Pathian thu ka zirchhunga ka nuna mi pawimawhte

Pathian khawngaihnain kum 2016 atangin Aizawl Theological College-ah Bachelor of Divinity (BD) hi ka zir ve tan a. Kan sikul kalchhuahna te-in a zir ve em em lo a; chuvangin saptawng hi ka thiamlo hle a- ka thiamlo hlen dawn ta bawk a ni. Tunah hian kum 2020 April thlaah kan zirzo tawh dawn a; he kum 4 chhung hian ka thiante hian tisa lam leh thlarau lamah nasa takin min tanpui a, an chungah ka lawmin Pathian hmingin lawmthu ka sawi tak meuh meuh a ni. 

Mihring kan nih chhungin thian bik leh ngainat bik hi kan nei lo theilo a. Lal Isua meuh pawh kha mihring famkim a nih avangin khawvela a lo kal chhung khan Peter-a, Jakob-a leh Johan-a te kha a zirtir dangte ai khan a ngainat bik thu kha Chanchin Tha Matthaia ziak 17:1 ah khan kan hmu a. Chuvangin keipawhin Pathian thu ka zirchhunga ka nuna mi pawimawh bikte hi inthlahrung lutukloin ka sawi chhuak dawn a; mi dangte pawhin min hriatthiam ngei ka beisei. 

1. Rev. Lalchawiliana Varte: Ani hi Cachar Hill Tribe (CHT) Synod atangin Religion Department a kan zirtirtu niturin Mizoram Synod-in kum 2017, Second Year BD kan zir laiin kan hawh a. Pa dam thlup mai leh mize zawiawi tak mai niin Aizawl Theological College atang hian BD leh M. Th a zirchhuak a. CHT Synod Secretary (Jr) a nih laiin kan mamawhna avangin Aizawl Theological College -ah kan zirtirtu niturin a lo kal a; Haflong-ah a nu leh pa te nen an cheng a ni. 

Rev. Lalchawiliana Varte te nupa leh an fapa naupang ber te nen

Ka sawi tawh angin kum 2017 ah BD Second Year kan nih kumin Indian Philosophy min zirtir a; Pathian zarah engtin tin emawni kan inngamtlak ta phian a. Kum 2018 a BD Third Year kan zir kumin a subject - Islam sakhaw chanchin te ka la a; Islam sakhaw chanchin zirna Mizo tawnga a siam chu kei tehlul min endik tirin lehkhabu-ah a siam a. A thlawn ngatin min la pe zui a; a chungah ka lawm hle a, ka dam chhungin ka theihnghilh thei tawhlo ang. 

Mi tawng tlem, mi pawisawi hlau leh mahni inphochhuak lo chi a ni a. A inngaitlawm em em a, thian ang maiin kan kawm bawrh bawrh thei a. Kan innel leh inngamtlak avangin diklo leh uchuak takin min duhsakna ka chungah pawh a lan tir ngai chuanglo a; chuti ang tur a beisei chi mize nei pawh a ni hek lo. BD  a zir lai chuan ATC Male Voice-ah te a tel thin a, M. Th a zirlaiin amah chauh a ni a - Religion Subject bikah. Kum hnih chhungin M. Th zirlai zawng zawng kha amah vekin a zirzo thak a ni. 

Aizawl Venghlui nula Lalsiamthari (Asiami) nupuiah neiin fa pathum an nei tawh a. ATC ka awm ve chhunga heti ang zirtirtu fel tak maiin min zirtir hi ka lawmin vannei ka inti takzet a. Pathian zarah lo dam zel tur leh rawngbawlna hlawhtling tak lo nei zel turin ka duhsakna sang ber ka hlan a ni.  

2. Vanlalhriatpuii: Ani hi Aizawl Venghlui nula a ni a; kum 2016 a BD zirtur a kan hming an tar chhuah khan Salome-i emaw tiin amah hi ka chhinchhiah a. College kan luh hma- kan inhriatchian tak tak hma hian CKTP General Conference, Champhai-a neihah khan kan inhmu bawk a, a hming dik tak ka hriat hma hian vawi 3 emaw ni chu kan inhmu a. 

Hriatpuii nen

Kum 2016 June thlaa BD kan zir hnuah Salome-i niloin Hriatpuii a lo nih daih zawk thu te ka hria a, Salome-i chu kan zirpui tho midang a ni. First Year kan nih chhungin Erica Zarzokim(i) te nen kan pathumin kan thu ho a. Mi tamtak chuan kan inngaizawng emaw an ti thin a; min dem fiam nasa em em thin. Mahse chuti lam chu kan inkarah hian a awmlo a; ani chuan ngaihzawng lam ngaihsakloin a zirlaiah chiah a rilru a pe a; kei erawh chuan ngaihzawng ka nei thin.

