Kum sul liam hnu kan nun ngaih lai tho leh thin

Kristian Hla Bu kan hman mek a Krismas hla phuahtu la dam kan neih te zinga pakhat C. Lalkhawliana Krismas hla ‘Kum sul liam hnu kan nun ngaih lai tho leh thin’ tih hla hi Mizote zingah hian sa thiamlo kan awm awmlo e.  Krismas lo thlen apiangin Zofate hla sak zin pawl leh kan rilrem zawk taka Krismas min ngaihtuah tir theitu hla kan neih hlu ber pawl a mi a ni tih kan hre theuh awm e.  

C. Lalkhawliana hi Mizote tan thu leh hla lamah mikhual a nilo a; hla chi hrang hrang 40 vel zet a phuah a; a ‘poetry’ phuah pakhat ‘Taitesena’ tih pawh kha kum 2009 velah khan BA Mizo Honors ah kan zir thin nghe nghe a nih kha. Amah hi kum 1937, July ni 4 –ah Reiek-ah lo piangin tunah hian Aizawl Chanmari-ah a cheng mek a. Pathian zara hriselna tha tak nei zel tur leh min dam pui zel turin duhsakna sang ber kan hlan a ni.

‘Kum sul liam hnu kan nun ngaih lai tho leh thin’ tih hla, Kristian Hla Bu no-121 a awm hi Krismas hun hlut zia leh hunpui pawimawh; kan nun hlui leh kan vanglai te min ngaihtuah chhuah tir tu; mihringte’n chatuan nunna kan neihna tur a hun pawimawh ber a nih zia thu te he hlaah hian chiang takin kan hmu thei awm e.  

He hla changkhatnaa kan hmuh ang hian Krismas hun hlimawm tak mai a lo thlen dawn hi chuan a boruak hian kan rilru a tum hmasain chu chuan lunglenna-ah min hruailut a. Thlasik boruak vawt tak mai leh Krismas inzawm tlat te, zan boruak thiang tak mai leh Bethlehem khua te chuan kan rilru no a kai chhuak a, thu leh hla a lo pian phah ta zung zung mai a nih hi.

Bethlehem lam kan rilru a hawiin, ran chaw pekna thleng a nausen Lal Isua Krista; kan sual te chhandam tura inngaitlawm leh rethei tak maia a lo piang chu kan mitthla a. A hun lai khawvel a mite’n Lal leh Chhandamtu atan pawm theiloin Kraws-ah khengbet mahsela keini tan chuan Chhandamna kawng inhawnna a lo ni a. Chuvang chuan Lal Isua chu he hun Krismas-ah hian Lal ber lo ni mawlh rawh se tiin he hla thunawnah hian kan hmu a ni.

Krismas hun hlu tak chuan lunglenna a ken tel tlat avangin mimal leh chhungkaw tinte’n hlim leh lawm taka hman kan duh a. Chutih laiin mihring nunah thihna leh chhan hrang hrang vang te in kan inthen a lo tul si a; chu chuan nun hlui min siam sakin Krismas chuan lunglenna min thlen thin a nih kha. Chuti ang hun te chu lo tawng tawh mahila Lal Isua Krista hmang chuan kan rilruna leh kan lungngaihna te hnem turin leh Lal Isua chu innghahna tlak a nih zia he hla chang hnihna ah hian kan hmu a ni.

He hla chang thumnaah hian he hla phuahtu hian duhsakna min hlan a; Lal Isua Krista kan tan a lo piang; min chhandam tura a nihna leh neih zawng zawng kalsan a tlawm tak maia lo piang chu kan tan a hlut zia leh a lawmawm zia hre chiang nawn a hlim leh lawm taka hmang turin min chah mawlh mawlh mai a nih hi.

Chuti ang chuan keini pawhin kan tan a nau lo piang Lal Isua – Immanuel-a chu kan rilru leh taksa, kan theihna zawng zawnga fak leh chawimawi turin – eng thil dang mah inbawhbuai tirlo a hlim leh lawm taka Pathian faka leh chibai buk turin kan inbuatsaih dawn nia tiin he hla chang tawp berah hian he hla phuahtu hian min chahin min sawm a ni.