Hriselna

Rual u zawkte chuan ‘The Crusader’, kum 1975-1983 inkara Pathian faka zai thinte kha an hrechiang hle awm e. Audio Casssete pathum siamin khatih laia rawngbawltu lar Rev. Dr. Vanlalnghaka te, Evan F. Laltuaia (fam) te leh midangte rawngbawlna kha zuiin Mizoram pumah an rawngbawlna kha a hlawhtling hle tih chu kan nu leh pa te chuan an hrechiang hle awm e. Pathian hla an sak thinte pawh Mizoram pumah a lar tih kan hre vek awm e. An chanchin hi Upa Sanglianthanga’n min lo hrilh a, ka lawm hle.

The Crusader hla sak zinga pakhat, Rinna Kohhran Pastor R. Lalropuia phuah ‘Hriselna’ tih chu tun hnaiah One in Christ te chuan an lo sa thar a. He hla mawi tak leh tunlai khawvel boruak mil tak mai ‘Hriselna’ tih hla a phuah dan hi Pastor Lalropuia hi ka han zawt a, fiah takin min lo hrilh a, ka lawm hle.

“He hla hi kum 1979-ah Chhinga Venga Pi Thangzawni te inah ka phuah a ni a. He hla hi Crusader Gospel Hit number 1 Album-ah khan telh a ni a. He hla ka phuah chhan chu Pathianin a mi te a venhim zia leh a humzia a ni a. Hripui pawh lo leng se la hri lakah khan a humhim tur zia kha a ni a. Israel fate pawh Mosia pawh khan a hruaichhuak a nih kha. Thlalerah pawh a veng zel a, Joshua leh Kaleba te pawh damloh nei miah loin an awm a, Pathian thutiamah an dingnghet a, Kanan ram an lut a nih kha.”

Covid-19 in khawvel min run a, lirnghing leh leimin te pawh Mizoramah kan tuar ta zauh zauh a. Mi tam tak chuan khawvel a tawp hnai tawhah ngaiin kan thlaphang ru tih hi hai rual a ni lo a. Engpawh chu lo nise, a pawimawh ber chu engpawh lo tawkin kan awmna khawvel hi hripui leh thihna te pawhin min run mahse, Pathian hi kan innghahna pumhluma kan hman phawt chuan engmahin min tichhhe zo dawn lo a ni.

Kan nunna chu kan lo chan pawh a ni thei a, kan chhungkhat leh kan hmangaih te pawhin lo tuar a ni thei e. Mahse Pathian hi kan neih phawt chuan engmah hian min tichhe hlen dawn lo a, he khawvel piah lamah pawh Chatuan nunna chu kan ta tura buatsaih lawk a nihna hi hre rengin thlamuang takin i awm ang u.

Hiselna

Phuahtu : Pastor R.Lalropuia (The Crusader)

1. Engkimtithei chungnungbera bihrukna awma chu

Englai pawhin a him ang, a him reng ang

Diabola thang lakah leh hri țha lo tak lakah chuan

Lalpa chuanin ani chu a chhanhim dawn a ni

Hri avangin i sirah sang tam tak te an tlu ang

I ding lamah sing an tlu ang

Chungnungbera awm nan i hman chuan

Nang erawh chu i puan in pawh a hnaih tawp lo vang

2. A thlain a khuh ang che, a thla hnuaiah i awm ang

Zana thil rapthlak lo thleng chu i hlau lo'ng

Chhuna thal lo leng țhin leh thim hnuaia hri leng țhin chu

Thu tak phaw te leh lian chuan a dang zel dawn a ni

3. A thu chu a tir chhuak a, a mite tidam turin

Boralna lak ata an nun a chhanhim țhin

Lalpa chu mi khawngaih thei, lainatnaa khat a ni

Dam reinain ka nun chu a tilungawi dawn si