Skip to main content

Isua’n ro a rel e

London khawpuia sumdawng thin pa pakhat chuan July 25, 1788 ah khan London, England-ah fapa Thomas James Judkin a hring a. He mipa naupang hi Pastor niin khawvela Kristian hla ropui ber pawl ‘Isua’n ro a rel e’ (Enthroned Is Jesus Now) tih leh hla dang tamtak hi a phuah ang tih  - a pa leh a hunlai a mite pawh khan an ring pha kher awmlo e.

Tichuan Rev. T. J. Judkin-a chu Caius College –ah lutin BA hi kum 1815 –ah a zir zoin he tih hunlai hian a hun tam zawk hi Sir William Curtis-a, City of London-a an hotu/upa buah a hmang zo a. Kum 1186 ah rawngbawl tura nenmngheh (Holy Orders) a nih hnuah chuan Pastor tenau angin hun rei tak a thawk a. Kum 1828 ah chuan Somers Chapel, St. Pancras, London-ah Pastor hna puitling a thawk ta a, a dam chhung hian Pathian hla 10 vel a phuahin September ni 11, 1871 ah khan Reigate district, Surrey, England a boral ta a ni.

He hla hi Mizote chuan kan sa thiam vek awm e; khawhar inah kan sa nasain Pathian biak inkhawmah pawh kan sak ngun pawl a ni a. He hla hi kum 1899 ah khan tichhuah a ni a, a thluk hi T. C. O'Kane siam a ni.  Kristian Hla Bu ah number 245-na a ni a, Mizotawngin Hauchhuma’n mawi takin min lehlinsak a ni.

Image result for enthroned is Jesus now

He hla hi kan hriat theuh angin Kristiante thurin pawimawh tak mai- thihhnu piah lama chantuana nuna (Eschatological) thu kan hmu a. He khawvel kan awm chhungin thihna kan pumpelh theilo a; kan hmangaih ngawih ngawih-kan nupui pasal, nu leh pa, kan thisen zawmpui, kan chhungkua leh kan thiante adt chu ui tak chung leh hunlo ti tak chungin thihna vangin kan then thin a. He thihna run thlak tak hian min run a, kan tap a, kan na vawng vawng thin a ni.

Chuti ang chuan khawvela kan awm chhungin kan hmangaih te nen thihna avangin inhmu thei tawh ngai dawnlo mahila- keini ringtu, Lal Isua hnungzuitu te erawh chuan chatuanin Lal Isua ke bulah amah faka chawimawia rorelin, kan then tak kan hmangaih ngawih ngawih te nen chuan engtikahmah inthen nawn leh tawhlo tur leh inthihsan tawh lo turin kan awm za tawh dawn a ni tih he hlah hian chiangtakin min puanchhuah sak a a ni.

Chu hmun chu chang ve tur leh kan hmangaih te nen chatuana Lal Isua nena rorel thei turin Tharau Thianghilm chu min pui tura sawmin i inbuatsaih ang u.

[He ka thuziah hi ka u leh ka thian tha em em mai ni bawk R. Lalfela, a nupui fel em em mai HC. Lilypuii'n cancer natna vanga hunlo tak a (11 November 2018) a boral san tak pualin ka hlan a. Vanramah Lal Isua hoin inhmangaih tak leh inṭhen tawh ngailo tura chatuana awm dun turin duhsakna sang ber ka hlan a ni]

Isua’n ro a rel e
Phuahtu: T. J. Judkin

Isuan ro a rel e,
Van thutphah chungah khian;
A lu-ah lallukhum, a ke
Bula mi thianghlim nen.

Ropuiin chhandamte,
A sirah an inkhawm;
Nakinah chuan kan tel ve ang a,
Nakinah, nakinah,
Nakinah chuan kan tel ve ang a.

An eng a, ni angin,
Chhiar sen an ni lo va,
Ropuina laltiang keng theuhvin,
Chawimawina hla an sa.

Beramno an fak chiam,
An tan leia thi kha;
A thisen hlu tak avang chuan,
Lukhum an khum theuh va.

