Felna hriamhrei kan ni si

Central Kristian Thalai Pawl (CKTP) General Conference vawi 58-na, February 27-March 1, 2020- chhunga Serchhip a neih tura an theme song ‘Felna hriamhrei kan ni si’ tih hla Mizoram Synod Choir (2018-2020) te’n mawi tak maia an sak hi kan ngaithla fur tawh hlawm ang a. Hla thothang tha leh mi cho phur tak mai hla a ni a; Kings & Prophets kut chhuak niin Video hi Asanga Dosel kut chhuak niin minute 3 leh second 25 a sei a ni a. Mizoram Synod Choir te hian an sa nung nalh hle a nih kha.

 

He hla mawi leh ropui tak mai, thalaite min cho phur thei leh min fuihtu tha ni bawk phuahtu hi LP. Lalhlimpuia (LP. Mapuia)  niin Ramhlun North ah chengin nupui a nei tawh a, fa pathum an nei tawh bawk a. He la mawi leh ropui tak mai a phuah dan hi phone-ah ka va zawt a; phur takin min lo hrilh a- ka lawm hle.

“He hla hi ‘Theme Song’ tur a nih angin ka huphurh ve khawp mai a. CKTP lama kan hotute’n kumin Conference-a kan thupui tur chu ‘Felna Hriamhrei’ tih Rom 6:13 behchhan a phuah a ngaih thu min hrilh a. Ka huphurh ve em em mai a; a thupui ‘Felna hriamhrei’ han tih ngawt pawh hi ka huphurh sa a. A thupui phawk chhuak zolo a phuah hi ka hlau em em mai a, kan Pastor leh kan Pro. Pastor te pawh ka rawn a. A mi delh kha a nain mi sawisel te, ka tisual palh ang tih te, miin nalh an tilo ang tihte leh a thupui phawk chhuak zoloin ka phuah ang tih te chu ka hlau em em mai a. Chuvang chuan a thupui phawk chhuak zolo a phuah ka hlauh em avangin a thu ringawt ngaithuahin – a thluk pawh ngaihtuah hlei theiloin ka ziak chhuak a. Mahse a thluk khan kan houte duhtu a lo sam loa; siam tha leh turin min ti a. Chutia han siamthat leh chu ka huphurh ve em em tawh mai a. Tichuan ka rilru zawng zawng bun ruakin keima thiam dan angin ka phuah tawp mai ang ka ti ta a. Ni 28, July 2019 zingah khan ka theihtawpa tawngtaiin Pathian hnenah ka inhla a. Tuna a thluk ang hian ‘Sualna do tura Krista tana felna hriamhrei kan ni si’ tih hi ka sa chhuak ta hlawl mai a; tichuan ka music room-ah lut nghalin Pathian zarah ka lo phuah chhuak thei ta a ni.”  

He hlaa kan hmuh ang hian keini Kristian thalaite hi Pathian tana hriamhrei tha ber leh sual do tura hmanraw pawimawh ber kan ni a. Lal Isua rinchhan chungin sualna kan doin kan hneh zel thei a ni tih te, Pathian hman tlak leh hman theih ni ve reng tura kan inbuatsaih nasat zia a tul zia te he hlaah hian kan hmu a. Pathian tana hriamhrei hman tlak kan nih zel theih nan he hla sat u leh lo ngaihthlatu zawng zawngte Pathianin malsawm rawh se.  

Felna hriamhrei kan ni si

Phuahtu: LP. Mapuia

Satu: Mizoram Synod Choir (2018-2020)

**Sualna do tura Krista tana felna hriamhrei kan ni si**

1. Kan vanglaini te hi a rei dawn love

Kan vullaini te pawh chuaiin an liam a                                                              

Chu vangin I vanglaini hian

I siamtu hre reng la,

A thu chauh awihin a rawng bawl zel ang  che

Fak hla sa a hlim a zaiin,

Lalpa rawng  kan bawl zel dawn

Sualin min tibuai thin mahse la

Kan hneh zel ang

Kan engkim mai hi Krista ta a ni

Sualna do tur a Krista tana felna hriamhrei  kan ni si

Bridge:

Zam lovin I kal ang aw Kristian thalai,              

I hmahruaitu Lalpa a ni

Sual do turin inpeih rawh      

Lalpa’n a hmang duh che

Muang lovin I kal ang aw Kristian thalai               

I hmahruaitu Krista a ni

Sual do turin inpeih rawh 

Lalpa’n a hmang duh che

Coda:

Sualna do tur a Krista tana Felna hriamhrei kan ni si.

Krista tana felna hriamhrei kan ni si