Skip to main content

A ram leh a felna


Tuna Mizo thalaite zingah hian Pathian fak hla siam thiam em em Nula Cindy Lalthanpuii hi hrelo kan vang hle awm e. Kum 2016 Praise On atangin a zaithiam zia kan hmel hriat tan a, nula nungchang mawi tak leh fel tak, inngaitlawm tak mai a ni a. Aizawl Tlangnuamah cheng mekin tunah hian SCERT ah B.Ed a zir mek a. June ni 5, 2020 khan tun hmaa Redemption Singers ho hla sak thin ‘A ram leh a felna’ tih hla kha You Tube-a a channel siam thar ‘Cindy Lalthanpuii’-ah tichhuakin mawi tak mai a sa a. A video leh recording a fiah fel faiin en a man hla hle.

 

He hla mawi tak mai phuahtu hi tudang niloin zaithiam kan hriat lar Bethsy Lalrinsangi pa, Redemption Singers a an hotupa ber Saihmingliana phuah a ni a. He a hla phuah dan chung chang hi ka va zawt a, heti hian min lo hrilh a, ka lawm hle.

“He hla hi November, kum 1989 a ka phuah a ni a. Chanchin Tha Mathaia ziak 6:25-34 thu hian ka rilru a luah ve hle a. A ram leh a felna aia thil dang lungkham leh thlakhlelh kan ngah theih em em thin te hi rilruin a vei ve thin a. Hla thu dang pawh fawmkhawm hran lovin, Bible thu te hi a thluk rem dan tur ngaihtuahin ka remkhawm ve ta mai a ni. Redemption in Album 1990 kuma kan siam dawn khan kan han zir ve ta a, rawngbawlpuite rawtna angin kan album hmingah he hla 'A ram leh a felna' hi hman a lo ni ta nghe nghe a ni. Hla phuah mi ka ni hran lova, hla hi 3 chauh ka phuah ve a. Tun thlenga he hla miten an la sa ve duh leh Pathianin a tinung ve reng mai hi mak ka tiin, Pathian hnenah pawh lawmthu ka sawi phah fo thin.”

He hla mawi tak leh hlu tak mai hi tun hnaia a sak chhan Cindy-i hi ka va zawt bawk a, ani pawhin heti hian min lo hrilh a-

“He hla hi mawi leh tha ka tihna a rei tawh a, hla hlui hi ka ngaina ve hrim hrim bawk a. Tichuan ka nuin Pa Saihmingliana hi a va dil ta rawih a, kan lo sa ve a ti a. Chuan u Mangheta bulah ka record a, zirna te vang hian engmah ka ti hman lutuk lova, kan ti thut ta kha a ni a. Engmah hi ka zawh tlak loh aw? Tawngkam ka thiam lo a, ka sawi thiam lo sia maw, tikhian a ni mai.”

He hla hi kan hriat theuh angin Lal Isuaa innghat awp mai tur kan nih zia te, lungkham neih nasat lutuk a sawt loh zia Lal Isua’n a sawina a ni a. Pathian thu leh Chanchin Tha hi kan thupui ber leh kan dah hmasak ber a nih phawt chuan kan mamawh tinreng hi Pathianin min pe dawn a, chu mai niloin kan lungkham leh kan beisei piah lam thlengin min la pek belhchhah dawn zia kan hmu a nih kha.

Tuna kan khawvel hman mekah pawh hian kan hmalam hun a chiang loin engtin zel nge kan awm dawn kan hre lo. Mahse he hla leh Lal Isua thusawia kan hmuh ang hian Pathian rin tawp mai hi kan tihtur dik tak leh kan innghahna a nih zia i hre nawn ang u. Pathian hi a zawng zawnga kan rin phawt chuan mamawh kan intih bak pawh min pek belhchhah dawn tih Lal Isua ngeiin a sawi si a.

A ram leh a felna
Phuahtu: Saihmingliana (Redemption Singers)
Satu: Cindy Lalthanpuii

Aw nangni rin tlemte u
Eng nge in silhin in fen ang
Eng nge in eiin in inang
Ti a lungkham neite u
Inthatna tur hretu chuan
A pek loh che u in ring em ni

A ram leh a felna chu zawng hmasa ula
Tichuan heng zawng zawng hi a pe ang che u
A ram leh a felna chu zawng rawh u

Lal Isua’n tihian a ti
Engah nge in lungkham thin
Silh leh fen, ei tur aiin
Nunna a hlu zawk a sin
Dak ula en vel teh u
Chung leng savate zawng pawh
In pa vana mi’n a chawm si a

Nangni ho zingah hianin
In awm em nun tisei thei
Ramtuktinpar thanzia te
Ngun takin ngaihtuah ula
Solomon-a meuh pawh kha
Lal ropui ni mahsela
Hlobet ai paw’n a mawi silo

Comments

  1. He hla hi hman atangin ka hre tawh..ngaihthlak nuam ka ti thei hle. chuan ngaihthlak ti nuam leh zual tur a a phuahtu in a sawi fiahna ngei hriat phei chuan ngaihthlak a nuam leh zual dawn nih hi.

