Mizoram Synod Choir (2018-2020) te chuan an Music Video palina ‘Min rawn chhar ta’ tih chu ni 27 August 2019 zan khan an tichhuak a nih kha. He hla hi James Rowe hla phuah ‘Love Lifted Me’ tih hla Dr. RK. Nghakliana (L) lehlin a ni a. A music video hi a fiah fel faiin minute 5 leh second 24 a sei niin a satute hian an sa nungin en a man hla hle a nih kha.
He hla ropui tak mai phuahtu James Rowe hi Horrabridge, Devonshire, England ah kum 1865 khan lo piangin Darsen (Copper) lai chhuaktu fapa a ni. America rama a pem hmain Irish sorkar hnuaiah kum li hna a thawk a; kum 24 mi a nihin Albany, New York-ah a pem ta a ni. Tichuan he hla hi kum 1912-ah Saugatuck, Connecticut-a a phuah niin Howard Smith-a’n a thluk hi a siam thung a. Chanchin Tha Matthaia ziaka Lal Isua leh a zirtirte lawnga an chuan behchhana a phuah a ni. He hla phuahtu ropui tak mai James Rowe hi November 10, 1933 khan Wells, Vermont ah a boral ta a ni.
He hlaah hian Pathian khawngaihna leh hmangaihna thuk zia; keini suala boral tur min chhanchhuaktu a nih zia leh chu chhandamna hna thawktu Lal Isua chu rintlak leh belhtlak a nih zia chiang takin kan hmu a. Chanchin Tha Matthaia ziak bung 8:23-27 –a kan hmuh angin Lal Isua leh a zirtirte chu lawngin Galili dilah an kal tih kan kan hmu a. Tuifawnin lawng chu vurin a tibuai a, zirtirte khan an hlau hle a nih kha. Lal Isua muhil lai chu kai thoin thlipui leh tuifawnte chu a hau reh tih kan hmu a. Zirtirte boral tur kha Lal Isua chuan a chhandam tih chiang takin kan hmu a nih kha.
Chu chu he hla phuahtu pawh hian he a hla phuahchhanah hian hmangin mihringte chu sual thuk tawh taka kan pil bo a. Keimahni theihna leh tumna ringawt chuan kan nunna turin kan tlanchhuah theih tawhloh laiin Pathian khawngaihna leh hmangaihna chuan Lal Isua kaltlangin chhandamna kawng min lo buatsaih sak a. Sual vanga chatuana boral tur kha Lal Isua chuan chatuan nunna chu min buatsaih sak thu kan hmu a nih kha.
Lungngaihna leh hreawmna thuk berah kan awm mek emaw, nun beidawng takin kan awm emaw, chung kan harsatna leh kan manganna thuk ber atang chuan engthil dang mahin min chhanchhuak theiin min chhandam theilo emaw pawh a ni thei e. Chuti anga beidawnna vawrtawpa kan awm lai pawhin Lal Isua Krista, thilpui leh ruahpui pawh hau reha thunun theitu, tuifawn a pil bo mai tur mihringte chhanchhuaktu Pathian kan neih hi hre reng tur leh chu kan manganna vawrtawp atang pawh chuan Lal Isua thiltihtheihna ring tlat tur leh min chhanchhuah theihzia hre chiang nawn turin he hla phuahtu hian min chah mawlh mawlh a.
Pathian khawngaihna leh hmangaihna chuan tuma tihchhiat zawh rual lohin kan manganna, kan beidawnna, kan hlauhna leh chatuana kan boralna tur laka atang chuan min rawn chhan chhuak a. Chu a chhandamna leh a thiltihtheihna chu ringa chang ve tur hian nang leh kei hi Pathian hmangaihna chuan min ngahkin min sawm mawlh mawlh a ni tih i hre thar ang u.
He hla lo ngaithlatu zawng zawngte Pathianin malsawm rawh se.
Min rawn chhar ta
Phuahtu: James Rowe
Translated by: Dr. RK. Nghakliana
Satu: Mizoram Synod Choir (2018-2020)
Sual thuk tak a pil tawh hnu,
Bo pil mai tawh tur kha;
Sual lungngai a khat chungin, khawngaihna ka ngen a
Tuipui pawh thunun tu chuan,
Ka au ri a lo hria;
Tin, chhandam-tu Krista chuan min rawn chhar ta.
Hmangaihna in min rawn chhar ta
Chhan thei dang awmloh hnuin min rawn chhar ta
Chhan thei dang awmloh hnuin min rawn chhar ta
Hlauhna hmun a cheng te u,
En r’u Lal Isua chu;
Tuifawn hlauh-awm a tla te;
A chharchhuak ang che u.
Tuipui pawh thunun tu chu, Engkim Lal a ni si;
Chhan tur chein tunah ngei a nghak reng che.
Lungngaih tuipui te fawnin,
Mangang thin mahila
Lal Isuan min hruai zel a,
Hmangaihin min muan thin.
Hlauhna te min hneh sakin, chakkhai tinreng min pe;
A hmangaih kohna chhangtu an muang fo thin
Comments
Post a Comment