Ha hmai chunglam pahnih hlai fal bik nei
te hi Sazupui ha nen a in an em avang hian Sap ho chuan chuti ang nei chu
‘Rabbit teeth’ tiin an sawi thin a. Chuti ang mi chu an nuih zawng te hian an ha
hmai chu a lang chiang bik em em thin a. Mizo-ah heti anga ha hmai hlai nei hi
kan awm nual a, an hmelthat viau phei chuan an inhmeh lel thin!
Hmeichhe 1 thian ka nei a; chumi pawh
chuan ha hmai hlai fal bik a nei a, a khup a tuah em em zui a – step-ah chhuk
zawnga a kal chuan a hnungah ka kal a phal ngai thak lo! Sazupui ang maia ha
hmai hlai bik pahnih, var tha deuh a neih avang chuan Sazupii tiin ka ko thin
a. Amah roh pawh chuan lawm taka pawmin ‘I Sazupui ka ni’ a ti a, a lawmawm ang
reng hle!
He ka Sazupui khawi hi nula fel tak mai,
thu leh hla lam tui tak, MA English niin “Poetry’ te hi a phuah ve roh thin a.
Sap tawngin a Poetry phuah lehkhabu pakhat chu a ti chhuak ve tawh nghe nghe a.
Chu a lehkhabu ka chhiar atang chuan amah hi ka hmel hriat a, mahse chung lai
chuan a ha hmai a hlai tih chu ka la hre lo.
Facebook lamah te kan inhmelhriat zuiin
kum 2017 khan Bawngkawn-ah a kal awh awh lai hi ka hmu tawh bawk a. Thu leh hla
lamah – thiam lo chung chunga kan tui dunna chuan a ruk tein - kan inbiak pawh hma pawhin kan inngaihven
ru ve zel a. Kum 2020 a lo hrechhuah chuan eng tin tin emaw kan inhnaih zui a.
Chutah kan inbel chiang zel a, Sazpui ang maia ha hmai hlai tak a neih pawh chu
ka lam hawia a nuih fo tak avangin ka hmu ngun ta hle a. Thla a lak reng reng hian a nui hrat a, a
Sazupui ha hi a lang deuh ziah bawk!
Hmeichhe fel fam kim a ni lo a, khawii
emaw laiah phei chuan mi sual tak leh zahpuiawm tak te pawh a ni ang. Mahse mi
rilru nghet tak, sum leh pai hausaknain a tihbuai loh, a duhna lama mi hauisen
tak leh rilru fim tak pu thei a ni a. A duh hunah chuan a chimawm thiamin a rin
zawng te lakah erawh chuan a nawiin a chimawm ang reng fu bawk!
He Sazupui hian thil sawi fiah a thiam lo
ang reng hle a – Aizawl-ah a awm e tilo hian veng hrang hrang kalna kawng leh a
kal dan awlsam hi a zawh tlak loh nek a, a sawi buai thiamin a hrilhfiah thiam
lo thei ang reng hle! Thil sawi fiahthiamna hi a thlak chham ber a nih laiin
Lecturer te chu a ni ang lawi a! A zirlaite hnenah hian engtin tak an zirlai
sawi fiah sak thin ang i maw?!
Pathian khawngaihnain mi ngainat leh lawm
a hlawh ve fu a – thian tam tak a nei bawk. A landan maiah chuan mi induh leh
chapo hmel tak, hawi sang vah niawma a lan lai hian – a ruka tap thin,
ngauhtuahna seng nasa leh mi khawhar ru thei tak, hriatthiam ngai leh dawhthei
taka a awm dan ang ang pawm ngai mihring a ni a. A hla- Poetry tam tak pawh hi
tap chung leh mal ngawih ngawiha a awm changa a phuah leh a ziah a ni ber bawk.
Chuti ang vel chu he Sazupui chanchin leh
mizia hi a ni a, hriatthiam tum loin pawm thiam tum ila – chu chu amah kan
hnaih reng theih dan tha ber a ni. Rilru no tak leh tap thin a nih avangin
hnemtu a mamawh fo thin a, amah chauha hun hman a mamawh fo thin. Chuti ang
hunah chuan ngawi reng leh chhel takin nghak tawp ila, va tibuai lo ila. ‘Tichuan
a duh hunah chuan a tak leh ho takin a lo tawng leh phawng phawng ang a, nasa
takin – A Sazupui ha lang vekin a lo nui leh ang. Heti anga a awm hi nakinah
phei chuan a la reh hlen vek dawn a, chumi hun chu dawhthei taka nghah chhuah
erawh ngai a la ni.
He Sazupui hian tunah hian amah nih tirtu
hla eng eng emaw a fawmkhawm ve leh nek nek a, Pathian zarah dam chuan kum thar
lamah Mizo tawng hla-ril – Poetry thar amah atang hian beisei ta ila kan tisual
lutuk lo ang. Chung hunah chuan a Sazupui ha hmai hlai fal leh var tha ang reng
tak hi a nuih zawngin kan la hmu leh ngei turah ngai ang – Pathian zarah.
Comments
Post a Comment