Mi hi a hre chiang em em a; kan chhungkaw dinhmun leh ka mizia zawng zawng hi chiang takin a hria a. Pawisa ka neihloh chang te hian min pe ringawt zel a; a pawisa ka bat tawh zawng zawng hi sang chuang fe a ni tawh ang. Ka farnu te'n min hmangaih ang chiah hian nuta ang tak takin min hmangaih a; min zilh a, min hau a, min tir a, min fuih nasa thei em em bawk a. Keimah zawk hian ka zir ngang lo a; min duhsakna ang zawng zawng hian ka nung chhuak zolo zawk a ni. 

Nula puitling tak mai a ni a; a tumruh a, a rilru a nghetin a lian em em a. Mi phungthlu tak mai leh dikna ngaina tak mai a ni bawk. MBSE hnuaia Scholarship dil ve tura ka sawm pawhin - Pathian zarah an pawisa lakluhin a tlin ve avanga a dil theiloh thuin min chhang a, ka zahin ka ngaisang hle. 

Second Year kan nih lai chuan kan thiante dem fiam kan hlawh thin avangin ani hmeichhe ler lemlo tak tan chuan a hreawm ang tih ka hratthiampui em em a. Amah pawh hian, 'Ka duh ve deuh chu nila min dem se pawi ka tilo a. Ka duh zawng i nihloh bakah nang ang mai mai duh tura mi in min ngai hi mak ka ti!' a ti tawh!

Kamis te, Mawza te, Jacket te leh Chapal te min leisak a; mi zingah thing tak leh chhe taka ka awm hi a phal lo a. A thinlung zawng zawngin min duhsak a, a chungah hian ka lawm tak zet zet a. Ka dam chhung pawhin ka chunga a thatna hi kei chuan ka rul zo lo ang. 

Pathian zarah tha takin BD hi zirzo se la; kohhran leh khawtlang tana a theihna leh a thiamna te hmag chhuak a rawngbawltu ropui tak leh Pathian tih mi a nih zel theihna turin duhsakna sang ber ka hlan a. Pasal fanau neiin a dam chhungin Pathian malsawmnain umzui zel rawh se tiin ka duhsakna sang ber ka hlan a ni. 

3. Z. Lalduhzuala: Ani te reuh hi Mamit atangin BD zirturin kum 2016 February thlaah kan inhre tan a. Amah hi ka chipui Zadeng a nih vang leh kei aia pate zawk a nih avang hian ka ngamtlakin ka unaupa angin ka en lui a. Amah leh a chhungte pawhin lawm takin min pawm a, an chhungkaw chungah pawh ka lawm hle. 

Duhzuala nen 

Saptawng thiam tak, lehkha thiam tak, puitling tak mai leh mi chapo lo tak mai a ni a. Edenthar Aizawl-ah a naute nen inluahin an awm a, a farnu hian MZU ah MA a zir mek bawk a. Kei Aizawl khua ni velo chuan kan khua ka haw dawn leh Aizawl ka phei dawnin riahna atan ka hmang nasa a. Kan in a awm ang chiaha ka inngaih avangin ka inthlahrung ngai reng reng lo. 

Amah Duhzuala nen tak hi chuan kan inkawm ngeih lo - a chhan chu mize inpersan tak kan nih avangin! Mahse ka mamawh leh ka duhna hunah chuan ka tan a awm reng a; sum leh paiah pawh ka manganin ka pur a, ka zirlaiah harsatna ka neih pawhin a hun hlu tak sengin ka tan a theihtawp a chhuah thin. 

Amah ang thian leh unau ka nei hi ka lawm em em a; amah hi ka hrechiangin ka ngaisang bawk a. Kum lamah kei aiin a naupang zawk nachungin kawng tin rengah u angin ka en zawk a; ka zahin ka ngaisang em em bawk.

A hun lo kal zel turah ka duhsakna sang ber ka hlan a; Pathianin malsawmna tam taka vurin rawngbawltu ropui tak lo nizel turin ka thinlung zawng zawngin ka duhsakna sang ber ka hlan a. Ka chunga amah leh a chhungte thatna zawng zawng hi engtikahmah ka theihnghilh thei tawh dawn lo a; ka dam chhung pawhin ka rul zo ngailo ang. 

Lalpa, heti ang thian tha tak tak min pek avangin i chungah lawmthu ka sawi e.