Kum 2013 kha nita in ka hria- ka nau nula hian Zoland atanga a download hla pakhat hi hi a phone-ah khan a play a. Khatih lai khan Facebook leh WhatsApp te khawih theihna phone tha kha kan nei phalo a. Chumi tuma ka nau hla chhuah pawh chu Mp3 khan niin nalh ka ti em em mai a. Chu hla chu eng hla nge a nih tih leh tute sak nge a nih thu ka nau chu ka zawt a, One in Christ an nih thu leh an hla sak chu ‘Ka lawm e Lalpa, i malsawmna vangin’ tih hla kha a ni.
Kum 2014 ah Orissa/Odisha ka awm laiin Facebook/WhatsApp khawih theihna phone ka lei ve a. Chumi hnuah chuan One in Christ ho te chu an zai leh an mahni te pawh video kaltlangin ka hmu thei ta a. An hla sak nalh ka tih em em ‘Ka lawm e Lalpa, i malsawmna vangin’ tih hla te kha Sap tawng atanga an lehlin a nih dan te kha ka’n hre chho ve hnuhnawh a. Tin, vawiin thlenga an hotupa Alvin Lalruatfela hi ka Arsenal fan pui niin kan inhre chho ta zel a.
Pathian khawngaihnain kum 2016-2020 chhunga Aizawl te ka’n awm ve hnuah hian One in Christ te nen hian kan inhmu zing leh zual ta a. An member zingah hian Alvin-a leh Lalruatdiki te nen hian kan inkawm nasa zual a. Lalruatdiki hi a hmain ‘Enna nunnem, thimin ka vel a bawm’ tih hla a sak khan amah hi chu ka lo hmelhriat ve tawh bawk a, he hla pawh hi vawi tam tak ka ngaithla tawh bawk.
An hla sak ho – nalh ka tih zual ho hi ka thiam dan dana review sakin Zozam Times, Aizawl Post leh Lelte chanchinbuah te ka ziah sak ve thin a. Chutia an mahni lo ngaihlua lo ngaisang em emtu chu tiin ka chungah an tha em em mai a. An mi leh sa angah min ngaiin mipui huapzo programme an neih chuan tel turin tihtakzetin min sawm ve ta fo a. Member thar an inhlanna ah te, an group/band dinchampha an lawmnaah te leh Album an release tum te pawhin tawngka leh lehkha in duhsak takin min sawm thin a. Chuti ang chuan kei pawhin Aizawl ka awm ve chhung chuan tiin ka hman rem chan dan ang angin ka va tel ve ta thin a.
Hla thar an tihchhuah te hian min lo hrilh ve vat zel turin ka ti a, anni pawhin phur tak maiin min lo hrilh ve thin a. An member dangte pawh hian an thik ka ringlo a – Alvin Lalruatfela leh Lalruatdiki te hi One in Christ member tihluntu ber leh an lungphum an ni kan ti thei awm e. An pahnih hian keima mimal pawhin ka bel chiangin belhchian an dawl tak zet a, an member dangte pawh hi mi fel tak tak leh puitling tak tak an ni bawk.
Lalruatdiki phei hi chuan min duhsak ru em em thin a, a mimal nun tam tak te pawh min hrilh thin a. Hmeichhe awmkhauh leh chhel tak mai, mi hlim thei tak leh rilru tha em em mai a ni a. Mi hriatthiamna a ngahin ka rilru natna leh hreawmna te hi ka hrilh ve nasa em em a, amah pawh hian min hrilh thin a. Rawngbawlna zawnah pawh tisa leh thlarau lama harstana a tawh dan te, BSI lama zaia rawng a bawl dan te, Serampore lamah te zai tura a kal dawn tuma a huphurh ve zia te pawh min hrilh a.
A pu damloh tum pawhin duat tak maiin Aizawl Hospital-ah a awmpui a, ka va kan ve nghe nghe a. Chumi tum pawh chuan nileng deuh thawin kan awmpui a, test ngai chi hrang hrang te test tur khan Zarkawt lamah te kan kal a. A pu kha a hmangaihin a duat em em mai a, a pu pawh khan a thlamuanpui em em a ni tih ka mit ngeiin ka hmu chiang hle.
Hmeichhe zaithiam leh hmeltha a nih loh zia te hi a inhrechiangin chuti chung chunga Pathianin a hmang ve duh tlat mai hi a lawm zia te kha min hrilh fo thin a. BSI lamah phei hi chuan a zinkual nasa ve em em a, taksa chau tak chung leh an in pawh lut mumal hmanloa zai tura a chhuah tlang fo thu te kha min hrilhin tawngtaipui turin min sawm ve lawm lawm thin a. A mimal nun- ngaihzawng chungchangte thleng pawh khan engkim min hrilh ve thin a, keipawhin ka hrilh bawk thin.
Kum 2020 kum tir lam khan a dam thalo tan a, Mission Veng Kohhran Hall-a One in Christ Member thar hlanna an neih tum pawh khan dam thalo tak chungin a han tel a. Tlai lama an inah kan thlah pawh khan vawt a tiin a khua a sik nasa reuh em em a. Aizawl Hospital ah awmin tum khat chu ka zuk tlawh a. Kan titi luam a, hmeichhe harh tak leh tumruh tak mai a ni a. A chungah eng natna pawh thleng se a hlauh loh thu leh Pathian a rin tlat thu kha min hrilh a, a dam ngei dawn thu leh rawngbawlna tur tam tak a neih thu pawh min hrilh nghe nghe a ni.
Pathian zarah a natna te zia chhoin kum 2020 CKTP General Conference, Serchhip ah te pawh khan a han kal ve leh lawp lawpin a han zai nghe nghe a nih kha. Hemi hnuah hian kan inbe tam lutuk lo a, ka hriat leh chu March thla laihawl – Lockdown tirh lamah khan Synod Hospital ah a inentir thu leh an admit thu kha a ni a. Kan College atanga a hlat loh avangin damdawi inah chuan tlawh theih a ni em tih kha WhatsApp lamah ka zawt a, ani chuan voice in intlawh an phal loh thu kha min hrilh a. Rilrua hre reng chungin leh tawngtaipui chungin a chanchin chu kan ngaihven chhunzawm ta ringawt a.
Tunah hian Synod Hospital Durtlangah ICU ah a awm mek tihte han hriat hian rilru a hreawm em em mai a. Keimah tak phei chu Aizawl ah ka lo awm tawhlo bawk nen – rilru a ti mangang hle a. Mi tam takin intawngtaipui tih ka hria a, a thlamuan thlak ka tiin amah ngei pawh hian lawmthu a sawi mawlh mawlh duh ngei ang tih ka hria.
Ruatdiki, lo dam tha vat ang che. I sawi ang ngeiin rawngbawlna tur tam tak i la nei a, damlo hman i nih loh kha! Kan theihtawpin i tan kan lo tawngtai fan fan a, i rin Pathian hian i chungah i tan a tha ber turin ro a rel ngei dawn tih kan hria a, lawm takin i pawm bawk ang tih ka hria.
Comments
Post a Comment