang liau liau a ni tih a lang chiang hle.
Ebenezer Bible College – a Sum leh pai hman tur mumal neih loh vanga inbualna sahbawh tel loa vawi tam tak a inbual thu te, ha nawhna ‘tooth paste' a neih loh avanga a meihawl a hman dante, Vai hoin sum leh pai dawn tur a neih ve loh avanga an hmusitna zozai te, Hindi kawikhat pawh thiam lo chunga sam tuak thawt khawpa a inzir chhoh dan te -kan sawi vek seng lo ang - heng atang te hian keini hian entawn tur kan va ngah em! Nuamsa taka lehkha kan zir chunga kan titha peih lo hi chu Rev. Vanlalbela atanga inteh hi chuan zak ngawih ngawih tur kan lo ni!Mi thuawih thei tak leh mahni inthunun thei tak a ni: Rev. Vanlalbela chanchin atanga kan hmuh chian em em chu thuawihna leh mahni inthununna hi a ni awm e. Ebenezer Bible College atanga Pathian thu a zir chhuahna hi Kohhranin a pawm College a ni lo a. Chuvang chuan a rawngbawl zelna turah pawh harsatna neuh neuh a tawk a. Chuti chung chuan thuawih takin Kohhran duh dan leh pawm dan te ngaichanga zawm zel chungin a awm a. Pastor a nih hnu thleng pawhin hotute thuawih takin a nuam leh hreawmah pawh Pathian rawng a bawl mawp mawp mai a ni.Tin, ama tana tha lo tur leh a nun tichhe thei thil lakah chuan mahni hreawm pawisa miah loin a inthunun zel a. Nulat tlangvalna kawngah te, sum leh pai thuahte pawh nasa takin a inthunun a, chu chuan vawiin hi a hruaithleng kan ti thei awm e. Vai hoin an hmusit em vang te, an retheih em avang tea Pathian thu zirzawm a duh tawh lo lai pawhin Pathianin zirzawm leh tura a tih avangin thuawih takin a kal leh mai a ni.A hmasa berah Pathian a dah: Hei tak hi Rev. Vanlalbela nuna langsar leh vawiin a thlenna chhan bul ber a ni kan ti thei awm e. A duhna leh a chak zawng te aiin Pathian duh dan leh remruatnaah a innghat tlat a. Engkimah tawngtai leh Pathian rawn chung zelin a hun a hmang a. Mizoram buai laia Ramhnuai mi a nih lai atangin Pathian thu a awih tang tang a. Chu chuan amah leh a bula mite rin a hlawhin Pathianin amah ring tlattu Vanlalbela chu vawiina Mizo Pastor ropui berte zingah a hlang kai tih a taka hretu te kan ni.Mihring a nih avanga a tihsual leh a dai pelh ve chang te, a duh dan vek loa thil a kal chang leh a thlen changte pawhin vuivaia la loin Pathian tih tlat chungin a hun a hmang a. Kawng engkimah Pathian chu rinpui berah a neih tlat avangin Pathian pawh atan a chhe chhuak lo thei lo a. Chu chuan rawngbawlna kawngah nasa taka rah chhuahin hnam dang zinga a rawngbawlna te pawh hmuh theih khawpin a ropui a nih hi.Pawl thum lek zirna pangngai zawha heti khawpa Pastor ropui leh Pathian hman rawngbawltu ropui a nih theihna chhan bul ber chu Pathian thuawih tawp mai leh ring tawp mi a nih vang hi a ni. M. Th te pawh zir ve leh an tum thut thut a, mahse Pathian aia ama ropuina zawk tur ni dawna a rilru lama a lan avangin chawp chilh tak maia a thulh leh ngam te hi Pathian thu a awih vang a ni. Khawvel ram ropui ber pawl USA thlenga a kal theihna chhan te pawh eng dang vang ni loin Pathian thu a awihna rah zel a ni.Chanchin Tha hril veitu a ni: Rev Vanlalbela chanchin kan chhiar atanga hmuhmaih theih hauh loh chu Chanchin Tha hril hi a rawngbawl chhan bul ber a ni tih a lang chiang hle. Masihi Sangati (tun hmaa Non – Mizo) rawngbawlna hlawhltinna kawnga a hnahthawh zozai te hi vawiin thlengin kan la hmu thei awm e. Ramhnuai mi a nih lai atang tawhin Chanchin Tha hi a vahvaihpui nasa a. Pastor a nih hnuah pawh chu chu a rawngbawlna pui ber niin Lucknow leh Delhi Mission Field-ah te rawngbawlin vawi tamtak Mizoram chhung leh pawnah Speaker a ni tawh a. Synod Missioan Board Secretary te niin Pastor ang phei chuan Mission Veng chauh bial neiin kum khat chauh a hun a hmang a nih kha.Pathian awm ring lo te pawh hian he lehkhabu hi chhiar teh u!: Khawvel changkang zelin a ken tel langsar tak ‘Pathian awm rinlohna’ hian keini Mizote zingah ngei pawh langsar ang reng takin hmun a chang tawh a. Heng ho zawng zawng te pawh hian he lehkhabu hlu tak hi chhiar teh u. Rev. Vanlalbela Cancer dam leh dan te, dam lo a tawngtai sak damna chang te, harsatna leh manganna tam tak a tawh laia Pathian hnathawh a chunga lo lang tlat zel te hi thil thleng satliah mai ni loin Pathian nung hnathawh ngei a nih zia hi Rev. Vanlalbela hian chiang takin a lo hrilh thei ang che u.He lehkhabu hi neih dan lo ngaihtuah ve la la, lo chhiar ve ngei teh. Tisa leh thlarauah hlawkna pakhat tal i char dawn tih chiang takin ka sawi thei a, i mittui a tlak dawn bawk avangin i mittui hrukna tur inchhawp ang che.Lalpa chhiahlawh, rawngbawltu ropui Rev. Vanlalbela, lo dam zel ang che.
Comments
Post a Comment