Awm lo ta la....

Tun lai Mizo thalaite zingah hian tu nge Lengzem hla phuah thiam ber pawl ni ang tiin inzawt ta ila, mi tam tak chuan K. Hminga, Aizawl Armed Veng South tlangval hi a ni kan ti ngei ang a; a ziathiam zia pawh hi kan hre theuh awm e. Zaithiam leh hla phuah thiam kawp a nihna te, a hla thu hriatthiam awl tak mai leh ril ru em em si te hi K. Hminga hlutna bik a nih zia te pawh kan hre theuh awm e. 

Tun hnai lawka  Sangtei Khuptong-i’n mawi tak maia a sak ‘Awm lo ta la’ tih hla a sak te pawh hi mi nawlpui chuan kan hre vekin a rinawm a; sak pawh kan sa thiam vek awm e. He Lengzem hla mawi tak, a thu hriatthiam awl tak leh ril zet si hi K. Hminga hian kum 2018 kum chanve hnulama a phuah a nih thu min hrilh a. Kumin February ni 14, 2020 ‘Valentine’s Day’ ah khan Sangtei Khuptong hian Lyrics video tichhuakin chumi hnu  May ni 27, 2020 khan Music Video pangngaiin a tichhuak a nih kha. He thu ziah lai hian mi 524k zetin an en tawh a, tun laia Lengzem hla kan ‘play’ zin ber pawl a ni tiila dawt kan sawi awm lo e. 

He Lengzem hla mawi tak maia kan hmuh ang hian chang khatnaah hian– awm tura kan duh ber te an awm miau loh chuan mi tam tak zingah pawh kan mal a, kan hlimna leh kan lawmna hi a sosang thei tak tak lo a, a kim thei tak tak ngai lo tih kan hriat chian em em kha fiah takin kan hmu a. Mahni in lam leh khawlama haw chak ngawih ngawih, mahse thliarkara tang tlat si te rilruah lawng-an mahni chhanchhuak theitu an ngaia an mawmawh ngawih ngawih ang aia thuk zawk mahin tuemaw chu kan ngai ngawih ngawih mai a nih kha! En teh, han awm lo teh reng la....

Chuti khawpa mihring ka nih ve chhunga ka tana mi pawimawh tawp khawk leh ka rilru zawng zawng neitu i nih miau avang chuan min kalbo san teh reng la chuan maw – ka hlimna zawng zawng hi i liampui nghal vek ang a; inthup zo loin ka nun ram zawng zawng pawh hi a nguai nghal vek dawn a. Tun lai khawvela thlalatu te’n mawi tak mai leh a nalh thei ang bera thlalak mawi tak tak an phochhuah tawh laia ‘Black & White’ thlalak hlui leh chuar chhe tawh tak ang leka chul leh thing zo vek tawh ang lek mihring ka ni dawn a ni – awm lo ta teh reng la chuan....

Mihring hmalam pan ve tura siam ka nihna te, hmasawn zel tur leh beiseina nena ka nun hmang chho zel tur ka nih laiin nang hian min awm loh san teh reng la chuan maw – chhungte leh thiante, keima tan ngei pawh phurrit ka ni ang a. Ka then kual mai maiin ka tham ral zo ang a, lungleng reng rengin darkar sawmhnihpali hi ka hmang nitin zantin ang a, mihring ti a chhiar tlak nun hi ka nei lo ang. Mahse en teh nang hi i lo awm hi ruahsur hreawmin min kiansan a, a nawm zia leh a hlut zia ti belhchhah tura Chhimbal mawi tak mai a lo zam tel ang aia a let sariha hluin ka tan i hlu a. Nangmah ngei hi asin Pathianin mihring lama ka tana hlu ber tura a dah i ni. Chuvangin, awm lo ngai suh aw....

Awm lo ta la

Phuahtu: K. Hminga

Satu: Sangtei Khuptong

Awm lo ta la, ka hlimna a chuai ang a,

Awm lo ta la, ka hringnun a nguai ang a,

Thliarkar vakvaiten lawngmi an ngai angin,

Aw ka di, ka hringnun hian a ngai che.

Min liam san chuan, ka thinlung a hliam ang a,

Min liam san chuan, ka marphu a hniam ang a,

Hmanlai thlalak hlui rawng nei lo ang maiin,

Aw ka di, ka hringnun rawng a chuai ang.

Awm lo ta la, khawharin ka thamral ang,

Awm lo ta la, lunglengin ka zam ral ang,

Fur khua a thian a, chhimbal an mawi angin,

Aw ka di, ka hringnuna'n i mawi ber. (2)