Lei In

Mizoram Synod Choir (2018-2020) chuan an Music Video Album ‘Pathian Hmangaihna’ tiha an hla sak pakhat ‘Lei In’ (Temporary Home) tih Scooter Simmons phuah, T. Laldintluanga lehlin an sak chu You Tube lamah en theih tun hnaiah an dah a. He hla mawi tak mai hi kan tun lai boruak tawn nen pawh a inhmehin keini ringtute inhnemna tur hla tha tak a ni tih pawh kan hre theuh awm e.

He hla mawi tak mai phuahtu Scooter Simmons hi Nashville, Tennessee a cheng niin a chanchin hi han chhui zui mai tur a awmlo a. He a hla phuah mawi tak mai hi kum 1991 ah khan Gaither Vocal Band te pawhin nalh takin an lo sa tawh a. Southern Gospel ho sak thin hla tamtak a phuah thin a, tuna kan sawi mek pawh hi chung zinga pakhat chu a ni.

Mihring leh khawvel thiltihtheihna te, thiamna leh finna te hi sangin a nuam thei ang ber leh tha thei ang bera nun tumin khawvelah hian han inbengbel viau thin mahila – lawmna famkim tak tak hi chu he kawlvelah hian a lo awm hauhlo a. Kawng diklo zawhin hreawmna tam tak kan tuar a, tunah ngei pawh Hripui leng chuan khawvel min run mek a nih hi.

Chuti ang chuan kan mihring nun leh khawvel hi ngun taka kan chhut chuan –kan kumhlunna tur niloin khualzin mai kan nih zia a lang chiang hle a. Keini Kristiante tan phei chuan Van ram zawk hi kan awm hlenna tur a nih chu tun boruak atang pawh hian kan hrechiang thar leh zual awm e. Chuti ang a koh leh buatsaih kan nih zia chu he hla changkhatnaah hian tarlan a ni.

He khawvela mihring kan nih chhung chuan harsatna chi hrang hrang – hripui te pawhin min la run fo ang a, kan la thi fo ang a, kan thi mek zel bawk a nih hi. Mahse he khawvel hi kan khual zinna mai chauh a nih zia hre chianga chung lamah kan beiseina leh kan rinna te hi dah tlat tur kan nih zia chu he hla thunawnah hian kan hmu a ni.

Tuna khawvel min run mektu Covid-19 vangin kan rum a, mi tamtak an thiin kan nunphung zawng zawng a tibuai vek a nih hi. Mahse he hla chang hnihnaa kan hmuh ang hian heng hun harsa leh thihnain kan chunga thla a zar mek lai pawh hian Lal Isua Krista chauh hi kan chatuan himna tur leh kan neihchhun dik leh rinawm a nih zia hre chiang thar ila. Kan sualna zwng zawngte min hnehsaka min tlantu leh Ama hnena chatuana awmve tur leh ro luah tura min thlanna zawk hi kan inhnemna leh kan innghahna ni rawh se.  

He Hripui leng mek vang pawh hian kan nunna kan chanin he khawvel hi kan chhuahsanin tun maiah kan thi vek thei. Engpawh chu kan chungah lo thleng sela Lal Isua hnena awm tur zawk kan nihna leh chatuana nung zawk tur kan nihna hi he hla hian hrechiang hle turin min fuihin min chah mawlh mawlh a ni.

He hla lo ngaithlatu zawng zawngte Pathianin malsawm rawh se.

Lei In

Phuahtu: Scooter Simmons

Lettu: T. Laldintluanga

Satu: Mizoram Synod Choir (2018-2020)

Leia chawlhna zawnga ka vah vel lai hian

Lawmna kim ka tawng love

Vakvaiin hahchawlhna ka tawng thei silo

Kawng diklo vah bawk tlan leh in

Mahse ka lo hre ta khualzin mai ka ni

Ka hnaih zel e van hmun khi

Van kohna ri ka hria thawm mawi tak mai a ni

Chu hmun thlen hlan ka nghakhlel e

Lei ah ka cham reng dawn lo tih ka  hria

Ramtiam lam chu ka thlir reng zawk a ni

Lalpan ka tan van hmun min buatsaih e 

Lei Inah hian ka chawl hlen dawn si lo

Harsatna chhumpui te a lo thlen changin lungngaia kun mai lovin

Isua lam en fo la, tanpuitu a ni

Kawng dik ah chuan a kai ang che

Misual ber te a faah min lo pawm a

Ro luahtu a’n min thlang ta

Engtik nge kan hre lo, mahse a lo kal leh dawn

Van in nuam min hruai thleng turin

Nakin ah lawm takin

Luipui kam mawi takah kan tawk ang

Nakin ah lawm takin

Luipui kam mawi tak ah

In nuam zawkah Lalpan min hruai thleng dawn

Kumkhuain ka chawl ang