Kan In

Pawl sawm kan zirchhuah hma kha chuan kan retheihna leh kan in tha lem lo tak te hian ka nun hi an tibuai ngai lem lo – a chhan chu khaw dangah sikul kan kal lo a, miin kan rethei tih kha kan pian hma atanga an hriat tawh avangin. Tin, naupang mai kan la nih ve bawk avang te pawh khan kan chhungkaw harsatna kha hre tho mahila kan la hre thuk tak tak loa, nu leh pate rilru hah tur zia kha kan la hre pha tak tak lo bawk.

Pathian khawngaihnain pawl sawm te kan ‘pass’ ve hlauh a, Lunglei lamah sikul kal chhunzawm te a lo ngai ta a. Khatah chiah khan kan lo retheih zia kha a tak ngeiin ka hre chhuak- ve hnuhnawh a! Unau pali kan ni a, ka nu leh pate kut hnathawka eizawng an ni a, sikul kan la kal vek bawk avang khan kan hau tak thei em em mai a. Pawl sawm kan exam fee te kha ka pa buh seng lo hawin kan buh thar hmasa kha khawlah her faiin a hralh rum rum a, chuti anga ti thin chu kan ni a.

Lungleiah nitin sikul kal a lo ngai a, Bus Fare tur – kal lam leh haw lam atan cheng 20 leh chhuna thingpui kan inna tur kha cheng 10 – a vaiin cheng 30 kha nitin min pek a ngai a. A chang phei chuan mita kan puk chawp a, cheng 25 chauh nena sikul kal chang te, chhuna thingpui in ta lo leh ka thiante’n min kep sak tum kha vawi tam tak ka tawng a ni –BA kan kal thleng khan. Fine kan lo neih tum phei kha chuan kan buai vek zel a, kan thiante kan  pur buai nasa thei em em a ni.

Lungleia kan thiante khan an inah te duhsak takin min hruaiin min riah tir fo a, an hausak kan rin ruk aiin an lo hausa ziah a, an in leh lo pawh kha kan suangtuah aia sangin a lo tha hret bawk thin! Kan in lamah te lo len ve an chak thu leh min lo tlawh ve an chak thu an sawi apiang te hian ka inthlahrung ru em em thin a. Heti taka min duhsaktu ka thiante hi in leh lo nuam tak neiha mikhual hi ka chak ru ve em em thin.

Mi tawng duh tak leh fiamthu duh tak ni mahila ka thiante kha an chhungkaw eizawnna leh an nu leh pate han thawh kha ka zawt ngam ngai lo a, vawiin thlengin ka la zawt ngam lo bawk. A chhan chu keimah lam ka in en a, min zawt ve ta se engmah sawi tur ka neih loh avang hian heti lam hawi zawngah chuan ka kam a tam lo hle!

Chhunah thingpui dawrah kan chawl a, an ei leh in man ringawt te kha kan nithum sikul kalna daih a ni tih te kha ka lo chhut ru rauh rauh thin a. Keini phei chu purun sen ringawt hmeh nawk nawka sikul ka kal tum kha a awm fo a, kan inthlau hle tih kha ka hre chhuak nawn awn awn zel! Sikul kan kalna lamah Pathian zarah thiante leh hmel hriat tha tak tak kan phuloh hi kan nei ve zel a. Chungte chu kan ina lo kal an duh chang hian keimah hian hreawm ka lo ti ve thin a, kan in a that lemloh thu kha chiang takin ka hrilh hmasa thin a. Mahse tumah min hmusit leh min ngainep an awm lo a, an rin aiin kan rethei ang tih erawh chu ka hria.

Chuti ang leka in tha lo chu nei mahila Pathian hian min khawngaihin a malsawmna chhiarsen loh hian keini chhungkua ve teh lul hi min vur a. A tan thahnem kan ngaihloh zia leh kan nun dante hian Amah kan chawimawi loh nen hian – heti taka malsawmna chhiarsen loha min vur erawh hi chu ngaihtuah ngun hian hnuk a ulh a, lawmthu sawia tawngtai mawlh mawlh mai loh chu tih theih dang reng reng kan nei lo.

Mi in leh lo nuam taka kan awm lai te leh khawdanga kan awm lai te pawh hian he kan in ropui lo tak mai hi kan ngaiin kan thlahlel ve em em tho a. Ruahpui leh thlipuiin min nuai tak tak chang erawh hi chuan tlem chuan a zamawm ve thin! He in tlawm tak hian vawiin thlengin tui takin min la muttir a, kan duh duha kan awm min phal sak a, tuma mitmei ven ngailoin chaw pawh puar takin kan ei thin.

Mi fate’n an in leh lo nalh tak tak te, an pindan leh an khum nuam tak tak te Social Media lama an pho chhuah ang hian keini chuan thla kan la ve ngam lo a, lak tlak pawh a ni hek lo. Tute thlam leh bawng in emaw pawh tluk lo heti ve mai hi a ni a. Mahse ka sawi tawh ang khan Pathian zarah vawiin thlengin min la dinpui a, a chhungah hian thlamuang takin kan la awm ve zel a ni.

Engtikah emaw chuan Pathian zarah tun aia nuam zawk leh tha zawkte pawhin kan in hi kan la sa ve thei mai thei a. Chung hunah chuan ka thian fel tak tak te u, in duh tawkin in lo leng ang a, in riak ang a, in in ang chiahin in la khawsa dawn nia. Tunah rih hi chuan hei inhmuh angin heti zawng hi a la ni rih a, in tan ka tling lo a, min ngaidam ang che u. Lo nghak hrih ula, hlim takin kan inah kan la inkawm khawm dawn u nia.