Ka thianpa te in

Pathian khawngaihnaa kum 2016-2020 chhunga Aizawl Theological College-a Pathian thu kan zir chhungin thian tha em em mai pakhat – ka Zadeng pui leh unau ang chiaha ka en Z. Lalduhzuala thian ka nei a. Ani chu ka mize letling hlauh nei – pa tawngtam lo, puitling tak leh lehkhathiam thei tak mai a ni a. Kei aiin tlemin a pa te deuh tih lohah chuan engkawngahmah ka tluk ngai lo a. Harsatna leh tanpui ka ngaihna kawng hrang hrangah ka va pur a, ani chuan tlanchhe hauh loin min tanpui char char thin.

Mize inpersan tak kan nih avang hian kan inzuiin kan inkawm reng lem lo a, a chang phei chuan kan inngaihsak ngai em em lo a. Keimah zawk hian ka duh hun hunah ka han pan a, zirna lama ka thiam loh te ka han zawt a. Sap tawnga thil ziah leh sawi a ngaih chang te hian ka thiam ang tawka ka ziah ve hi ka han endik tir a, a lo siam tha fai deuh vek thin! BD Thesis kan ziah te khan ani hi chu awm lo sela chuan keimah ringawt hi chuan ka puitlin zo kher awm lo e! Amamawh tu zawk hian Hostel-ah te khan ka roomah ka ko thla a, ka lo la hau hrep zui thin. Kum 2017 a Delhi kan kal tumin ‘Cameraman’ ah ka hmang a, amah vang liau liau hian thlalak hlu tak tak ka neih phah a ni.  

 

Aizawl khua kan nih loh avangin Aizawl Edenthar Venga a unau te nen an in luahah hian vawi tam ka riakin innghahna’n ka hmang a, an awm loh tum pawhin ka duh hun hunah ka lutin ka chhuak ngam a. Chuti ang chuan Pathian zarah kum nga dawn kan khawsak ho hnuah chuan an khaw lam Mamit Hmunsam-ah an in leh lo te hmuh pui turin ka zuk zin a. An in hmuh tum e tilo chuan sak that an tum lai tak a nih avangin an lo thiat zo deuh vek a! An khawsak naw naw theihna tur chauhin an in hlui chu an lo thiat bang a, an in thar tur lah chu a ban an phun chauh avangin a laklawh ang reng hle a. An in chu a nuam ti dawn ila  - an thiat zo deuh vek si a; a nuam lo tih dawnin an la sa mek bawk si a. Chuvang chuan an inkawt zawl zau tak kha a nuam ta ber maiin ka hria.

Chuti teh nuaih chuan an in leh lo chu zuk hmuhpui mahila an chhungkaw fel zia leh Pathian tih tlat mi an nihna te, chhungkaw inlungrual leh inhmangaih tak, tangrual tak leh mi tha tak chhungkua an nihna te erawh chu hmuh hmaih har tak a ni thung. A pu – Kohhran Upa- hoa khawsain mi pakua an cheng a, lungrual tak maia an in sakna tur Leirawhchan kan han thiar ho suau suau te, chaw kan ei dawna kan han intlar thliah thliah te, pawna Dawhkan chunga chaw kan kil ho te kha a nuam dangdai hle.  

Kei Mizoram chhim lam mi, pa laktlak loh leh tawngthei ang reng tak, hna thawh lama duap ru ang reng tak si kha an fapa lehkha zirpui leh an chipui kan nih avang chauh khan fapa ang tak taka min lo dawng sawngin ka chungah an tha em em a. In sa mek an nih vangin an in hlui an thiat zo deuh vek a, mikhual thleng tura an tana hun rem chang lo berah kei kher ka nih vang chauhin mikhual mai ni lo – fapa lo haw dawnsawna min dawnsawn dan zawng zawng te kha ka lawmin phu lo ka inti hle.

Hun rei tak ka cham hman lo a, Mamit khawpui te kha ka thianpa hian an motorin min fan kual pui a, hun leh petrol tam tak sengin kei teh lul tan hian an luangral a; ka lawmin phu lo ka inti hle. Aizawl lama ka haw chhohna tur Sumo chuan man te kha min la pai haw tir tak ang tawk tawk a, kei teh lul hi tunge maw an tan ka nih le tiin ka inzawt nasa hle a. Hei ti taka ka tana hlu thian leh unau ka nei hi Pathian malsawmna ka dawn a ni tih ka hrechiang hle. Mamit Hmunsam Pro. Pastor F. Vanlalsiama, Pathian thu kan zirpui thinin zanriah ei turin min sawm bawk a, nuam kan ti tlang hle.

Thian tha hlut zia hi Bible-ah leh lehkhabu hrang hrangah te pawh kan chhiar fo thin ang a, tin keimahni ngei pawhin a takin kan tawng fo ang. Thuthlung Hlui lamah pawh Davida leh Jonathana inthianthatzia te kha kan chhiarin kan hre fo awm e. Lal Isua pawh khan a zirtir sawmpahnih te zingah khan Petera, Jakoba leh Johana te kha midangte ai khan a hnaih zual a, ‘inner circle’ tiin Bible zirna lamah chuan an sawi thin.  

Thian tha te hi an hlu em em a, kan nu leh pa leh kan thisen zawmpui tak tak te bula kan sawi ngam loh kan thuruk leh harsatna pawh kan hrilh vek thin a. An laka beiseina sang tak kan nei a, anni pawhin kan lakah besei leh phut tam tak an nei bawk thin. Harsatna leh manganna tawpkhawk kan tawh lai pawhin kan tan an awm reng thin a, kan tan an engkim an hlan zo tak meuh meuh thin a nih hi.