Sawi ninawmloh Lalremsiami Hmar

Hockey khawvelah leh Mizote zingah Lalremsiami Hmar, India Hockey player duhlai hi hrelo kan  lo awm a nih pawhin kan tam tawh hauhlo ang.  A chanchin ringawt pawh hi mi tamtakin an ziak tawh a; ziah zawh senloh leh chhiar ninawmloh chanchin nei a ni a. Keima mimal ngei pawh hian Mizo nula zingah chuan ka ngaihsan ber pawl leh ka dah hlut em em mai a ni a. Chuvang chuan a chanchin ziah hi b aka inti ve a, amah Remsiami pawh hi ka zuk bia a. Hun neilo tak chungin min lo chhang let a; ka lawm hle.

Social Media lamah hian Facebook leh Instagram lamah ‘page’ a nei a; heti taka mi lar leh ngaihsanawm, khawvel dengchhuak khawp a ni tawh chung erawh hian nula inngaitlawm tak mai leh biak nuam tak a ni a. Explore Mizoram Website ah hian Ambassador niin amah an kawmna pawh chhiar tur a awm a. Mi lar mi hlu a ni chung hian amah hi a indah hlu loin tlawm tak maia a nung hi a ropuina tizual tu a ni kan ti thei awm e.

Kum 11 lek a upa a nih atangin Hockey a khel a; SAI Thenzawl atanga bul tanin India tan kum 2016 ah inkhel tanin vawiinah chuan khawvel pum huapa chawimawina sang ber ‘2019 FIH Women’s Rising Star of The Year’ lawman dawng phak khawpin hlawhtlinna a chang a. Amah leh Mizo mipuite kan lawmzia hi kan sawi seng awmlo e.

Harsatna tam tak paltlang a ni a; a lo chawrchhuahna in leh lo that bik loh zia te, mi dang aia chungnung leh chhuan tur bik a neihloh zia te hi a taka hmutu leh hretu te kan nih kha. Pathianin talent a pek Hockey khelh erawh nasa taka tihpun tumin a theih tawp a chhuah a. Amah Lalremsiami’n a sawi ang ngeiin hlawhtling tur chuan Pathian tiha nun leh keimahni hi kan pawimawh a, kan tuma kan chian bawk chuan kan hlawhtling ang tiin a sawi a. Chu a thusawi ngei chu umzuiin Pathian zarah a tumruhna avangin tun dinhmun hi a thleng a ni tih kan hre theuh awm e. Hei hi keini pawhin amah kan entawn ve natur pawimawh tak a ni.

Ngaihsan tur dik nia a hriat chu hnamdang nagihsanloh tur tihna niloin; a Mizo puite leh mahni kut ke ngei a dinchhuah tumte hi a ngaihsan tlak an nih thu a sawi a. Chuti ang ngei pawh chuan amah hi a nung a; keini pawh min fuih nghal a ni. Tumruhna kan neih phawt chuan kan tum ram theuh thleng turin kan hlawhtling vek thei tiin min chah a – chhiachhiah tlata zawm nghal hi kan bat a ni.

Mihringte hian harsatna hi kan tawk vek a; chung chu Siami chuangah pawh thlengin a pa duhtak pawhin a ram danga a inkhel lain a boral san tawh tih kan hriat kha. Heng harsatna kan tawh zawng zawngte hmachhawn tur hian keimahi tluka tha kan awmlo a; ka thil tawrh mek te hi mi dangin an tawrh ngailoh thil a ni biklo a; mi dangin an tawrh theih chu kan taur chhuak ve thei tur a ni tiin Siami hian min fuih bawk. Pathian rinchhan chungin engkim hi kan tuar chhuak thei a ni tiin min fuih a ni.

Khawvel pum huapa chawimawina lawmman a lak hi a ring phalo hrim hrim a; a elpuite hi tluk zo turin a beiseilo tih a sawi a. Pathian khawngaihna vang chauh a nih zia a hre chiang hle. Mizoram mipui zawng zawng amah lo vote a lo duhsaktu zawng zawng chunga a lawmzia hi a sawi thiamloin a sawiseng lo a, lawmthu a sawi mawlh mawlh a ni. 

A thalaipuite hnenah -harsatna tawp kan thlen pawhin beidawnglo a kan beih hram hram hian hlawhtlinna a lo awm leh thin tih hi min chah a ni. Tumruh tur leh ti hram hram turin min fuih mawlh mawlh a ni- i entawn ang u. 

A hmalam huna a a hmachhawp hnaivai ber chu India hian Olympic ah Hokey khel turin a tling a. Chumi tur chuan nasa taka a inbuatsaih thu leh Pathianin rem a tih chuan chak pui ngei a duh thu leh a tum thu a sawi. 

Pathian zarah hlawhltinna duhawm zawk leh Mizote min tihming tha zel turin duhsakna kan hlan a che.