Nupa Nun

Kan College hi tlang chhipa awm a nih avangin tui ‘connection’ a awmlo a; kan nitin mamawh tui hman tur hi Motor-in a lo phur thin a. Nitin vawi thum tal hi chu tui phur motor chu kum 2016 atang khan a lo kal ziah a. A chang phei chuan nikhatah vawi thum aia tam lo kal chang pawh a nei thin.

College kan luh tirh – kum 2016 ah te chuan chu kan tui phur motor chu hmu fo mahila ka ngaihven ngai em em lo a. Mahse chutia nitin lo kal fo ta nafam chu inbiak chang te, han titi zawk changte chu a lo awmlo thei talo a. Chutah chuan thil chhinchiah tlak tak mai ka hmuh chu – an nupa hian an lo kal ziah thin tih hi a ni.

Kum li pumhlum College-ah hian Hostel-ah kan awm a. Zing dar nga atanga tui min lo pe tanin tlailam dar li velah te av awithumna atan an lo kal thin a. Chung hunah pawh chuan an nupa zela lo kalin tui an ‘pipe’ dun a, aw ka vin a an inbiak awm pawh hi ka hre ngailo.

Hemi te nupa hi chhungkaw hausa tak leh ropui tak chu an ni lo. A tawi zawnga sawi chuan ‘Driver chhungkua’ ve mai an ni. Mahse an nitin eizawnnaah zing kar atanga nilengin an thawk dun a, an inzui tamin an inngaina hle tih a hriat a. Keima mimal tehna atang chuan nupa entawntlak tak an ni tih ka hria.

An pa zawk hi tum khat chu ka titipui tawh a; a nupui chu fakawm ka tiin zing kar atanga a pasal eizawnna ah chhungkua an nih angin a theih ang angin a tanpui thin te chu ropui ka tih zia leh ka  ngaihsan zia ka hrilh a. Nupa inhmangaih tak leh inlungrual tak an nih zia te ka hrilh chu lawmawm a tiin ka faknaah erawh zahtlak a tih thu min hrilh a; pa inngaitlawm tak a ni tih ka hriat belh bawk. Chhungjkaw puitling tak niin an fa tlum ber pawhin College a kal tawh thu te min hrilh.

Pathian leh Kohhrante hmaah thihna chauhin min then hmaloh chuan nupa ni tawh tura intiam si a inthen leh hi mi tamtak kan awm a. Nupa kan nih hnuah kan mizia inhrechiang a – inngainep ta hlauh te; kan kawppui te’n kan beisei an phakloh avanga leh kan tui zawngte a inanloh avanga nupa inthen, chhungkaw hlimlo hi tam tak kan awm ngei ang.

Kan inngaihzawn lai angin kan lo inthlahlel reng tawhlo a, kan taksa mawina leh duhawmna te pawh a lo chuai chho a. Kan nitin eizawnna kawngah te kan tui zawng leh kan duh dan te a lo in ang vek hauhlo a. Chuti anga harsatna hrang hrangin kan chhungkua a chim hnuah pawh chuan nupa inlungrual leh entawn tlak, nupa inhmangaih tawn tak kan ni reng thei ang em?

Kan nupui pasal te tlinlohna leh chak tawklohna, an famkimlohna hrechiang bertu chu an kawpuitte hi kan ni a. Mi zawng zawng hriat ve hauhlo –an thuruk ril ber pawh hriatsaktu chu keimahni – an kawppuite ngei hi kan nih kha. Chuti anga kan kawppuite chaklohna leh an tlintawklohnaah te chuan indawm kang tawn leh intanpui tawna hmalam pan zel tur kan nihna te hi kan nupa nihna hian a kengtel tlat a ni tih te hi kan ngaihtuah nawn fo ngai em? Nge, kan ngainepin chung an harsatna leh an chaklohnaah te chuan kan chungtlakin kan pahtsan mai ang?

Pathian thuah nupa chu tisa pumkhat kan nih thu kan Chanchin Tha Matthaia ziak 19:6, Marka 10:8, Ephesi 5:31 adt ah te kan hmu a. Tin, inneihna hi Pathianin a tir atanga reng a nemngheh, a pawm leh a ruat a nih thu Genesis 2:24 ah kan hmu a. Chu kan inneihna chuan mahni chauh niloin kan kawppuite, kan tisa peng leh lamte enkawl, duat, an duhzawng tihsak leh hmangaih taka chhawmdawl kha a keng tel vek tawh a. Chu kan mawhphurhna hlen chhuak tha apiangte chu chhungkaw hlim, entawn tlak leh Kristian chhungkua ti a kan sawi thinte hi an ni.

Keini vawiin a nu leh pa te hi kan kawppuite lakah hian kan mawhphurhna – Pathian leh Kohhran hmaa kan itiamna hi kan hlen chhuak tawkin kan hria em? Kan kawppuite tui zawng leh ngainat zawngte hi kan tuipui ve em? An harsatna leh an rilru hahna thuk ber ber te hi kan hriatpuiin kan inchhawk zangkhai tawn em? Kawng engkimah kan inringtawn em? Kan kawppuite tan innghahna tlak pumhlum kan ni em? I inzawt nawn teh ang u.

Thalai- chhungkua la dintur zawng zawngte pawh hian kan kawppuite mizia, an tui zawng leh kan hmalam hun lo kal zel turte zirchiang hmasain chhungkaw bul tan i tum ang u. Hmelthatna leh mawina ringawt hi chhungkaw hlimna leh lawmna banpui a nilo tih hi kan hre reng tur a ni. Kan chhungkaw dintur innghahna ban pui ber tur chu Pathian a ni.

Chhungkaw lungrual, Kristian chhungkaw entawn tlak leh tha, inhmangaih reng chhungkua kan nh theihna tur a a banpui ber chua Pathian thuawih hi a ni tih kan hre vek awm e. Chhungkaw khawsak phung inang lo, eizawnna, sum leh pai thu-ah leh kan mizia-ah te pawh in anglo tak tak kan ni ang. Mahse Pathian thu hmanga kan chhungkua hi kan inenkawl chhung chuan kan dam chhung reilote-ah hian chhungkaw hlim leh mite tan pawh a entawn tlak kan ni ngei ang.

Pathian thu hmangin in nupa, inchhungkaw nun lo enkawl la; a bak zawng chu engkim a fel vek ang  - i beisei piahlam leh i rinphak bak thlengin.