Covid-19 in khawvel min run mek a; Mizoram ngei pawh kan banglo a nih hi. He hripui laka kan damna tur chu tuna tan chuan thuawihna chauh hi a ni tih kan hre vek awm e. Khawel doctor leh nurse te leh mi thiamte'n he natna do letna tur damdawi ngaihtuahin chhun leh zan pawh chawlloin hna an thawk mek a, an inpekna hi a va fakawm teh lul em! Chutih rual chiah chuan nang leh kei pawhin kan tihtur chu thuawihna hi a ni.
Genesis bung 22 ah chuan Pathianin Abrahama hnenah Abrahama fapa mal neihchhun Isaaka chu Moria rama tlang pakhatah halral thil hlana hlan turin Pathian chuan a ti mauh mai a. Mihring mihrinna zawn atang chuan - Pathian ngeiin a pek, a tar lam fa leh a neihchhun Isaaka, halral thil hlan atana han hlan chu thil harsa tawpkhawk leh awm anglo lutuk a ni ang a. Pathian hian a ti mah mahnin hmangaihna leh lainatna nei miahlo Pathian emaw ni le tih tur hial khawpin Abrahama chunga a thil phut hi a mak a ni.
Mahse Abrahama thuawihna chuan malsawmna kengin khawvela pa ropui ber leh malsawmna hnar ni turin Pathianin mal a sawm tih kan hre theuh awm e. Abrahama thuawihna hian Pathian chu intumchawp Pathian, kan tana engkim ngaihtuahtu a nih zia vawiin thlengin kan hriatchian phah a ni.
Kohhran leh Sorkarin kan himna leh kan damna turin pawn chhuaklo tur te, ram danga awmte pawh zin veivah thulha mahni awmna hmuna awm turin min chah a. Mizorama awmte hi chu mahni inlama awm hi kan zawm tha hle a, thu kan awih hle niin a lang. Chutih rual erawh chuan ram danga awm te'n Mizoram kan lo haw duhna lamah harsatna nasa tak kan tawk tih erawh a lang chiang a. Sorkar hmalakna leh min dawnsawn danah te kan duhthu a sam tawklo tih erawh chu a lang chiang hle.
Eng dinhmunah pawh chuan lo awm ila; kan theih chen chena Kohhran leh Sorkar thuawih hi kan dam khawchhuahna tura Pathian thuchah a ni tih hi kan hriatchian nawn a tul hle mai. Mi thenkhat chuan Kohhranin inkhawm hrih a himlo a tihte pawh sawiselin kan Kristianna tehfung atana lo hmang leh Kohhran dem lek lek zawnga thuziakte a awm a, a pawi hle.
Pathian rorel dan leh remruat dan hi mihringte hian kan hre ve phak hauhlo a; Bible -a kan hmuh Pathian mi hman tamtakte hi mi tha famkim leh keini hriatthiam dana Pathian thuawih te hi an ni vek hauhlo. A then chu nawhchizuar te, sum leh pai lama mi duham -chhiahkhawntu te, sal leh bawihte leh ringlo mi, hnamdang te adt hi a duh hunah chuan Pathian hian a hmang mai thin tih Bible-ah ngei pawh kan hmu a ni.
Tun khawvelah chuan Kohhran hi Pathian aw, Lal Isua'n a aiawha a dah a ni a. Kohhran thuawih leh a thuneihna hriatchian hi Pathian thuawihna a ni a. Tin Kristian kan nih chuan Sorkar thupek, kan hotute thuawih hi kan tihtur a ni bawk a ni. Tuna Sorkar thupek leh min enkawl dan chungchangah te kan duhthu a samloin kan rilru a na pawh a ni mai thei e. Tumah indem tur kan awmlo a; kan duh vang niloin a tulna vang zawk hetia awm mek hi kan ni a. Chungah chuan thuawih taka tawrh ngam hi kan bat leh kan tihtur a ni.
A tawpa kan chunga thiltha lo thleng tur chu kan hmu phaloin kan hmabak chu thilchhia leh a thim lam chauhin min hmuak pawh a ni thei e. Kan mangangin kan thisen zawmpuite Mizoram lo lut thei ve talo te pawh an awm ngei ang. Tin chuti anga hreawm taka enkawl mek leh he thil tuar nasa bertu pawh kan ni thei e. Kan rilru a na in kan lo mangang ru viau pawh a ni thei - kan demawm reng reng loh.
Nang leh kei hi natuka khawvel tha zawk leh nuam zawk siamtu kan nih theihna turin vawiinah hian hreawm eng ang mahse thuawih hi i tum tlat ang aw? Kohhran leh Sorkar kaltanga Pathian in kan awm dan tur a rel hi nang leh keiin kan zawm that phawt chuan keimahni kaltlang ngei hian Pathianin he Hripui hi min hnehsak ngei ang.
Comments
Post a Comment