Ka hmangaih che

Kum 2017 February thlaah khan Aizawl Theological College-a Pathian thu zirlai pakhat Kennedy Lalhmangaiha chuan a ‘testimony’ hla ropui tak mai ‘Ka hmangaih che’ tih a phuah a. He hla phuahtu Kennedy-a hi ama tawkah rimawi lama mikhuallo tak mai niin ATC Male Voice (2017-2018) conductor te pawh lo ni tawhin Rimawi hmanrua hi eng chi pawh a khawih thei a, Aizawl Luangmualah cheng mekin Mizo nula zaithiam tak mai Mimi Lalzamliani nau a a ni a.

He a hla phuah dan hi ka zawt chiang a, heti ang hian min lo hrilh a-

“Tingtang ka kuah a, phone-ah voice recorder ka on a, ka rilrua hla thluk lo lang chu ka record ta a. Tichuan a thu hi a hnu lama ka phuah a ni a, ka testimony hla ka tih ve a ni. Isua hmangaihna hi a ropui a, a mak bawk a.  Mizote hi thilmak lawm tak mai kan ni a, eng emaw hlekah chuan kan phu dual mai thin. Isua hmangaihna mak tak mai hi chu kan tuipui tha duh mang lo thin.

“Lal Isua min hmangaihna hi engtia chhan let tur nge ni ang? Kawng tam tak a awm thei ang. ‘I duh angin min hmang rawh, i ropui nan’ tih hian a sawifiah berin ka hre thin. Mihring chuan duh zawng leh chak zawng kan nei ve ngei mai, rawngbawlna kawngah pawh tuina leh chak zawng kan nei. Mahse chung zawng aia kan dah hmasak tur chu ‘Pathianin engtin nge min hman a duh’ tih hi a ni. A ropui nana a duh anga a hman tura kan inbuatsaih hi a pawimawh hle in ka hria a, kan fello leh tlinglo chung chunga min chhandamtu tan hian engkim huama kan inpek hi a tul a ni.”

He a hla phuah hi hmanni lawka boral ta One in Christ member nula fel tak mai Lalruatdiki Chhangte khan mawi tak maiin a sa a. He hla phuahtu hian a phuah tirhah pawh Ruatdiki hi a rilruah lo lang nghalin Demo te an in thawn a. Tichuan hun rem changah Ruatdiki te inah zuk lengin an inzirtir a, he hla thunawn tlar tawp ber dawttu thluk a lo siamsa tawh chu tidanglamin Rautdiki nen hian an siam rem nghe nghe a.

Ruatdiki leh Kennedy-a

Tichuan Music track  hi Kennedy-a hian siamin Ruatdiki hian a lo zir a, chumi hnuah chuan Studio A 16, Valtea Hauhnar studio ah March ni11, kum 2017 khan an record a.  Music video hi siam an tum thin a, mahse a remchang lo leh thin a. Kum 2019 kum laihawl vel khan Ruatdiki hian Music video a thlawna min siamsak tur an awm a ti a. Tichuan hla dangte pawh inpein hmalam hun an thlir laiin hun lo takah Ruatdiki hi a lo boral zui ta mai si a. Kennedy-a hian he hla hi Ruatdiki thla lak thenkhat lakhawmin Music Video hi You Tube a en theihin tun hnaiah khan a siam ta a ni.

Hla record lai

He hla lo ngaithlatu zawng zawngte hian Lal Isua min hmangaihna leh engtia chhang let ve tur nge kan nih tih hi inzawt nawn ila. Mawi tak maia satu nula Lalruatdiki Chhangte nun atang pawh hian Pathian hmangaihna ropui zia leh Pathian tana kan dam chhung hunte hi hmang zo vek tur kan nih zia kan hrechiang thei awm e.

Ka hmangaih che

Phuahtu: Kennedy Lalhmangaiha

Satu: Ruatdiki Chhangte

Lal Isua hmangaihna makzia hi hril ru

Sual ata min tlan turin a thi

Hmangaihna mak ropui ber Isua Hmangaihna hi

Puangchhuak seng teh ila aw,

Ka fak ning lawng.

Aw Isu ka hmangaih che i ta ka ni,

I duh angin min hmang rawh i ropui nan.

Hmangaihna chuai thei ngai lo min hmangaihna hi,

Ka dam chhung zawng hian ka puang zel ang,

Ka hmangaih che.

Hmangaihna tawp nei thei ngai lo chu fak ru,

Lei leh van mi zawng zawng ten fak ru.

Hmangaihin min zawng chhuak a,

Chatuan nunna min pe,

Aw ava han ropui em,

Ka hril seng lo'ng.

Ani chuan kan fel leh that vang ni lovin,

A khawngaihna vang zawkin min thlang.

Chuti ang hmangaih nasa hringfaten kan chan hi

Aw ka rul zo seng lo'ng e,

Chatuan pawh in