Khawngaihin aw Thlarau
Min rawn tanpui langin,
Hnehtuho van hmun nuamah khian;
Kan pawl ve theihna tur.

Comments

Post a Comment

Popular posts from this blog

IMANUELA THI ZAMAN

Lal Isua thisen hlut zia leh keini misual boral tur te min chhanmdamna hlut zia puanchhuahna hla tha ber pawl chu Kristian Hla Bu No- 173-na 'Imanuela thi zaman' tih William Cowper phuah, Rev. Chhuahkhama lehlin hi a ni ngei ang. He hla phuahtu William Cowper-a hi Great Berkhampstead, England-ah November 26, 1731 khan a lo piang a. Kum 1754 khan Ukil ni turin a inbuatsaih a, mahse vanduaithlak takin Ukil ni tur chuan a tling zo lo a, depression nasa tak a nei a ni. Chuti anga nun hreawm tak a hman hnu chuan kum 1771 khan he 'Imanuela thi zaman' (There is a Fountain Filled With Blood) tih hla ropui tak hi a lo phuah chhuak a. Chu a hla phuah chu Conyers’s Collection of Psalms and Hymns in 1772  hla bu ah an chhuah hmasa ber a. Chumi hnu chuan Hla phuah thiam em em (Amazing Grace phuahtu) Newton nen an hla bu siam The Olney Hymns -  ah kum 1779 khan an chhuahnawn leh a ni.  He hla a phuahna Bible chang behchhan chu Zakaria 13:1 "Chumi ni-ah te chuan Dav...

Min Hruai Zel Dawn

Ira Forest Stanphill chu ni 14 February, kum 1914-ah khan Bellview, New Mexico-ah Andrew Crittenton Stanphill leh Maggie Flora Engler Stanphill te inkarah a lo piang a. An chhungkua-in  Coffeyville, Kansas -ah chengin kum 12 a upa a nihin High Sikul a zo a. Chillicothe (Missouri) Junior College atanga Graduate a zawh hnu lawk- kum 22 chauh a upa a nihin rawngbawl turin a inpe a.  Kum 1939, April ni 28-ah Southern Missouri District Council, Assemblies of God Kohhran chuan Pastor niturin a nemnghet a; a dam chhung hun hi rawngbawlnain a hmang zo a ni.  A dam chhung hian America leh khawvel ram hrang hrang 40 chuangah rawngbawlna a nei a; Pathian hla 500 chuang zet a phuah bawk a ni.  April ni 23, 1939 ah Zelma Lowson nupuiah neiin a nupui hi rimawi lam thiam tak niin piano a tum thiam em em a; fapa Ray-a neiin an chhungkua hian rawngbawlna/crusade te neiin an zinkual nasa em em thin a. Thusawi chauh niloin zai an thiam bawk a; chuti ang chuan Radio leh T...

BEISEINA NUNG

I Petera 1:3-9 A chunga kan tarlan Bible châng innghahna hi Petera te hun laia Asia Minor-a Kohhran țhang chak em em mai te chungchang lehkha a thawn ațangin a ni a. Helai 1:3-9 ah hian Pathian khawngaihnain Lal Isua tiha thawhnlehna hian beiseina nung min neih tir thu leh chu Lal Isua thiha thawhlehna chu kan chhandamna-chatuan nunna kan neih theihna tur a nih thu Petera hian min hrilh a. Beiseina hi keini ringtute chauh ni lo mi zawng zawng hian kan neih hi a pawimawh em em a. Beiseina hi mi rethei te chaw an ti hial țhin a ni. Miin beiseina a neih tawh loh chuan nun hlutna hi a hre tawh țhin lo a. Mi lar, zaithiam, Celeb etc pawh nise amah ah beiseina a awm loh chuan mahni intihhlum mai hi a thlang țhin. Hmanni lawk ah Linkin Park band-a an Vocalist Chester Bennington-a pawh inawkhluma an hmuh kha! Khang te kha a larin khawvelin an hriat nen-beiseina a neih tawh loh vang a ni ngei ang- a nunna kha amahin a inlak hial ni! Chuvangin beiseina neih pawimawh zia hi kan sawi ...