    ReplyDelete

Post a Comment

Popular posts from this blog

IMANUELA THI ZAMAN

Lal Isua thisen hlut zia leh keini misual boral tur te min chhanmdamna hlut zia puanchhuahna hla tha ber pawl chu Kristian Hla Bu No- 173-na 'Imanuela thi zaman' tih William Cowper phuah, Rev. Chhuahkhama lehlin hi a ni ngei ang. He hla phuahtu William Cowper-a hi Great Berkhampstead, England-ah November 26, 1731 khan a lo piang a. Kum 1754 khan Ukil ni turin a inbuatsaih a, mahse vanduaithlak takin Ukil ni tur chuan a tling zo lo a, depression nasa tak a nei a ni. Chuti anga nun hreawm tak a hman hnu chuan kum 1771 khan he 'Imanuela thi zaman' (There is a Fountain Filled With Blood) tih hla ropui tak hi a lo phuah chhuak a. Chu a hla phuah chu Conyers’s Collection of Psalms and Hymns in 1772  hla bu ah an chhuah hmasa ber a. Chumi hnu chuan Hla phuah thiam em em (Amazing Grace phuahtu) Newton nen an hla bu siam The Olney Hymns -  ah kum 1779 khan an chhuahnawn leh a ni.  He hla a phuahna Bible chang behchhan chu Zakaria 13:1 "Chumi ni-ah te chuan Dav...

Min Hruai Zel Dawn

Ira Forest Stanphill chu ni 14 February, kum 1914-ah khan Bellview, New Mexico-ah Andrew Crittenton Stanphill leh Maggie Flora Engler Stanphill te inkarah a lo piang a. An chhungkua-in  Coffeyville, Kansas -ah chengin kum 12 a upa a nihin High Sikul a zo a. Chillicothe (Missouri) Junior College atanga Graduate a zawh hnu lawk- kum 22 chauh a upa a nihin rawngbawl turin a inpe a.  Kum 1939, April ni 28-ah Southern Missouri District Council, Assemblies of God Kohhran chuan Pastor niturin a nemnghet a; a dam chhung hun hi rawngbawlnain a hmang zo a ni.  A dam chhung hian America leh khawvel ram hrang hrang 40 chuangah rawngbawlna a nei a; Pathian hla 500 chuang zet a phuah bawk a ni.  April ni 23, 1939 ah Zelma Lowson nupuiah neiin a nupui hi rimawi lam thiam tak niin piano a tum thiam em em a; fapa Ray-a neiin an chhungkua hian rawngbawlna/crusade te neiin an zinkual nasa em em thin a. Thusawi chauh niloin zai an thiam bawk a; chuti ang chuan Radio leh T...

BEISEINA NUNG

I Petera 1:3-9 A chunga kan tarlan Bible châng innghahna hi Petera te hun laia Asia Minor-a Kohhran țhang chak em em mai te chungchang lehkha a thawn ațangin a ni a. Helai 1:3-9 ah hian Pathian khawngaihnain Lal Isua tiha thawhnlehna hian beiseina nung min neih tir thu leh chu Lal Isua thiha thawhlehna chu kan chhandamna-chatuan nunna kan neih theihna tur a nih thu Petera hian min hrilh a. Beiseina hi keini ringtute chauh ni lo mi zawng zawng hian kan neih hi a pawimawh em em a. Beiseina hi mi rethei te chaw an ti hial țhin a ni. Miin beiseina a neih tawh loh chuan nun hlutna hi a hre tawh țhin lo a. Mi lar, zaithiam, Celeb etc pawh nise amah ah beiseina a awm loh chuan mahni intihhlum mai hi a thlang țhin. Hmanni lawk ah Linkin Park band-a an Vocalist Chester Bennington-a pawh inawkhluma an hmuh kha! Khang te kha a larin khawvelin an hriat nen-beiseina a neih tawh loh vang a ni ngei ang- a nunna kha amahin a inlak hial ni! Chuvangin beiseina neih pawimawh zia hi kan sawi ...