A Hmangaihna a lo ni (One in Christ member Nula Lalruatdiki Chhangte, ni 22 May 2020 a boral ta pualin)

Mizoram chhung leh pawna Zofate zingah Pathian faka zaia rawngbawl thin One in Christ te hi tute nge an nih tih hi inzawh nawn ngailoin kan hre chiang hlawm hle awm e. Kum 2011-ah he Group hi din tan niin vawiin thlengin Pathian faka zaia rawngbawlin hun an hmang a, Pathian pawhin nasa takin a hmang tih hretute kan ni.

Heti ang taka Pathian hman an nih theihna bul ber chu member-te inpekna leh Pathian an tih tlatna vang a ni a, chung zingah chuan nula Lalruatdiki Chhangte hi fak phu leh chawmawi phu, a damlai hun zawng zawnga Pathian faka a hun hmang zo thaktu a nih zia hi a boral ni thleng pawhin chiang takin kan hmu a. Pathian pawhin a boral thlengin nasa takin amah faktu leh a rawngbawltu nula tlawm tak hi a chawimawi zia kan hmu awm e.

Kum 2018, September ni 24 khan Mizote zinga thu leh hla thiam ber pawl Vanneihtluanga hla phuah ‘A hmangaihna a lo ni’ tih hla kha You Tube lamah en theih turin One in Christ te hian an tichhuak a. He hla mawi tak mai hi kum 2000 a Vanneihtluanga phuah niin Lalruatdiki hla duh ber hi a ni a, he a hla phuah dan chanchin pawhin hi Vanneihtluanga ka va zawt a, ani pawhin a phuah dan chanchinte chiang takin min lo hrilh a. Aizawl Chanmari Kohhran Hmeichhia in kum 2000-ah Drama ziak turin an sawm a, Chanchin Tha avanga hmeichhiate hmasawnna tarlanna drama niin chu mi drama musical play hla 4 zinga a hnuhnung ber atan ‘A hmangaihna a lo ni’ tih hla hi a phuah a ni.

CKTP in KTP General Conference Hla Bu 2020 an siam dawnah khan hla bu thar a hla telh duh neite chuan hla leh a phuahtu leh a phuah dan chanchin te ziaka thehluh theih a nih thu kha kum dang bawkin an sawi leh a. Kum 2019 kum tir lamah nge ni ka hrechiang ta chiahlo a, Lalruatdiki hian min lo phone a-

“Rinfel, ‘A Hmangaihna a lo ni’ tih hla kha KTP General Conference Hla Bu –ah hian dah ve ka duh a, min lo ziah sak teh. Tawngkam ka thiamloh bakah nang chuan a hmain i lo ziak tawh a, kha kha kai tawi la, khawngaih takin min lo ziah sak ta che” a rawn ti a. One in Christ ho hla sak hrim hi chu ka thiam dan danin Chanchinbu- Lelte, Zozam Times leh Aizawl Post ah te hian ka ziah sak ve thin a. Tichuan ka ziah tawh sa chu kaitawi hleka siam thain Ruatdiki chu ka pe a, tichuan ani’n lo thehlutin kum 2020 KTP General Conference Hla Bu-ah khan telh a lo ni ve ta ni.

He hla hi a duh em em mai a, a damloh hmasak zawk – Aizawl City Hospital-a awm lai February ni 1, 2020 khan a sa vang vang a. Chumi hnuah chuan KTP General Conference 2020, Serchhip-ah khan he hla bawk hi dam thalo tak chung leh aw chak tawhlo ang reng takin a han sa leh a. Hei hi mipui hmaa a zai hnuhnung ber a lo ni zui ta a ni.

A ruang chungah he hla bawk hi a member pui One in Christ te chuan tap chungin Lalruatdiki tan hian an sak sak leh bawk a. A video lo en tute pawhin kan lainatin kan mittui a ko chhuak nasa hle a nih kha. Kan khawvel boruakin a zirloh avangin a thihniah mi tam tak an kal theilo a, mahse mi tamtakin Social Media-ah Lalruatdiki an ui thu leh an lainat thu hi an sawi nasain a thihna hian Zoram a dengchhuak kan ti thei awm e.

Aizawl Theological College-a kum 2018 Krismas lo hmang tu nula Merciful Khyreim, Mawngap, Shillong-a cheng chuan Lalruatdiki boral thu a hriat khan a ui thu leh eng vanga boral nge a nih leh a chanchinte min rawn zawt a. Merciful-i hi Kristian tha tak niin Lalruatdiki vuitu Mission Veng Pastor Rev. Dr. C. Lalhlira nen hian an inhmelhriatin ATC Principal a nih lai pawha ATC a lo kal kha a ni a. Lalruatdiki hla sak te leh One in Christ te hla sak awmzia chu hre veklo mahse ziathiam a tih thu leh a ui zia thu te kha min lo hrilh a. Chuti anga kan inbiak zawh hnuah chuan Lalruatdiki thlalak pakhat hmangin heti hian a WahtsApp Status a update a-

‘A singer, a girl who always have patience all, all the psins you’ve been going through are now over. I know you’re in a safe place with Jesus with no more tears nor pain, we’ll se you again Lalruatdiki’

Ni e, kum naupangte - kum 28 leka khawvela a hun hmang zotu Lalruatdiki hian a dam chhungin Pathian a tih a, a nei a, a theihtawpin Pathian rawng a bawl bawk a. Chung zawng zawngah chuan Pathianin a hmangaih zia leh a enkawlna zawng zawngah a vui ngailo a, zai leh banphara Pathian a fakna zawng zawngte kha tawk zo a tilo fo bawk.

Pathian malsawmna a dawn zozai te kha a ngaihtuah let a, kawng harsa leh hreawm a tawh lai zawng zawnga Pathian kaihhruaina dawn zawng zawngte kha a ngaihtuah let hian Pathian hmangaihna hian a awmpui zia kha a hre chiang em em thin. Natna khuma a mut lai leh thihna hlimkawr ruam a zawh mek lai pawh khan Pathian hmangaihna chuan a awmpui zia kha a hre chiang em em a. A chungah engpawh thleng se a hlauhloh thu leh a vui ngailoh thu kha a thih dawn thlenga a rilru put hmang niin Pathianin a hmangaih tih kha a hre chiang hle.

Chuti ang taka Pathian hmangaihtu leh a nun zawng zawng hmang zotu chu Hmangaihtu Pathian pawhin a hmuh hmaihlo a, Lalruatdiki rin leh beisei aia sangin a thihni thlengin Pathianin he nula tlawmte hi a chawimawi a. Mi tamtakin mittui leh khawngaihna in a thlah liam a, a dam lai leh a thih hnu thlengin mi rilruah ring taka thusawiin Pathianin a va chawimawi em!

A hmangaihna a lo ni

Phuahtu: Vanneihtluanga

Satu: One In Christ

Ka Lalpa min hruaina hi

Thu in ka hril seng dawn lo

Ka zai leh ka banphar te zawng pawh hian

A hmangaih an hril seng lo

Min hmangaihna chhiar dawn ila

Ka hringnun hian a hril phaklo

Ka nun leh neih zawngte nen hian in

A hmangaihna a lo ni.

A malsawm ka chhiar seng lo

Ka mamawh chitin min pe

Lamtluang zim leh thim ka zawh lai pawhin

A hmangaih banin min kai ṭhin

Ka hmabak a eng zel ang

Doral lian a tlawm zel ang

Ka rin leh ka beiseite aia sangin

Min la chawisang zel dawn si